ເມືອງໄຊບູລີ ເກັບກູ້ອາວຸດປືນລ່າສັດປ່າ ຢູ່ 16 ບ້ານ ໄດ້ທັງໝົດ 82 ກະບອກ, ວັດຖຸລະເບີດ ແລະ ໝໍ້ຊັອດໄຟຟ້າ
ວິທະຍຸກະຈາຍສຽງ ແຂວງສະຫວັນນະເຂດ ລາຍງານວ່າ:ວັນທີ 12 ມັງກອນ 2025 ທ່ານ ອ່ອນລໍາພັນ ບົວສີແກ້ວ ເຈົ້າເມືອງໄຊບູລີ ທັງເປັນປະທານປ້ອງກັນຊາດປ້ອງກັນຄວາມສະຫງົບຂັ້ນເມືອງ ໄດ້ໃຫ້ສໍາພາດຕໍ່ຜູ້ສີ່ຂ່າວເມືອງໄຊບູລີ ວ່າ: ຜ່ານການຈັດຕັ້ງປະຕິບັດການເຄື່ອນໄຫວການຈັດຕັ້ງປະຕິບັດວຽກງານເກັບກູ້ອາວຸດປືນເສິກ, ປືນລ່າເນື້ອ ແລະ ວັດຖຸລະເບີດ ຢູ່ເມືອງໄຊບູລີ ໃນທ້າຍປີ 2024 ຫາ ເດືອນ ມັງກອນ 2025 ສາມາດເກັບກູ້ອາວຸດປືນ ໄດ້ທັງໝົດ 82 ກະບອກ.
ໃນນີ້, ປະເພດປືນແກັບ 58 ກະບອກ, ປືນອັດລົມ 10 ກະບອກ, ປືນລູກຊອງ 1 ກະບອກ ພ້ອມລູກກະສູນ 1 ລູກ, ປືນເສິກ ( CKC) 1 ກະບອກ, ປືນສັ້ນ 5 ກະບອກ, ປືນ AK ຈຳນວນ 2 ກະບອກ, ປືນ K59 ຈໍານວນ 2 ກະບອກ ພ້ອມດ້ວຍ ລູກປືນ 16 ລູກ, ປືນ 7.65 ຈໍານວນ 1 ກະບອກ ພ້ອມລູກ 7 ລູກ, ປືນ T77 ມີ 2 ກະບອກ ພ້ອມລູກ 21 ລູກ ແລະ ໜໍ້ຊັອດໄຟຟ້າ ( ສັດນໍ້າ) 3 ໜ່ວຍ, ວັດຖຸລະເບີດ M 18 1 ໜ່ວຍ, ໝາກແຕກລົມ 2 ໜ່ວຍ.
ຈໍານວນກຸ່ມ ທີ່ເກັບກູ້ອາວຸດປືນເສິກ, ປືນລ່າເນື້ອ ແລະ ວັດຖຸລະເບີດ ຢູ່ 16 ບ້ານ ຂອງເມືອງ ໄຊຍະບູລີ ແຂວງໄຊຍະບູລີ ແລະ ຍັງຢູ່ໃນຂັ້ນຕອນຈັດຕັ້ງປະຕິບັດແຕ່ບໍ່ທັນສໍາເລັດ ມີ 36 ບ້ານ ເຊິ່ງພາກສ່ວນທີ່ກ່ຽວຂ້ອງ ພວມເອົາໃຈເກັບກູ້ ແລະ ຈະສືບຕໍ່ ຈົນກວ່າຈະສໍາເລັດຕາມແຜນການທີ່ວາງໄວ້.
ທີ່ມາ: ວິທະຍຸກະຈາຍສຽງ ສະຫວັນນະເຂດ
