ອັດຕະປື ອະນຸມັດ ບໍລິສັດກໍ່ສ້າງຂົວທາງ ສໍາຫລວດການຟື້ນຟູປ່າໄມ້ 100 ເຮັກຕາ ຢູ່ເມືອງສະໜາມໄຊ
ວັນທີ 27 ທັນວາ 2024 ນີ້ ພະແນກແຜນການ ແລະ ການລົງທຶນ ແຂວງອັດຕະປື ເຊັນບົດບັນທຶກຄວາມເຂົ້າໃຈ ກັບ ບໍລິສັດ ກໍ່ສ້າງຂົວທາງ ແລະສ້ອມແປງເຄຫະສະຖານຈຳກັດຜູ້ດຽວ ເພື່ອສຶກສາສຳຫລວດຄວາມເປັນໄປໄດ້ໃນການປູກໄມ້ອຸດສະຫະກຳ ແລະ ໄມ້ໃຫ້ໝາກຢູ່ເມືອງສະໜາມໄຊ ເຂົ້າຮ່ວມໃນພິທີໂດຍມີ ທ່ານ ທະນູໄຊ ບັນຊາລິດ ຮອງເຈົ້າແຂວງອັດຕະປື, ມີພະແນກການອ້ອມຂ້າງແຂວງ, ເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ການສຶກສາສຳຫລວດຄວາມເປັນໄປໄດ້ໃນການຟື້ນຟູປ່າໄມ້ດ້ວຍການປູກໄມ້ອຸດສະຫະກຳ ແລະ ໄມ້ໃຫ້ໝາກໃນເນື້ອທີ່ 100 ເຮັກຕາ ຢູ່ເຂດບ້ານພອນມະນີ ເມືອງສະໜາມໄຊ ຝ່າຍອົງການປົກຄອງ ແຂວງອັດຕະປືມີຈຸດປະສົງຢາກ ພັດທະນາເສດຖະກິດ ແລະ ເພື່ອສົ່ງເສີມການພັດທະນາວຽກງານກະສິກຳ ຢູ່ແຂວງອັດຕະປື ໃຫ້ມີການເຕີບໃຫຍ່ຂະຫຍາຍຕົວຂຶ້ນໄປເລື້ອຍໆ, ສຳລັບຝ່າຍບໍລິສັດ ມີຈຸດປະສົງທີ່ຈະພັດທະນາໂຄງການໃຫ້ມີການຂະຫຍາຍໂຕ ເຊິ່ງກິດຈະການ ດັ່ງກ່າວຈະເປັນການສ້າງວຽກເຮັດງານທຳໃຫ້ປະຊາຊົນ ຢູ່ເຂດ ບ້ານພອນມະນີ ກໍຄືປະຊາຊົນຊາວເມືອງ ສະໜາມໄຊ ແລະ ທັງສາມາດສ້າງລາຍຮັບໃຫ້ແກ່ພາກລັດ ໄດ້ອີກທາງໜຶ່ງ.
ທີ່ມາ: ຂ່າວສານອອນລາຍ ອັດຕະປື
