ອາເມລິກາລາຕິນ-ກາລິບຽນເປັນພາກພື້ນ ທີ່ກະທຳຮຸນແຮງຕໍ່ແມ່ຍິງ ຫລາຍທີ່ສຸດໃນໂລກ
ສະຫະປະຊາຊາດເປີດເຜີຍໃນວັນທີ 22 ພະຈິກວ່າ: ອາເມລິກາລາຕິນ ແລະ ກາລິບຽນ ເປັນສອງພາກພື້ນທີ່ມີການກະທຳຮຸນແຮງຕໍ່ແມ່ຍິງຫລາຍທີ່ສຸດໃນໂລກ ໂດຍສະເພາະໃນດິນແດນອາເມລິກາກາງ ແລະ ແມັກຊິກ.
UNWOMEN ແລະ ໂຄງການພັດທະນາຂອງສະຫະປະຊາຊາດ ຫລື UNDP ເຜີຍແຜ່ລາຍງານໃນວັນທີ 22 ພະຈິກວ່າ: ພົບການທຳຮ້າຍແມ່ຍິງເກີດຂຶ້ນຢ່າງຕໍ່ເນື່ອງໃນພາກພື້ນດັ່ງກ່າວ ເຖິງວ່າຈະມີກົດໝາຍທີ່ມີບົດລົງໂທດຮຸນແຮງເພື່ອຄວບຄຸມບັນຫາດັ່ງກ່າວ. ຫົວໜ້າໜ່ວຍງານດ້ານເພດຂອງ UNDP ໃນອາເມລິກາລາຕິນ ກ່າວວ່າ: ບັນຫາເລື່ອງຄວາມຮຸນແຮງຕໍ່ແມ່ຍິງຢູ່ອາເມລິກາລາຕິນຖືວ່າວິກິດ ເນື່ອງຈາກເປັນພາກພື້ນທີ່ມີການກະທຳຮຸນແຮງຕໍ່ແມ່ຍິງຫລາຍທີ່ສຸດໃນໂລກ, ອັດຕາຄວາມຮຸນແຮງທາງເພດຕໍ່ແມ່ຍິງທີ່ບໍ່ໄດ້ເປັນພັນລະຍາຖືວ່າສູງທີ່ສຸດໃນໂລກ ແລະ ອັດຕາການໃຊ້ຄວາມຮຸນແຮງທາງເພດຕໍ່ແມ່ຍິງທີ່ເປັນພັນລະຍາສູງເປັນອັນດັບ 2 ຂອງໂລກ. ນອກຈາກນັ້ນ ປະເທດ 3 ໃນ 10 ປະເທດທີ່ມີອັດຕາການຂົ່ມຂືນແມ່ຍິງ ແລະ ເດັກຫລາຍທີ່ສຸດເປັນປະເທດທີ່ຢູ່ໃນບໍລິເວນທະເລກາລິບຽນ, ການສັງຫານແມ່ຍິງເກີດຂຶ້ນໃນລະດັບທີ່ໜ້າຕົກໃຈຢູ່ອາເມລິກາກາງ 2 ໃນ 3 ຂອງແມ່ຍິງທີ່ຖືກຄາດຕະກຳມີສາເຫດມາຈາກເພດກົງກັນຂ້າມ. ຢູ່ຮົງດູຣັດ, ກົວເຕມາລາ ແລະ ແມັກຊິກ ຖືເປັນພື້ນທີ່ອັນຕະລາຍທີ່ສຸດສຳລັບແມ່ຍິງ ໂດຍບໍ່ນັບພື້ນທີ່ສົງຄາມ ເນື່ອງຈາກມີກຸ່ມອາດຊະຍາກຳ ແລະ ກຸ່ມຄ້າຢາເສບຕິດຫລາຍ. ລາຍງານຂອງສະຫະປະຊາຊາດຍັງກ່າວວ່າ: 24 ປະເທດໃນ 33 ປະເທດອາເມລິກາລາຕິນ ແລະ ກາລິບຽນ ມີກົດໝາຍປ້ອງກັນການກະທຳຮຸນແຮງໃນຄອບຄົວ, ແຕ່ມີພຽງ 9 ປະເທດເທົ່ານັ້ນ ທີ່ໃຫ້ຄວາມເຫັນພ້ອມກົດໝາຍທີ່ກ່ຽວກັບການກະທຳຮຸນແຮງຕໍ່ແມ່ຍິງໃນຮູບແບບອື່ນໆໃນສະຖານທີ່ສາທາລະນະ ຫລື ສ່ວນຕົວ.
