ກາແດງລາວຮ່ວມກັບສະພາກາຊາດໄທຈັດກິດຈະກຳແຈກຢາຍແວ່ນຕາໃຫ້ນັກຮຽນ

ເພື່ອເປັນການປັບປຸງຄວາມສາມາດໃນການຮຽນ, ການເບິ່ງເຫັນ ແລະ ການດຳລົງຊີວິດປະຈຳວັນ ຂອງນັກຮຽນເຂດຫ່າງໄກສອກຫຼີກ, ທັງເປັນການເສີມສ້າງການຮ່ວມມື ແລະ ການພົວພັນປະສານງານ ລະຫວ່າງອົງການກາແດງລາວ ແລະ ສະພາ ກາຊາດໄທ. ໃນວັນທີ 4-6 ເມສາ ນີ້ ອົງການກາແດງລາວ ຮ່ວມກັບສະພາກາຊາດໄທ, ໄດ້ລົງກວດກາສຸຂະພາບຕາ ແລະ ແຈກແວ່ນຕາໃຫ້ແກ່ນັກຮຽນແຕ່ຊັ້ນປະຖົມ ຮອດມັດທະຍົມຕອນປາຍທີ່ມີບັນຫາສາຍຕາຜິດປົກກະຕິຢູ່ 3 ເມືອງຄື: ເມືອງປາກງື່ມ, ເມືອງສັງທອງ ແລະ ເມືອງ ໄຊທານີ, ນະຄອນຫຼວງ ວຽງຈັນລວມທັງໝົດ 141 ໂຮງ ຮຽນ, ມີນັກຮຽນທັງໝົດ 30.097 ຄົນ; ໃນນັ້ນມີນັກຮຽນ ທີ່ມີບັນຫາ ດ້ານສາຍຕາຈຳນວນ 726 ຄົນ, ເຊິ່ງເປັນເປົ້າໝາຍໄດ້ຮັບແວ່ນຕາດັ່ງກ່າວພາຍໃຕ້ ການສະໜັບສະໜູນຈາກສະພາກາຊາດໄທ, ໃນຂອບການຮ່ວມ ມືລະຫວ່າງອົງການກາແດງລາວ ແລະ ສະພາກາ ຊາດໄທ ດ້ານວຽກງານມະນຸດສະທຳ.