ວາງສີລາລຶກໂຄງການກໍ່ສ້າງສາຍສົ່ງ ແລະ ສະຖານີໄຟຟ້າ115/22 ກິໂລໂວນ ນາໄຫ-ດົງໂພສີ
ພິທີວາງສີລາລຶກໂຄງການກໍ່ສ້າງສາຍສົ່ງ ແລະ ສະຖານນີໄຟຟ້າ 115/22 ກິໂລໂວນ ແຕ່ນາໄຫ-ດົງໂພສີ, ໄດ້ມີຂຶ້ນໃນວັນທີ 21 ພະຈິກນີ້, ທີ່ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ, ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ Wang Wentian ເອກອັກຄະລັດຖະທູດ ຜູ້ມີອຳນາດເຕັມ ສປ.ຈີນ ປະຈຳລາວ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ຮອງຜູ້ອຳນວຍການໃຫຍ່ ບໍລິສັດ ໄຟຟ້າລາວ ກ່າວວ່າ: ໂຄງການກໍ່ສ້າງສາຍສົ່ງ ແລະ ສະຖານນີໄຟຟ້າ 115/22 ກິໂລໂວນ ນາໄຫ-ດົງໂພສີ ແມ່ນແຜນງານໜຶ່ງທີ່ນອນຢູ່ໃນແຜນແມ່ບົດ ເພື່ອພັດທະນາລະບົບໄຟຟ້າຢູ່ປະເທດເຮົາ ແຕ່ນີ້ຮອດປີ2030 ແນໃສ່ສ້າງເງື່ອນໄຂ ແລະ ຂຸດຄົ້ນທຸກຄວາມສາມາດບົ່ມຊ້ອນ ເພື່ອເຮັດໃຫ້ການພັດທະນາຂະແໜງພະລັງງານໄຟຟ້າ ໄດ້ຮັບການຈັດຕັ້ງປະຕິບັດດ້ວຍຈັງຫວະຕໍ່ເນື່ອງ ແລະ ໝັ້ນທ່ຽງ, ກາຍເປັນກຳລັງແຮງຂັບເຄື່ອນເສດຖະກິດແຫ່ງຊາດ ທັງໃນສະເພາະໜ້າ ແລະ ໄລຍະຍາວ, ປະກອບສ່ວນສ້າງພື້ນຖານທີ່ໜັກແໜ້ນໃຫ້ແກ່ການພັດທະນາປະເທດຊາດກ້າວຂຶ້ນຕາມທິດສັງຄົມນິຍົມ, ຊຶ່ງໂຄງການດັ່ງກ່າວແມ່ນຜ່ານສອງຕົວເມືອງຄື: ເມືອງຫາດຊາຍຟອງ ແລະ ເມືອງໄຊເສດຖາ, ຊຶ່ງການກໍ່ສ້າງສາຍສົ່ງ 115 ກິໂລໂວນ ຈາກສະຖານີດົງໂພສີ ຫາ ສະຖານີນາໄຫ ມີຄວາມຍາວ ປະມານ 10 ກິໂລແມັດ, ໂດຍສະເພາະແມ່ນສະຖານີນາໄຫແຫ່ງນີ້ ແມ່ນສະຖານີກໍ່ສ້າງໃໝ່ທີ່ມີກຳລັງຕິດຕັ້ງ 100 MVA ແລະ ສະຖານີດົງໂພສີແມ່ນສ້າງ Bays 115 ກິໂລໂວນ 4 Bays, ພ້ອມອຸປະກອນ ແລະ ເຄື່ອງອື່ນໆຄົບຊຸດ, ຊຶ່ງງົບປະມານຂອງໂຄງການທັງໝົດປະມານ 76 ລ້ານໂດລາສະຫະລັດ, ຊຶ່ງເປັນເງິນກູ້ພິເສດ ຈາກທະນາຄານ Exim Bank ສປ.ຈີນ.
ທ່ານລັດຖະມົນຕີກະຊວງພະລັງງານ ແລະ ບໍ່ແຮ່ ມີຄຳເຫັນວ່າ: ໂຄງການກໍ່ສ້າງສາຍສົ່ງ 115 ກິໂລໂວນ ນາໄຫ-ດົງໂພສີ ແມ່ນໂຄງການໜຶ່ງເພື່ອຮອງຮັບການພັດທະນາກະສິກຳແບບວົງຈອນ, ດ້ານອຸດສາຫະກຳ, ການຂົນສົ່ງ, ການປຸງແຕ່ງ, ການບໍລິການ ແລະ ອື່ນໆ ທີ່ພວມຂະຫຍາຍຕົວຢ່າງວ່ອງໄວຢູ່ໃນປັດຈຸບັນ, ຊຶ່ງຈະເປັນການສ້າງເງື່ອນໄຂທີ່ສະດວກ ເພື່ອຕອບສະໜອງພະລັງງານໄຟຟ້າ ໃຫ້ແກ່ການພັດທະນາຢ່າງຮອບດ້ານຢູ່ໃນບໍລິເວນນີ້, ທັງໃນສະເພາະໜ້າ ແລະ ໄລຍະຍາວ.
