ລາລີກາກຽມໃຊ້ວີເອອາຣ໌ ຫລັງກໍລະນີລູກຍິງ ເມສຊີ
ຂາເບຍຣ໌ ເຕບາສ ປະທານລາລີກາ ຫວັງໃຊ້ເຕັກໂນໂລຊີວີດີໂອຊ່ວຍຕັດສິນໃນລະດູການໜ້າ ເພື່ອຫລີກເວັ້ນກໍລະນີລູກຍິງຂອງ ລີໂອເນລ ເມສຊີ ດາວເດັ່ນຂອງ ບາເຊໂລນາ ບໍ່ໄດ້ປະຕູເກີດຂຶ້ນອີກ.
ໃນການແຂ່ງຂັນທີ່ ບາເຊໂລນາ ສະເໝີ ບາເລນເຊຍ 1-1 ໃນວັນທີ 26 ພະຈິກ ເກີດເຫດການທີ່ເຫລືອເຊື່ອຂຶ້ນເມື່ອ ເມສຊີ ຍິງໄປຕົງຕົວ ເນໂຕ້ ຜູ້ຮັກສາປະຕູ ບາເລນເຊຍ ເຊິ່ງຈັບບານພາດຈົນບານລອດຫວ່າງຂາຂ້າມເສັ້ນປະຕູເຂົ້າໄປແລ້ວ ກ່ອນທີ່ ເນໂຕ້ ຈະຟ້າວປັດບານອອກມາ ແລະ ຜູ້ຕັດສິນບໍ່ໄດ້ເປົ່າໃຫ້ເປັນປະຕູຂອງ ບາເຊໂລນາ ແຕ່ຢ່າງໃດ.
ຫລ້າສຸດ ເຕບາສ ຫວັງວ່າເຫດການແບບນີ້ຈະບໍ່ເກີດຂຶ້ນອີກໃນອະນາຄົດ ແລະ ເຊື່ອວ່າການນຳເອົາວີເອອາຣ໌ມາໃຊ້ຈະຊ່ວຍແກ້ໄຂບັນຫາໄດ້ຢ່າງແນ່ນອນ.
“ປະຕູນີ້ເຫັນກັນທົ່ວປະເທດສະເປນ ແລະ ທົ່ວໂລກ, ຖ້າຂ້າພະເຈົ້າບອກວ່າມັນບໍ່ເປັນປະຕູ ພວກທ່ານອາດເວົ້າວ່າຂ້າພະເຈົ້າຕາບອດແນ່ນອນ ແລະ ຂ້າພະເຈົ້າຫວັງວ່າໃນລະດູການໜ້າ ໂດຍການໃຊ້ວີເອອາຣ໌ຈະສາມາດແກ້ໄຂບັນຫາແບບນີ້ໄດ້” ເຕບາສ ກ່າວ.
