ອຸດົມໄຊ ອະນຸມັດໂຄງການສໍາປະທານ ຕັດໄມ້ປ່ອງທຳມະຊາດ ເນື້ອທີ່ 150 ເຮັກຕາ ແລະ ສົ່ງເສີມ ປະຊາຊົນປູກເນື້ອທີ່ 547 ເຮັກຕາ

ວັນທີ 20 ທັນວາ 2024 ຜ່ານມານີ້ ອົງການປົກຄອງແຂວງອຸດົມໄຊ ພິທີເຊັນສັນຍາ ໂຄງການລົງທຶນສໍາປະທານ ຕັດໄມ້ປ່ອງທຳມະຊາດ ແລະ ສົ່ງເສີມປະຊາຊົນປູກ, ເກັບຊື້ໄມ້ປ່ອງ ແລະ ສ້າງຕັ້ງໂຮງານແປ ຮູບຜະລິດຕະພັນໄມ້ປ່ອງ ມາເປັນເຄື່ອງໃຊ້ສອຍປະຈໍາວັນ ຢູ່ແຂວງອຸດົມໄຊ ກັບບໍລິສັດເອກະຊົນ ໄດ້ຈັດຂຶ້ນຢ່າງເປັນທາງການ  ທີຫ້ອງປະຊຸມ ພະແນກແຜນການ ແລະ ການລົງທຶນ ແຂວງອຸດົມໄຊ ໂດຍການເຂົ້າຮ່ວມຂອງ ທ່ານ ອ່ອນແກ້ວ ອຸ່ນອາລົມ ຮອງເຈົ້້າແຂວງອຸດົມໄຊ ພ້ອມພາກສ່ວນກ່ຽວຂ້ອງເຂົ້າຮ່ວມ.

ເນື້ອໃນສັນຍາໂຄງການ ແຂວງອຸດົມໄຊ ເຫັນດີອະນຸຍາດໃຫ້ບໍລິສັດ ລົງທຶນສຳປະທານຕັດໄມ້ປ່ອງທຳມະຊາດໃນເນື້ອທີ່ທັງໝົດ 150 ເຮັກຕາ ຂອງ 7 ເມືອງ ຂອງແຂວງອຸດົມໄຊ; ໃນນັ້ນ: ເມືອງໄຊ 2 ບ້ານ ເນື້ອທີ່: 26 ເຮັກຕາ, ເມືອງຫຼາ 2 ບ້ານ ເນື້ອທີ່ 30 ເຮັກຕາ, ເມືອງນາໝໍ້ 2 ບ້ານ ເນື້ອທີ່ 23 ເຮັກຕາ, ເມືອງງາ 2 ບ້ານ ເນື້ອທີ່ 13 ເຮັກຕາ, ເມືອງແບງ 2 ບ້ານ ເນື້ອທີ່ 24 ເຮັກຕາ, ເມືອງຮຸນ 2 ບ້ານ ເນື້ອທີ່ 20 ເຮັກຕາ, ເມືອງປາກແບງ 2 ບ້ານ ເນື້ອທີ່ 14 ເຮັກຕາ.

ບໍລິສັດຕ້ອງດຳເນີນສະເພາະໃນຂອບເຂດທີ່ໄດ້ກຳນົດ ແລະ ຕ້ອງດຳເນີນໃນເຂດປ່າຜະລິດທີ່ແຂວງອຸດົມໄຊໄດ້ຈັດສັນໃຫ້ເທົ່ານັ້ນ ແລະ ໃນການຕັດໄມ້ປ່ອງທຳມະຊາດແຕ່ລະຄັ້ງ ບໍລິສັດຕ້ອງສ້າງແຜນການຂຸດຄົ້ນປະຈຳປີ ບົນພື້ນຖານການສໍາຫຼວດ ແລ້ວຍື່ນ ຕໍ່ພະແນກກະສິກຳ ແລະ ປ່າໄມ້ ເພື່ອສັງລວມ ແລະ ສະເໜີຕໍ່ກົມປ່າໄມ້, ກະຊວງກະສິກຳ ແລະ ປ່າໄມ້ ເພື່ອອະນຸມັດແຜນການຂຸດຄົ້ນປະຈຳປີຕິດພັນການຕັດໄມ້ປ່ອງ.

ບໍລິສັດສົ່ງເສີມປະຊາຊົນປູກໄມ້ປ່ອງ ໃນເນື້ອທີ່ທັງໝົດ 547 ເຮັກຕາ ຂອງ 7 ເມືອງ ຂອງແຂວງອຸດົມໄຊ; ໃນນັ້ນ: ເມືອງໄຊ 2 ບ້ານ ເນື້ອທີ່ 76 ເຮັກຕາ, ເມືອງຫຼາ 5 ບ້ານ ເນື້ອທີ່ 107 ເຮັກຕາ, ເມືອງນາໝໍ້ 7 ບ້ານ ເນື້ອທີ່ 56 ເຮັກຕາ, ເມືອງແບງ 5 ບ້ານ ມີເນື້ອທີ່ 55 ເຮັກຕາ, ເມືອງຮຸນ 5 ບ້ານ ເນື້ອທີ່: 100 ເຮັກຕາ, ເມືອງປາກແບງ 5 ບ້ານ ມີເນື້ອທີ່ 77 ເຮັກຕາ.

ສຳລັບການຕັດໄມ້ປ່ອງທີ່ ບໍລິສັດ ໄດ້ສົ່ງເສີມປະຊາຊົນປູກຕາມຂອບເຂດທີ່ໄດ້ຮັບອະນຸຍາດຂ້າງເທິງ ບໍ່ຈໍາເປັນຂໍອະນຸມັດແຜນການຂຸດຄົ້ນ ຕາມຂັ້ນຕອນທາງດ້ານວິຊາການ ແຕ່ຕ້ອງໄດ້ລາຍງານບໍລິມາດໄມ້ປ່ອງທີ່ ຂຸດຄົ້ນໄດ້ໃຫ້ພະແນກກະສິກໍາ ແລະ ປ່າໄມ້ ຮັບຊາບເປັນແຕ່ລະໄລຍະ.

ທີ່ມາ: ສະຖານີວິທະຍຸ ແລະ ໂທລະພາບ ແຂວງອຸດົມໄຊ