ທ່ານ ອັດຊາດ ພົບທ່ານ ປູຕິນ ຄັ້ງທຳອິດ ໃນຮອບ 2 ປີ ເຈລະຈາສັນຕິພາບຊີຣີ
ປະທານາທິບໍດີຊີຣີພົບກັບປະທານາທິບໍດີຣັດເຊຍເປັນເທື່ອທຳອິດນັບແຕ່ປີ 2015 ເພື່ອຫາລືກ່ຽວກັບແຜນຍຸດທະສາດຕາມແນວທາງການທູດ ເພື່ອຫລຸດຜ່ອນສົງຄາມກາງເມືອງທີ່ຍືດເຍື້ອມາກວ່າ 6 ປີ.
ສຳນັກຂ່າວຕ່າງປະເທດລາຍງານຈາກນະຄອນຫລວງມົດສະກູ ປະເທດຣັດເຊຍ ໃນວັນທີ 21 ພະຈິກວ່າ: ທຳນຽບແກຣມລິນອອກຖະແຫລງການວ່າ: ປະທານາທິບໍດີ ວະລາດິເມຍ ປູຕິນ ໃຫ້ການຕ້ອນຮັບປະທານາທິບໍດີ ບາຊາ ອານ ອັດຊາດ ຢູ່ລີສອດແຫ່ງໜຶ່ງໃນເມືອງໂຊຊິ ເຊິ່ງຕັ້ງຢູ່ແຄມທະເລດຳ ໃນວັນທີ 20 ພະຈິກ ໂດຍຜູ້ນຳຣັດເຊຍ ແລະ ຜູ້ນຳຊີຣີໃຊ້ເວລາສົນທະນາກັນປະມານ 4 ຊົ່ວໂມງ ເຊິ່ງຫົວຂໍ້ສຳຄັນລວມເຖິງສະຖານະການການສູ້ຮົບຕໍ່ຕ້ານກຸ່ມກໍ່ການຮ້າຍ ທີ່ຜູ້ນຳຣັດເຊຍກ່າວຍ້ອງຍໍຄວາມຄືບໜ້າຂອງລັດຖະບານດາມັດກັດ ແລະ ພັນທະມິດ ໃນການປາບປາມຜູ້ຮຸກຮານ ແລະ ເຫັນພ້ອມວ່າສະຖານະການໃນຕອນນີ້ປ່ຽນຈາກມຸ່ງເນັ້ນປະຕິບັດການທາງທະຫານ ມາເປັນການໃຫ້ຄວາມສຳຄັນຕໍ່ການສ້າງສັນຕິພາບຕາມຂະບວນການທາງການທູດຫລາຍຂຶ້ນ.
VIDEO: Putin, Assad meet in Sochi to discuss political process in Syria https://t.co/p91IkVRlMa pic.twitter.com/vbafUnTn96
— RT (@RT_com) November 21, 2017
ເຖິງຢ່າງໃດກໍຕາມ, ຖະແຫລງການຂອງທຳນຽບແກຣມລິນລະບຸອີກວ່າ: ຜູ້ນຳຣັດເຊຍມີກຳນົດຫາລືທາງໂທລະສັບກັບປະທານາທິບໍດີ ໂດນັນ ທຣຳ ຜູ້ນຳອາເມລິກາ, ປະມຸກ ແລະ ຜູ້ນຳລັດຖະບານຢູ່ຕາເວັນອອກກາງອີກຫລາຍປະເທດ, ຫລັງການພົບປະຫາລືກັບຜູ້ນຳຊີຣີໃນຄັ້ງນີ້ ເຊິ່ງເກີດຂຶ້ນພຽງ 1 ອາທິດກ່ອນການເຈລະຈາສັນຕິພາບຊີຣີຮອບໃໝ່ ທີ່ສະຫະປະຊາຊາດ (UN) ຈະເປັນເຈົ້າພາບ ຢູ່ນະຄອນເຈນີວາ ປະເທດສະວິດ ໃນວັນທີ 28 ພະຈິກນີ້ ແລະ ກ່ອນໜ້ານັ້ນ, ທ່ານ ປູຕິນ ຈະພົບປະຫາລືໄຕພາຄີກັບປະທານາທິບໍດີ ຮັນຊັນ ໂຣຮານີ ຜູ້ນຳອີຣານ ແລະ ປະທານາທິບໍດີ ເຣເຊບ ເທຍິບ ເອີໂດກັນ ຜູ້ນຳຕວກກີ ຢູ່ເມືອງໂຊຊິ ໃນວັນທີ 22 ພະຈິກນີ້ຕາມເວລາທ້ອງຖິ່ນ.
