ຊູແອດຢຸດມອບການຊ່ວຍເຫລືອ ບາງສ່ວນແກ່ກຳປູເຈຍ

ລັດຖະບານ​ຊູ​ແອດ​ປະກາດ​ຍົກ​ເລີກການ​ຊ່ວຍ​ເຫລືອ​ໃຫ້​ແກ່​ກຳປູ​ເຈຍ “ບາງ​ສ່ວນ” ຕອບ​ໂຕ້​ກໍລະນີ​ລັດຖະບານ​ຂອງ​ທ່ານ ຮຸນ​ເຊ​ນ ຍຸບ​ພັກ​ແກນ​ນຳ​ຝ່າຍ​ຄ້ານ.

ສຳນັກ​ຂ່າວ​ຕ່າງປະ​ເທດ​ລາຍ​ງານ​ຈາກ​ນະຄອນຫລວງ​ພະນົມ​ເປັນ ປະ​ເທດ​ກຳປູ​ເຈຍ ​ໃນ​ວັນ​ທີ 22 ພະຈິກ​ວ່າ: ສະຖານ​ເອກ​ອັກຄະ​ລັດຖະທູດ​ຊູ​ແອດປະຈຳ​ນະຄອນຫລວງ​ພະນົມ​ເປັນ ອອກ​ຖະ​ແຫລ​ງການ​ໃນ​ວັນ​ທີ 21 ພະຈິກ ຢຸດ​ມອບ​ການ​ຊ່ວຍ​ເຫລືອ​ຄັ້ງ​ໃໝ່​ຕໍ່​ກຳປູ​ເຈຍ ຕາມ​ຂອບ​ການ​ຕົກລົງ​ຮ່ວມ​ມື​ດ້ານ​ການ​ພັດທະນາ​ໃນ​ລະດັບ​ລັດຖະບານ​ຕໍ່​ລັດຖະບານ, ​ເຖິງ​ວ່າ​ຍັງ​ຍົກ​ເວັ້ນ​ສ່ວນ​ຂອບ​ການ​ຊ່ວຍ​ເຫລືອ​ທີ່​ກ່ຽວຂ້ອງ​ກັບ​ການ​ສຶກສາ ​ແລະ ງານ​ວິ​ໄຈ, ​ແຕ່ການ​ທີ່​ຊູ​ແອດ​ຕັດສິນ​ໃຈ​ຢຸດ​ການ​ຊ່ວຍ​ເຫລືອ​ໃນ​ສ່ວນ​ອື່ນ​ທີ່​ເຫລືອ​ທັງ​ໝົດ ​ເຊິ່ງລວມທັງ​ການ​ບໍລິຫານ​ລະບົບ​ລັດ ​ໂດຍ​ຈະ​ສົ່ງ​ຜົນ​ກະທົບ​ຕໍ່​ການ​ພັດທະນາ​ໂຄງການ​ປະຕິ​ຮູບ​ການ​ກະຈາຍ​ອຳນາດ​ປົກຄອງ​ຈາກ​ສູນ​ກາງ​ສູ່​ທ້ອງ​ຖິ່ນ​ຂອງ​ກຳປູ​ເຈຍ.

ທ່າ​ທີ​ດັ່ງກ່າວ​ຂອງ​ຊູ​ແອດ​ຖື​ເປັນ​ມາດ​ຕະການ​ຕອບ​ໂຕ້​ຄັ້ງທຳ​ອິດ​ຂອງ​ຝ່າຍ​ສະຫະພາບ​ເອີຣົບ (EU) ຕໍ່​ກໍລະນີ​ທີ່​ສານ​ຂອງ​ກຳປູ​ເຈຍ​ມີ​ຄຳ​ສັ່ງ​ພິພາກສາ​ໃນ​ອາທິດ​ຜ່ານ​ມາ ​ໃຫ້​ຍຸບ​ພັກ​ກູ້​ຊາດ​ກຳປູ​ເຈຍ (CNRP) ​ແລະ ​ໃຫ້​ສະມາຊິກ​ທັງ 118 ຄົນ​ເວັ້ນພັກ​ທາງ​ການ​ເມືອງ​ເປັນ​ເວລາ 5 ປີ ຖານ​ສະໜັບສະໜູນ​ທ່ານ ​ເກິມ ສຸຂາ ຫົວໜ້າ​ພັກ CNRP ​ເຊິ່ງຖືກ​ຈັບ ​ແລະ ດຳ​ເນີນ​ຄະດີ​ອາຍາ​ໃນ​ຂໍ້​ຫາ​ກະບົດ ​ເດືອນ​ກັນຍາ​ຜ່ານ​ມາ.

ປັດຈຸບັນ, ຊູ​ແອດ​ຖື​ເປັນ​ປະ​ເທດ​ຜູ້​ບໍລິຈາກຈາກ EU ​ໃຫຍ່​ອັນ​ດັບ 3 ຂອງ​ກຳປູ​ເຈຍ ຮອງ​ຈາກ​ຝຣັ່ງ ​ແລະ​ ​ເຢຍລະ​ມັນ ​ໂດຍ​ມູນ​ຄ່າ​ການ​ຊ່ວຍ​ເຫລືອ​ຂອງ​ຊູ​ແອດ​ທີ່​ມອບ​ໃຫ້​ກຳປູ​ເຈຍ​ມີ 100 ລ້ານ​ໂດ​ລາ​ສະຫະລັດ ຄວບ​ຄຸມ​ໄລຍະ​ເວລາ 5 ປີ.

error: Alert: Content is protected !!