ບັນດາປະເທດອາຊຽນ ຫາລືບັນຫາການລັກລອບເຂົ້າ-ອອກເມືອງ ແລະ ອາດຊະຍາກຳຂ້າມຊາດ
ກອງປະຊຸມຫົວໜ້າຕຳຫລວດກວດຄົນເຂົ້າ-ອອກເມືອງ ແລະ ຫົວໜ້າກົງສູນ ກະຊວງການຕ່າງປະເທດອາຊຽນ ຄັ້ງທີ 21 ໄດ້ໄຂຂຶ້ນຢ່າງເປັນທາງການ ໃນວັນທີ 22 ພະຈິກນີ້, ທີ່ນະຄອນຫລວງວຽງຈັນ ເພື່ອປຶກສາຫາລືແລກປ່ຽນຂໍ້ມູນທາງດ້ານການຕ້ານ ແລະ ສະກັດກັ້ນການລັກລອບເຂົ້າ-ອອກເມືອງທີ່ຜິດກົດໝາຍ ລວມທັງອາດຊະຍາກຳຂ້າມຊາດ, ຕ້ານການກໍ່ການຮ້າຍ ແລະ ການຄ້າມະນຸດ ເພື່ອແນໃສ່ເຮັດໃຫ້ຂົງເຂດອາຊຽນມີຄວາມສະຫງົບທາງດ້ານການເມືອງ, ວັດທະນະທຳ-ສົງຄົມ ແລະ ເສດຖະກິດ.
ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມດັ່ງກ່າວ, ພາຍໃຕ້ການເປັນປະທານຂອງ ທ່ານ ພັນໂທ ສາຍສະໝິງ ສີວິໄລ ຫົວໜ້າກົມຕຳຫລວດກວດຄົນເຂົ້າ-ອອກເມືອງ, ມີບັນດາຫົວໜ້າຄະນະຜູ້ແທນ ເຈົ້າໜ້າທີ່ກວດຄົນເຂົ້າ-ອອກເມືອງ, ຫົວໜ້າພະແນກກົມກົງສູນ ຈາກບັນດາປະເທດສະມາຊິກອາຊຽນ ແລະ ຫົວໜ້າກອງເລຂາອາຊຽນເຂົ້າຮ່ວມນຳດ້ວຍ, ເພື່ອ ຮັບຟັງການລາຍງານສະພາບການຢູ່ພາຍໃນພາກພື້ນ ແລະ ຜົນສຳເລັດກ່ຽວກັບການຮ່ວມມືການຈັດຕັ້ງປະຕິບັດແຜນງານ, ໂຄງການທີ່ໄດ້ຮັບຮອງເອົາຢູ່ໃນກອງປະຊຸມຄັ້ງທີ 20 ໃນປີຜ່ານມາ, ພ້ອມທັງຄົ້ນຄວ້າພິຈາລະນາ ແລະ ຮັບຮອງເອົາບັນດາແຜນງານ, ໂຄງການ ກໍຄື ທິດທາງການຮ່ວມມືໃນຕໍ່ໜ້າ ເປັນຕົ້ນແມ່ນການແລກປ່ຽນຂໍ້ມູນຂ່າວສານກ່ຽວກັບວຽກງານຕ້ານ ແລະ ສະກັດກັ້ນການລັກລອບເຂົ້າ-ອອກເມືອງ ລວມທັງອາດຊະຍາກຳຂ້າມຊາດເຊັ່ນ: ການຕ້ານການກໍ່ການຮ້າຍ, ການຄ້າມະນຸດ ແລະ ອື່ນໆ. ພ້ອມກັນນີ້, ຍັງໄດ້ຮ່ວມກັນປຶກສາຫາລື ເພື່ອຫາວິທີແກ້ໄຂບັນຫາການເຄື່ອນຍ້າຍແຮງງານ, ການນຳໃຊ້ໜັງສືເດີນທາງບໍ່ຖືກຕ້ອງ ແລະ ບັນຫາອື່ນໆ ທີ່ເປັນໄພຂົ່ມຂູ່ຕໍ່ຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ສົ່ງຜົນກະທົບຕໍ່ການດຳລົງຊີວິດຂອງປະຊາຊົນ ລວມທັງການພັດທະນາເສດຖະກິດ-ສັງ ຄົມ ຂອງບັນດາປະເທດສະມາຊິກອາຊຽນ.
ທ່ານ ພົນຕີ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ກ່າວວ່າ: ບັນຫາການເຄື່ອນຍ້າຍແຮງງານ, ການລັກລອບເຂົ້າອອກ-ເມືອງ, ການກໍ່ການຮ້າຍ, ອາດຊະຍາກຳຂ້າມຊາດ ແລະ ການນຳໃຊ້ໜັງສືເດີນທາງຂອງຄົນອື່ນ ທີ່ນອນຢູ່ໃນຂອບເຂດຄວາມຮັບຜິດຊອບຂອງອາຊຽນ ຍັງເປັນບັນຫາທີ່ທ້າທາຍ ແລະ ເປັນໄພຂົ່ມຂູ່ຕໍ່ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ, ສົ່ງຜົນກະທົບໂດຍກົງຕໍ່ການດຳລົງຊີວິດຂອງປະຊາຊົນ ແລະ ການພັດທະນາເສດຖະກິດ-ສັງຄົມຂອງຫລາຍປະເທດ ໂດຍສະເພາະບັນດາປະເທດສະມາຊິກອາຊຽນ, ເຊິ່ງບໍ່ມີປະ ເທດໃດສາມາດແກ້ໄຂບັນຫາດ້ວຍຕົນເອງໄດ້ ຖ້າປາສະຈາກການຮ່ວມມື ແລະ ແລກປ່ຽນຂໍ້ມູນຂ່າວ ສານ. ສະນັ້ນ, ກອງປະຊຸມຄັ້ງນີ້ຖືວ່າເປັນນິມິດໝາຍສຳຄັນ ເພາະເປັນການທົບທວນຄືນການຈັດຕັ້ງປະຕິບັດວຽກງານໄນໄລຍະຜ່ານມາ ແລະ ຄົ້ນຄວ້າວາງແຜນຮ່ວມມືກັນ ເພື່ອສ້າງເງື່ອນໄຂອຳນວຍຄວາມສະດວກໃຫ້ແກ່ ການພັດທະນາເສດຖະກິດ-ສັງຄົມ ຂອງບັນດາປະເທດຕ່າງໆໃນພາກພື້ນອາ ຊຽນ ກໍຄື ໃນໂລກ.
ກອງປະຊຸມຄັ້ງນີ້ ຈະເປັນເວທີແຫ່ງຄວາມສາມັກຄີ, ມິດຕະພາບ ແລະ ການປຶກສາຫາລື ເພື່ອຮ່ວມມືກັນຊອກຫາວິທີທາງແກ້ໄຂບັນຫາດັ່ງກ່າວ ໃຫ້ມີປະສິດທິຜົນສູງກວ່າເກົ່າ.
