TikTok ຢູ່ອາເມລິກາ ກັບມາໃຊ້ງານໄດ້ອີກຄັ້ງ ຕາມຄໍາສັ່ງຂອງທ່ານ ທຣໍາ ທີ່ໄດ້ສັນຍາໄວ້

ແພັດຟອມ TikTok ກັບມາໃຫ້ບໍລິການແກ່ຜູ້ໃຊ້ໃນສະຫະລັດອາເມລິກາອີກເທື່ອໃໝ່ ຫລັງຈາກຖືກແບນໄປປະມານ 12 ຊົ່ວໂມງ, ພາຍຫລັງ ທ່ານ ໂດນັນ ທຣໍາ ປະທານາທິບໍດີຄົນໃໝ່ ໃຫ້ຄໍາໝັ້ນສັນຍາໃນການແກ້ໄຂບັນຫາ ເພື່ອໃຫ້ TikTok ຍັງສາມາດໃຊ້ງານໄດ້ໃນສະຫະລັດອາເມລິກາຕໍ່ໄປ.

ທ່ານ ໂດນັນ ທຣໍາ ໄດ້ໂພສຂໍ້ຄວາມໃນສື່ Truth Social ໂດຍລະບຸວ່າ ຈະອອກຄຳສັ່ງໃຫ້ຝ່າຍບໍລິຫານສະບັບໜຶ່ງ ເພື່ອໃຫ້ແພັດຟອມ TikTok ຂອງບໍລິສັດ ໄບແດນ ໃນຈີນສາມາດດໍາເນີນງານຕໍ່ໄດ້ໃນສະຫະລັດອາເມລິກາ ເມື່ອສາບານຕົນຮັບຕໍາແໜ່ງໃນມື້ນີ້.

ແນວໃດກໍຕາມລາຍງານຈາກ cbsnews ລະບຸວ່າ ແອັບພິເຄຊັ່ນ TikTok ຍັງບໍ່ສາມາດກັບມາໃຫ້ດາວໂຫລດໄດ້ໃນ App Store/ Play Store ເຊິ່ງກໍາລັງຢູ່ໃນຂະບວນການກັບຄືນເຂົ້າສູ່ການບໍລິການໃຫ້ເຂົ້າເຖິງຜູ້ໃຊ້ງານ ຫລັງຈາກການປະກາດຂອງທ່ານ ໂດນັລ ທຣໍາ ວ່າຈະພະຍາຍາມລະງັບຄໍາສັ່ງບໍລິຫານໃນມື້ທໍາອິດທີ່ຂຶ້ນຮັບຕໍາແໜ່ງ.