ລາວ – ຫວຽດນາມ ເປີດທຸລະກຳການເງິນ ແລະ ການຊຳລະຂ້າມສະກຸນ ດ້ວຍລະບົບ QR Code

ວັນທີ 9 ມັງກອນ 2025 ທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ຟ່າມ ມິງຈິງ, ນາຍົກລັດຖະມົນຕີ ແຫ່ງ ສາ ຫວຽດນາມ ໄດ້ເຂົ້າຮ່ວມເປັນສັກຂີພິຍານໃນພິທີເປີດໃຫ້ບໍລິການທຸລະກຳເງິນຕາຂ້າມສະກຸນ ແລະ ການເຊື່ອມຕໍ່ລະບົບຊຳລະຍ່ອຍຂ້າມແດນໃນຮູບແບບQR Code ລະຫວ່າງ ສປປ ລາວ ກັບ ສາ ຫວຽດນາມ ໃນກອງປະຊຸມຄັ້ງທີ 47 ( JC47)ຂອງຄະນະ ກຳມາທິການຮ່ວມມື ທະວິພາຄີ ລະຫວ່າງ ສປປ ລາວ ແລະ ສສ ຫວຽດນາມປະຈຳປີ 2025 ທີ່ນະຄອນຫລວງວຽງຈັນ ຊຶ່ງເປັນຂີດໝາຍສຳຄັນໃນການຮ່ວມມືລະຫວ່າງສອງປະເທດ ເພື່ອຊຸກຍູ້ສົ່ງເສີມການຮ່ວມມືດ້ານເສດຖະກິດ, ການຄ້າ ແລະ ການລົງທຶນລະຫວ່າງສອງປະເທດ.

ນີ້ເປັນການປະຕິບັດຕາມທິດຊີ້ນຳຂອງການນຳຂັ້ນສູງຂອງສອງປະເທດ, ທະນາຄານແຫ່ງ ສປປ ລາວ ແລະ ທະນາຄານແຫ່ງລັດຫວຽດນາມ ໄດ້ຮ່ວມກັນຄົ້ນຄວ້າກ່ຽວກັບການສົ່ງເສີມການນໍາໃຊ້ສະກຸນເງິນທ້ອງຖິ່ນ ຫລື ສະກຸນເງິນຂອງສອງປະເທດ ແຕ່ທ້າຍປີ 2023 ເພື່ອສົ່ງເສີມການນໍາໃຊ້ເງິນ ກີບ-ດົງ ດ້ວຍການເພີ່ມທາງເລືອກໃຫ້ວິສາຫະກິດຂອງທັງສອງປະເທດ ມີທາງເລືອກໃນການນໍາໃຊ້ສະກຸນເງິນຂອງຕົນ ໃນການຊໍາລະ ລະຫວ່າງກັນເພີ່ມຂຶ້ນ ແລະ ທັງເປັນການຫລຸດຜ່ອນຄວາມກົດດັນດ້ານຄວາມຕ້ອງການເງິນຕາຕ່າງປະເທດ ທີ່ກະທົບຕໍ່ຄັງສຳຮອງເງິນຕາຕ່າງປະ ເທດຂອງສອງປະເທດ. ການໃຫ້ບໍລິການໃນຄັ້ງນີ້ ໄດ້ຈັດຕັ້ງດຳເນີນງານຢູ່ 2 ໂຄງການ ຄື:

1. ໂຄງການສົ່ງເສີມການນຳໃຊ້ສະກຸນເງິນທ້ອງຖິ່ນ ເພື່ອຊຳລະ ການຄ້າ, ການລົງທຶນ ແລະ ການກູ້ຢືມ ໃຫ້ແກ່ພາກການຄ້າ ແລະ ການລົງທຶນ ລະຫວ່າງກັນ.

2. ໂຄງການເຊື່ອມຕໍ່ການຊຳລະຍ່ອຍຂ້າມແດນໃນຮູບແບບ QR Code ເພື່ອຮອງຮັບການຊໍາລະຄ່າສິນຄ້າ ແລະ ບໍລິການ ໂດຍນໍາໃຊ້ສະກຸນເງິນທ້ອງຖິ່ນ ກີບ-ດົງ ໃນການຊຸກຍູ້ສົ່ງເສີມການທ່ອງທ່ຽວຂອງສອງປະເທດ. ການເປີດໃຫ້ບໍລິການໃນໄລຍະເບື້ອງຕົ້ນນີ້ແມ່ນມີພຽງ ສສ. ຫວຽດນາມ ສາມາດມາຊຳລະຜ່ານ QR ສປປ ລາວ ໄດ້, ສ່ວນ ສປປ ລາວ ຈະນໍາໃຊ້ລະບົບຊໍາລະຜ່ານ QR ຢູ່ທີ່ ສສ ຫວຽດນາມ ໄດ້ນັ້ນແມ່ນຢູ່ໃນໄລຍະທີ່ສອງ ຄາດວ່າຈະຢູ່ໃນທ້າຍປີນີ້.