ເຈົ້າໜ້າທີ່ເຕືອນໃຫ້ມີສະຕິຕໍ່ກຸ່ມເຄື່ອນໄຫວລັກລົດຈັກ
ເມື່ອທ້າຍອາທິດຜ່ານມານີ້, ທ່ານ ພັນຕີ ເກດສະໜາ ພິຈິດ ຮອງຫົວໜ້າພະແນກສືບສວນ-ສອບສວນ ປກສ ນະຄອນຫລວງວຽງຈັນ, ໄດ້ອອກມາເຕືອນໃຫ້ສັງຄົມມີຄວາມລະມັດລະວັງກຸ່ມຄົນບໍ່ດີເຄື່ອນໄຫວຂີ້ລັກງັດແງະຕ່າງໆ, ໂດຍສະເພາະແມ່ນພວກມືກາວລັກລົດຈັກ, ຊຶ່ງນັບແຕ່ຕົ້ນປີມານີ້, ໂດຍສະເລ່ຍແຕ່ລະອາທິດຈະມີກໍລະນີລົດຈັກເສຍຫາຍແຕ່ 5-10 ກໍລະນີ ແລະ ລ່າສຸດ ເມື່ອເດືອນ ສິງຫາຜ່ານມາ, ເຈົ້າໜ້າທີ່ສືບສວນ-ສອບສວນ ໄດ້ກັກຕົວເປົ້າໝາຍລັກຊັບພົນລະເມືອງ 2 ຄົນຄື: ທ້າວ ພານຸກອນ ອາຍຸ 27 ປີ ແລະ ທ້າວ ອານຸລັກ ອາຍຸ 18 ປີ ທັງສອງຢູ່ບ້ານ ດອນຕິ້ວ ເມືອງ ໄຊທານີ, ນະຄອນຫລວງວຽງຈັນ ພ້ອມຂອງກາງລົດຈັກ 2 ຄັນ ແລະ ອຸປະກອນທີ່ນຳໃຊ້ເຂົ້າໃນການກໍ່ເຫດມາດຳເນີນຄະດີ.
ຜ່ານການສືບສວນ-ສອບສວນ ທັງສອງຄົນໄດ້ຮັບສາລະພາບວ່າ: ນັບແຕ່ກາງປີມານີ້ ພວກຕົນໄດ້ຮ່ວມກັນລັກລົດຈັກຢູ່ ນະຄອນຫລວງວຽງຈັນ ມາແລ້ວ 15 ຄັນ, ເພື່ອນໍາໄປຂາຍໃຫ້ປະຊາຊົນ ຢູ່ບ້ານ ໄຊສະຫວ່າງ ເມືອງ ໄຊທານີ ຊຶ່ງເຈົ້າໜ້າທີ່ໃຫ້ຮູ້ວ່າ: ສາເຫດທີ່ພວກກ່ຽວເຄື່ອນໄຫວລັກຊັບຍ້ອນ ພົວພັນກັບສິ່ງເສບຕິດ, ຫລີ້ນກິນຟຸມເຟືອຍ, ສ່ວນໜຶ່ງກໍຍ້ອນເຈົ້າຂອງລົດຂາດສະຕິໃນການຮັກສາຊັບສິນຂອງຕົນເຊັ່ນ: ບໍ່ມີຄອກລົດ, ປະລົດໄວ້ຢູ່ໜ້າເຮືອນ, ໜ້າຫ້ອງເຮັດວຽກ ເກີດຊ່ອງຫວ່າງ ແລະ ເປັນເງື່ອນໄຂໃຫ້ຄົນຮ້າຍລັກເອົາໄປໄດ້ງ່າຍ, ດັ່ງນັ້ນ ຈຶ່ງຮຽກຮ້ອງມາຍັງ ປະຊາຊົນມີສະຕິລະວັງຕົວຮັກສາຊັບສິນຂອງຕົນໃຫ້ດີ.
+ ຕໍາຫລວດເມືອງສິງມ້າງແກ້ງລັກລົດຈັກ
