ເປີດແລ້ວ ! ລົດໄຟຟ້າເສັ້ນທໍາອິດຂອງເມືອງໂຮ່ຈີມິງ ໃຊ້ເວລາກໍ່ສ້າງເຖິງ 17 ປີ
ລົດໄຟຟ້າເສັ້ນທໍາອິດຂອງເມືອງໂຮ່ຈີມິງ ເຊິ່ງເປັນເມືອງໃຫຍ່ທີ່ສຸດຂອງຫວຽດນາມເປີດຢ່າງເປັນທາງການ ພາຍຫລັງໃຊ້ເວລາກໍ່ສ້າງນັບແຕ່ປີ 2007, ສ່ວນຄ່າໂດຍສານເລີ່ມຕົ້ນພຽງ 7,000 ດົງ.
ສໍານັກງານບໍລິຫານລົດໄຟເມືອງໂຮ່ຈີິງອອກຖະແຫລງການວ່າ: ລົດໄຟຟ້າເສັ້ນທໍາອິດຂອງເມືອງ ເສັ້ນທາງເບນແທງ-ສຸຍຕຽນ ໃຫ້ບໍລິການຢ່າງເປັນທາງການ ໃນວັນທີ 22 ທັນວາຜ່ານມາ ໂດຍມີໄລຍະທາງທັງໝົດ 19.7 ກິໂລແມັດ ແລະ ມີສະຖານີ 14 ແຫ່ງ.
ທັງນີ້, ຂະບວນລົດໄຟຈະໃຫ້ບໍລິການໂດຍບໍ່ມີຄ່າໃຊ້ຈ່າຍໃນເດືອນທໍາອິດ ເຊິ່ງຖືເປັນໄລຍະທົດລອງຈົນຮອດວັນທີ 20 ມັງກອນປີໜ້າ ເຊິ່ງປະຊາຊົນສາມາດຕິດຕໍ່ຂໍຮັບບັດເຂົ້າສູ່ລະບົບໄດ້ຢູ່ບ່ອນຈໍາໜ່າຍບັດໂດຍສານ ຫລັງຈາກນັ້ນຈະຈໍາໜ່າຍບັດທີ່ຄິດຄ່າໂດຍສານຕາມໄລຍະທາງ ເລີ່ມຕົ້ນ 7,000 ດົງ ແລະ ສູງສຸດ 20,000 ດົງ.
ນອກຈາກນີ້, ຍັງມີການຈໍາໜ່າຍບັດໂດຍສານປະຈໍາວັນ, ບັດໂດຍສານປະຈໍາເດືອນ ແລະ ບັດໂດຍສານສໍາລັບນັກຮຽນ ແລະ ນັກສຶກສານໍາອີກ.
ເຖິງຢ່າງໃດກໍຕາມ, ໂຄງການກໍ່ສ້າງລົດໄຟຟ້າເສັ້ນທາງເບນແທງ-ສຸຍຕຽນ ໃຊ້ເວລາເຖິງ 17 ປີ ໂດຍມີຍີ່ປຸ່ນເປັນຜູ້ສະໜັບສະໜູນສໍາຄັນ, ແຕ່ໃນໄລຍະເວລາຜ່ານມາ ພັດຜະເຊີນຄວາມຊັກຊ້າກ່ຽວກັບງົບປະມານ ແລະ ການກໍ່ສ້າງທີ່ບໍ່ໄດ້ມາດຕະຖານ.
