ຕີນມີກິ່ນ ທຳລາຍບຸກຄະລິກກະພາບຂອງທ່ານ
ການເບິ່ງແຍງຕີນຂອງຕົນເອງນັ້ນປະຕິບັດບໍ່ຍາກ ນັ້ນແມ່ນການເລືອກໃສ່ເກີບທີ່ມີຂະໜາດພໍດີຕີນ, ແຕ່ວຽກງານວິໄຈທາງ ການແພດລະບຸວ່າ : ເດັກຈຳນວນຫລາຍໃສ່ເກີບຂະໜາດໜ້ອຍເກີນໄປ ມີວຽກງານວິໄຈໜຶ່ງສະແດງຂໍ້ມູນວ່າ ເກືອບ 50% ຂອງເດັກຍິງໄວຮຽນຈະເກີດບັນຫາກ່ຽວກັບຕີນເມື່ອອາຍຸໄດ້ພຽງ 10 ປີ ພົບຄວາມຜິດປົກກະຕິຂອງຕີນຫລາຍຢ່າງ ເຊັ່ນ : ເລັກສັກ, ເລັບຜິດຮູບຮ່າງ, ຕາປາ ຫລື ກະດູກຄົດ ລ້ວນເກີດຈາກການໃສ່ເກີບທີ່ມີຂະໜາດບໍ່ເໝາະສົມ ການເບິ່ງແຍງຕີນນັ້ນລວມໄປເຖິງການລ້າງຕີນທຸກມື້ ຍົກເວັ້ນໃນກໍລະນີທີ່ຜິວໜັງຕີນແຫ້ງ ແລະ ແຕກຢູ່ແລ້ວ, ຫລັງຈາກລ້າງຕີນບໍ່ຄວນໃສ່ເກີບ ແລະ ຖົງຕີນທັນທີ ຄວນລໍຖ້າໃຫ້ຕີນແຫ້ງດີກ່ອນຈຶ່ງຄ່ອຍໃສ່ເກີບ ອາດໃຊ້ຜ້າຂົນໜູເຊັດກ່ອນ ຫລື ໃຊ້ພັດລົມເປົ່າ ເພື່ອໃຫ້ຕີນແຫ້ງໄວຂຶ້ນ ທັງນີ້ຍ້ອນຕີນຊຸ່ມຈະມີການຕິດເຊື້ອລາໄດ້ງ່າຍ ເນື່ອງຈາກວ່າຕີນເປັນອະໄວຍະວະທີ່ມີຕ່ອມເຫື່ອຫລາຍ ເຮັດໃຫ້ເຫື່ອອອກຫລາຍ ຖ້າບໍ່ໝັ່ນເຮັດຄວາມສະອາດຕີນ ແລະ ເກີບ ຈະສົ່ງກິ່ນເໝັນອັບຕ່າງໆໄປໄດ້ໄກ ໃນຂະນະດຽວກັນກັບຜິວໜັງຕີນມີຕ່ອມໄຂມັນໜ້ອຍ ຝາຕີນຈຶ່ງແຫ້ງ ແລະ ແຕກງ່າຍ ໃນກໍລະນີນີ້ຕ້ອງໃຊ້ຄຣີມໃຫ້ຄວາມຊຸ່ມຊື່ນທາ.
ຕີນມີກິ່ນເໝັນບໍ່ແມ່ນພະຍາດໃໝ່ ພົບຫລາຍທີ່ສຸດໃນຜູ້ທີ່ມັກຍ່າງຕີນເປົ່າຍໍ່ານຳ້ຝົນ ເມື່ອຜິວໜັງຊັ້ນຂີ້ໄຄຂອງຝາຕີນປຽກຊຸ່ມ ຈາກເຫື່ອຢູ່ຝາຕີນຫລາຍກ່ວາ ແລະ ຜູ້ຊາຍມັກໃສ່ຖົງຕີນຢູ່ຕະຫລອດເວລາ ອາການສຳຄັນຂອງພະຍາດນີ້ທີ່ພົບຫລາຍທີ່ສຸດເຖິງ 70% ແມ່ນຕີນມີກິ່ນເໝັນຫລາຍ ຖືເປັນການທຳລາຍບຸກຄະລິກກະພາບ ອາການຮອງລົງມາທີ່ພົບແມ່ນ 60% ແມ່ນເວລາຖອດຖົງຕີນອອກຈະຮູ້ສຶກວ່າຖົງຕີນຕິດກັບຝາຕີນ. ສ່ວນອາການຄັນນັ້ນພົບໄດ້ໜ້ອຍ ຄື 8% ລັກສະນະຂອງພະຍາດຕີນເໝັນຈະເຫັນເປັນຂຸມນ້ອຍໆຢູ່ຝາຕີນ ບາງເທື່ອຂຸມອາດຈະໂຮມໂຕກັນເປັນອ່າງຂະໜາດນ້ອຍຕື້ນໆ ເບິ່ງຄ້າຍຄືແຜນທີ່ ມັກພົບຂຸມເຫລົ່ານີ້ຕາມຝາຕີນທີ່ຮັບນຳ້ໜັກ ແລະ ງ່າມນິ້ວຕີນ ຖ້າຂູດຜິວໜັງ ແລະ ຍ້ອມເຊື້ອຈະພົບເຊື້ອແບັກທີເຣຍຕິດສີຟ້າ ພະຍາດນີ້ຈະເບິ່ງຈາກລັກສະນະພາຍນອກກໍອອກໄດ້.
ເຫື່ອອອກຫລາຍ ສຳລັບຕີນທີ່ມີເຫື່ອອອກຫລາຍຄວນໃຊ້ແປ້ງໂຮຍກໍຊ່ວຍໄດ້ ເລືອກໃຊ້ແປ້ງທົ່ວໄປ ຫລື ແປ້ງສະເພາະສຳລັບຕີນ ທີ່ເອີ້ນວ່າ foot powder ກໍໄດ້ ແປ້ງຊະນິດນີ້ມີລັກສະນະຄ້າຍຄືແປ້ງຝຸ່ນທາໂຕ ພຽງແຕ່ເນື້ອແປ້ງອາດໜາກ່ວາ ແລະ ດູດຊຶມນຳ້ໄດ້ດີກ່ວາ ການໂຮຍແປ້ງເຮັດໃຫ້ຜິວຢູ່ຕີນແຫ້ງ ບໍ່ຊຸ່ມ ຈຶ່ງຫລຸດອາການລະຄາຍເຄືອງ ແລະ ຊ່ວຍໃຫ້ເກີດຄວາມຮູ້ສຶກເຢັນສະບາຍ ຄວນປ່ຽນຖົງຕີນທຸກມື້ ແລະ ຄວນໃສ່ເກີບສະຫລັບຄູ່ ຄູ່ໃດບໍ່ໃສ່ກໍເອົາໄປຕາກແດດຂ້າເຊື້ອແດ່.
ການປ້ອງກັນຕ້ອງລະວັງໃຫ້ຕີນແຫ້ງຢູ່ສະເໝີ ອາດໃຊ້ແປ້ງຂ້າເຊື້ອໂຮຍ. ການປິ່ນປົວ ຢາປິ່ນປົວສິວທີ່ໃຊ້ກັນຫລາຍແມ່ນເບນຊອຍ ເປີອອກໄຊ (benzoyl peroxide) ກໍໍເອົາມາໃຊ້ປິ່ນປົວພະຍາດຕີນເໝັນໄດ້ຜົນດີ. ນອກຈາກນັ້ນ, ຢາປິ່ນປົວ ແລະ ຢາຂ້າເຊື້ອລາຊະນິດທາກໍປິ່ນປົວພະຍາດຕີນເໝັນໄດ້ ພົບວ່າສ່ວນໜຶ່ງຂອງຄົນທີ່ມີເຫື່ອອອກຢູ່ຝາມື ຝາຕີນຫລາຍ ຈະມີລັກສະນະຕື່ນເຕັ້ນ, ຕົກໃຈງ່າຍ, ວິຕົກກັງວົນ ແລະ ຮູ້ສຶກບໍ່ໝັ້ນຄົງ ບາງເທື່ອຫາກປ່ຽນອຸປະນິໄສໃຫ້ເຢັນ ແລະ ສະຫງົບຂຶ້ນ, ເຫື່ອອອກຢູ່ຝາມື – ຝາຕີນຈະດີຂຶ້ນ ຖ້າບໍ່ເຄີຍກວດສຸຂະພາບກໍແນະນຳໃຫ້ໄປພົບແພດເພື່ອກວດເຊັກຮ່າງກາຍທົ່ວໄປ ເພາະພະຍາດບາງຢ່າງ ເຊັ່ນ : ຕ່ອມໄທຣອຍເປັນພິດ ກໍອາດເຮັດໃຫ້ເຫື່ອອອກຫລາຍໄດ້.
