ສຶກສາອົບຮົມຊາຍໜຸ່ມກໍ່ເຫດທຳຮ້າຍຮ່າງກາຍແມ່ຍິງ ຢູ່ບຸນກິນຈຽງແຂວງຊຽງຂວາງ

ວັນທີ 8 ມັງກອນ 2025 ນີ້ ພັທ ວົງພອນ ຟອງພັກດີ ຮອງຫົວໜ້າພະແນກຕໍາຫລວດ ສືບສອນ ສອບສວນ ກອງບັນຊາກອງປ້ອງກັນຄວາມສະຫງົບ ແຂວງຊຽງຂວາງ ໄດ້ຊີ້ແຈງກ່ຽວກັບກໍລະນີການກະທໍາ ທໍາຮ້າຍຮ່າງກາຍ ຢູ່ບຸນປະເພນີກິນຈຽງ ຂອງຊົນເຜົ່າມົ້ງ ຢູ່ບ້ານຍວນ ເມືອງແປກ ແຂວງຊຽງຂວາງ ວ່າ: ຕໍ່ກັບເຫດການທີ່ເກີດຂຶ້້ນດັ່ງກ່າວ ຜູ້ກະທໍາຜິດແມ່ນໄດ້ຍອມຮັບ ແລະ ຂໍໂທດຕໍ່ຜູ້ເສຍຫາຍ ແລະ ສັງຄົມ.

ເຫດການລົງມືທໍາຮ້າຍຮ່າງກາຍໃນຄັ້ງນີ້ ສາເຫດແມ່ນຄວາມຫຶງຫວງ, ຄວາມມັກຮັກ ທີ່ເຫັນແຟນສາວຂອງຕົນເອງ ໄປນໍາຄົນອື່ນ ແລະ ຍ້ອນຄວາມຮູ້ເທົ່າບໍ່ເຖິງການ ຈຶ່ງເກີດມີອາລົມໂມໂຫ ໂດຍບໍ່ຄໍານຶງເຖິງການກະທໍາ ຈຶ່ງໄດ້ລົງມືກະທໍາຜິດລົງໄປ, ຮູບການດໍາເນີນເຫັນວ່າ ການກະທໍາຂອງຜູ້ກ່ຽວ ເປັນການກະທໍາຜິດຕໍ່ລະບຽບກົດໝາຍ ໃນມາດຕາ 194 ຂອງປະມວນກົດໝາຍອາຍາ ສະບັບປັບປຸງ 2017, ແຕ່ການກະທໍາດັ່ງກ່າວ ເປັນການກະທໍາຜິດຂອງເດັກ ເຈົ້າໜ້າຈຶ່ງໄດ້ອີງໃສ່ຄະດີເດັກ ດ້ວຍຮູບການສຶກສາອົບຮົມ ແລະ ມອບໃຫ້ຜູ້ປົກຄອງສຶກສາອົບຮົມ ເພື່ອເຮັດໃຫ້ຜູ້ກ່ຽວເປັນພົນລະເມືອງດີຢູ່ໃນສັງຄົມ ແລະ ປົວແປງຈິດໃຈໃຫ້ຜູ້ກໍລະນີ ດ້ວຍຄວາມເໝາະສົມ.

ທີ່ມາ: ປກສ ແຂວງຊຽງຂວາງ