ສາເຫດປະລະການຮຽນຂອງນັກຮຽນໃນສາຍສາມັນ ຢູ່ແຂວງອັດຕະປື

ທ່ານ ອຸດົມສິນ ສີຊານົນ ຫົວໜ້າພະແນກສຶກສາທິການ ແລະ ກິລາ ແຂວງອັດຕະປື ໄດ້ຕອບຄໍາຊັກຖາມຂອງບັນດາສະມາຊິກສະພາປະຊາຊົນແຂວງ ກ່ຽວກັບການແກ້ໄຂການປະລະການຮຽນຂອງນັກຮຽນໃນສາຍສາມັນ ໃນຊັ້ນຮຽນຕ່າງຢູ່ພາຍໃນແຂວງ ໃນວາລະການດໍາເນີນກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງອັດຕະປື ຊຸດທີ II ໃນວັນທີ 23 ມັງກອນ 2025 ວ່າ: ຜ່ານການຄົ້ນຄວ້າຂອງຄະນະຜູ້ບໍລິຫານການສຶກສາຂອງແຂວງແລ້ວເຫັນວ່າ ມີ 5 ສາເຫດຕົ້ນຕໍ ທີ່ເປັນສາເຫດຫລັກໃນການປະລະການຮຽນຂອງນັກຮຽນໃນສາຍສາມັນ ຢູ່ແຂວງອັດຕະປື ຄື:
1. ສະຖານການສຶກສາ ມ ຕົ້ນ ແລະ ມ ປາຍ ບໍ່ສາມາດຕອບສະໜອງໄດ້ໃນທຸກກຸ່ມບ້ານ ເນື່ອງຈາກພື້ນຖານໂຄງລ່າງດ້ານການສຶກສາມີຈຳກັດ, ຈໍານວນນັກຮຽນໃນເຂດບໍລິການຂອງກຸ່ມບ້ານມີໜ້ອຍ ແລະ ຄູສອນບໍ່ພຽງພໍ ບໍ່ສາມາດຈະເປີດການຮຽນ-ການສອນ ໃນຊັ້ນ ມ.ຕົ້ນ ແລະ ມ.ປາຍໄດ້, ຈຶ່ງເຮັດໃຫ້ເກີດຄວາມບໍ່ສະດວກໃນການເຂົ້າຮຽນໃນກຸ່ມບ້ານຂອງນັກຮຽນຈໍານວນໜຶ່ງ.
2. ບ້ານຫ່າງໄກໂຮງຮຽນ ບໍ່ສາມາດທຽວຮຽນ ເຊົ້າ-ແລງໄດ້ ເນື່ອງຈາດການຕັ້ງບ້ານເຮືອນຂອງພໍ່ແມ່ ແຈກຢາຍຕາມພື້ນທີ່ການຜະລິດ, ການຂາຍແຮງງານເຄື່ອນທີ່ຕາມນິຄົມການຜະລິດຂອງພໍ່ແມ່ ຫລື ຜູ້ປົກຄອງ ບໍ່ສາມາດສົ່ງລູກເຂົ້າຮຽນໃນໂຮງຮຽນໄດ້ຢ່າງປົກກະຕິ;
3. ເສດຖະກິດບາງຄອບຄົວຂາດເຂີນ ບໍ່ມີເງິນໃຊ້ຈ່າຍພຽງພໍຄ່າສິ້ນເປືອງໃຫ້ລູກທຽວຮຽນໃນແຕ່ລະວັນ ຈຳເປັນໃຫ້ລູກອອກໂຮງຮຽນໄປຂາຍແຮງງານ ເພື່ອຫາເງິນລ້ຽງຊີບ;
4. ຄວາມຕັດສິນໃຈຂອງຕົວນັກຮຽນເອງ ສາມາດຊອກທາງເລືອກອອກຂາຍແຮງງານຕາມນິຄົມການຜະລິດຂອງນັກລົງທຶນພາຍໃນ-ຕ່າງປະເທດ ແລະ ອື່ນໆ ເພື່ອລ້ຽງຊີບຕາມຄວາມສະໝັກໃຈຂອງຕົນເອງ.
5. ຂາດແຮງຈູງໃຈໃນການສືບຕໍ່ການຮຽນໃຫ້ຈົບຊັ້ນ ມ.7 ແລະ ສືບຕໍ່ການຮຽນວິຊາສະເພາະ ຫລື ວິຊາຊີບ ເນື່ອງຈາກວ່າຫລາຍຄົນທີ່ຮຽນຈົບວິຊາສະເພາະມາແລ້ວ ກໍຍັງບໍ່ທັນມີວຽກເຮັດງານທໍາທີ່ໝັ້ນຄົງ ຍ້ອນຕະຫລາດແຮງງານມີຈໍາກັດ ຈຶ່ງເຮັດໃຫ້ແຮງຈູງໃຈໃນການຮຽນຂອງຮຸ່ນນ້ອງຫລຸດໜ້ອຍຖອຍລົງ.
ທ່ານ ອຸດົມສິນ ສີຊານົນ ຍັງໄດ້ຊີ້ແຈງຕື່ມວ່າ: ສໍາລັບທິດທາງແກ້ໄຂການປະລະການຮຽນຂອງນັກຮຽນໃນສາຍສາມັນ ຢູ່ແຂວງອັດຕະປື ໃນສະເພາະໜ້າ ແລະ ຍາວນານ ທາງຂະແໜງການສຶກສາໄດ້ກໍານົດໄວ້ ໂດຍສະເພາະ ເພີ່ມທະວີໃນການຂະຫຍາຍພື້ນຖານໂຄງລ່າງການສຶກສາ ມ ຕົ້ນ ແລະ ມ ປາຍ ໄປເຂດຊົນນະບົດ-ຫ່າງໄກ ທີ່ເປັນຈຸດສຸມກຸ່ມບ້ານ ພ້ອມກັບການໃຫ້ສິ່ງອໍານວຍຄວາມສະດວກ ດ້ານການພັກເຊົາຂອງນັກຮຽນບ້ານໄກ ເພື່ອສ້າງຄວາມສະດວກໃຫ້ຜູ້ຮຽນເຂົ້າເຖິງການສຶກສາໄດ້ງ່າຍຂຶ້ນ ເປັນຕົ້ນ ຂະຫຍາຍໂຮງຮຽນມັດທະຍົມຕົ້ນ ເປັນ ມສ ເຂດສະປວນ ເມືອງໄຊເສດຖາ, ເຂດບ້ານແບ່ງພູຄໍາ ເມືອງສາມັກຄີໄຊ, ເຂດບ້ານຈັນຕໍ່ ເມືອງສະໜາມໄຊ, ເຂດຊຳຫລວງ ເມືອງຊານໄຊ ແລະ ເຂດສົມບູນ ເມືອງພູວົງ. ພ້ອມນີ້, ລະດົມນັກຮຽນຜູ້ທຸກຍາກ-ດ້ອຍໂອກາດ ໃຫ້ເຂົ້າມາຮຽນໃນໂຮງຮຽນ ຊົນເຜົ່າແຂວງ, ໂຮງຮຽນຊົນເຜົ່າເຂດວັງຕັດ ເມືອງຊານໄຊ ແລະ ໂຮງຮຽນຊົນເຜົ່າເຂດສົມບູນ ເມືອງພູວົງ ໂດຍທີ່ລັດຖະບານ ຫລື ງົບປະມານຂອງແຂວງ ຊ່ວຍສະໜອງເງິນເບ້ຍລ້ຽງແກ່ນັກຮຽນຊົນເຜົ່າຜູ້ດ້ອຍໂອກາດ ໄດ້ເຂົ້າຮຽນໃນລະບົບລວມ ຄື: ກິນລວມ-ນອນລວມ ໃນອັດຕາເງິນເບ້ຍລ້ຽງ ທີ່ເໝາະສົມກັບເສດຖະກິດຕະຫລາດໃນປັດຈຸບັນ; ສົ່ງເສີມໃຫ້ຜູ້ດ້ອຍໂອກາດ ເຂົ້າຮັບການສຶກສາ ໃນລະບົບການສຶກສານອກໂຮງຮຽນ ຂອງບັນດາເມືອງ ທີ່ໄດ້ຈັດຕັ້ງປະຕິບັດການຮຽນ-ການສອນ ໃນແຕ່ລະສົກປີຮຽນ. ນອກຈາກນີ້, ສົ່ງເສີມໃຫ້ນັກຮຽນທີ່ຕົກຄ້າງ ເຂົ້າຮັບການອົບຮົມວິຊາຊີບໃນສູນຝຶກອົບຮົມຂອງພະນກແຮງງານ, ເຂົ້າຮຽນວິຊາຊີບ ທີ່ໂຮງຮຽນເຕັກນິກວິຊາຊີບແບບປະສົມຂອງແຂວງ ໂດຍສະເພາະ ນັກຮຽນທີ່ບໍ່ມີຄວາມສາມາດຮຽນຕໍ່ລະດັບ ມໍປາຍ ຫລື ປະລິນຍາຕີ.
ທີ່ມາ: ຂ່າວສານອອນລາຍ ອັດຕະປື