ກອງປະຊຸມປຶກສາຫາລືການສ້າງພະນັກງານນໍາພາ-ຄຸ້ມຄອງເພດຍິງ ຄັ້ງທີ II

ໃນວັນທີ 21 ພະຈິກນີ້, ສູນກາງສະຫະພັນແມ່ຍິງລາວ ຮ່ວມກັບ ຄະນະຈັດຕັ້ງສູນກາງພັກ, ກະຊວງ-ອົງການທຽບເທົ່າ ແລະ ທ້ອງຖິ່ນຕ່າງໆ, ໄດ້ຈັດກອງປະຊຸມປຶກສາຫາລືກ່ຽວກັບການສ້າງພະນັກງານນໍາພາ-ຄຸ້ມຄອງເພດຍິງຂຶ້ນເປັນ ຄັ້ງທີ II, ໂດຍການເປັນປະທານຂອງທ່ານ ຈັນສີ ໂພສີຄໍາ ກໍາມະການກົມການເມືອງສູກກາງພັກ, ຫົວໜ້າຄະນະຈັດຕັ້ງສູນກາງພັກ.

ກອງປະຊຸມ ໄດ້ຄົ້ນຄວ້າ, ປຶກສາຫາລື ໃນການຈັດຕັ້ງປະຕິບັດບັນດາເປົ້າໝາຍທີ່ພັກ-ລັດວາງອອກ, ໂດຍສະເພາະລົງເລິກຄົ້ນຄວ້າ ເຖິງຄວາມຮັບຜິດຊອບ ແລະ ໜ້າທີ່ຂອງແຕ່ລະພາກສ່ວນ, ຂອດປະສານງານກ່ຽວກັບວຽກງານສ້າງພະນັກງານນໍາພາ-ຄຸ້ມຄອງເພດຍິງ, ເພື່ອກະກຽມໃຫ້ແກ່ການຄົ້ນຄວ້າ ໂຄງປະກອບການຈັດຕັ້ງ, ບຸກຄະລາກອນໃຫ້ແກ່ກອງປະຊຸມໃຫຍ່ 3 ຂັ້ນຂອງພັກ ແລະ ກອງປະຊຸມ 3 ຂັ້ນຂອງສະຫະພັນແມ່ຍິງໃຫ້ມີຜົນສໍາເລັດ. ການສ້າງພະກັນງານນໍາພາ-ຄຸ້ມຄອງເພດຍິງ ເປັນວຽກໜຶ່ງທີ່ສໍາຄັນ ຊຶ່ງພັກ-ລັດຖະບານໄດ້ເອົາໃຈໃສ່ຕະຫຼອດມາ ເນື່ອງຈາກວ່າ ປັດຈຸບັນຢູ່ປະເທດເຮົາແມ່ນຈໍານວນພົນເພດຍິງໄດ້ກວມເອົາເຄິ່ງໜຶ່ງແລ້ວ ແລະ ເປັນກໍາລັງແຮງສໍາຄັນໃນການເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ທັງແມ່ນຄວາມຮຽກຮ້ອງຕ້ອງການອັນຈໍາເປັນ ໂດຍສະເພາະ ໃນເງື່ອນໄຂໃໝ່ຂອງການເຊື່ອມໂຍງກັບພາກພື້ນ ແລະ ສາກົນ, ເພື່ອກະກຽມຄວາມພ້ອມໃນການສະຫຼຸບຕີລາຄາການຈັດຕັ້ງປະຕີບັດມະຕິກອງປະຊຸມຂອງພັກ ຄັ້ງທີ X ແລະ ມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກ ສະຫະພັນແມ່ຍິງ, ກໍຄືການຈັດຕັ້ງປະຕິບັດແຜນ ພັດທະນາເສດຖະກິດ-ສັງຄົມແຫ່ງຊາດ  ຄັ້ງທີ VIII ແລະ ແຜນພັດທະນາແມ່ຍິງ ເຄິ່ງສະໄໝ ໃນປີ 2018, ໃຫ້ບັນລຸຄາດໝາຍ, ເປັນຕົ້ນແມ່ນຄາດໝາຍທີ 5 ຮັບປະກັນໃຫ້ແມ່ຍິງໄດ້ມີສ່ວນຮ່ວມຢ່າງເຕັມສ່ວນ ແລະ ມີປະສິດທິຜົນ ແລະ ໄດ້ຮັບໂອກາດເທົ່າທຽມກັນ ໃນການເປັນຜູ້ນໍາທຸກລະດັບ, ການຕັດສິນໃຈທາງດ້ານການເມືອງ, ເສດຖະກິດ, ວັດທະນະທໍາ ແລະ ສັງຄົມ. ພ້ອມດຽວກັນນີ້ ກອງປະຊຸມ ຍັງໄດ້ຮັບຟັງບົດສະຫຼຸບຕີລາຄາການສ້າງພະນັກງານນໍາພາ-ຄຸ້ມຄອງເພດຍິງ ໃນໄລຍະປີ (2013-2017) ແລະ ບາງວຽກງານຈຸດສຸມ 2018-2020 ອີກດ້ວຍ.

error: Alert: Content is protected !!