ເອຟເວີຕັນ ກຽມຕັ້ງ ບິກແຊມ ຜູ້ຈັດການທີມຄົນໃໝ່
ເອຟເວີຕັນ ຍອມໃຫ້ ບິກແຊມ ເຊັນ 2 ປີເຄິ່ງເປັນຜູ້ຈັດການທີມຄົນໃໝ່ ໂດຍຄ່າຈ້າງອາທິດລະ 1 ແສນປອນ.
ແຊມ ອັລລາໄດ ອະດີດຜູ້ຈັດການທີມຊາດອັງກິດ ຈະກາຍເປັນຜູ້ຈັດການທີມຄົນໃໝ່ຂອງ ເອຟເວີຕັນ ໂດຍເຊັນສັນຍາ 2 ປີເຄິ່ງ ມູນຄ່າລວມ 12 ລ້ານປອນ ຫລື ສະເລ່ຍອາທິດລະ 1 ແສນປອນ. ຕາມລາຍງານຈາກ ເດິ ຊັນ.
ກ່ອນໜ້ານີ້ ເອຟເວີຕັນ ໃຫ້ຂໍ້ສະເໜີຄຸມທີມພຽງຈົບລະດູການນີ້ ເຮັດໃຫ້ການເຈລະຈາລົ້ມເຫລວ, ແຕ່ຫລັງຈາກຫາໃຜບໍ່ໄດ້ ຟາຣ໌ຮັດ ໂມຊິຣີ ເຈົ້າຂອງທີມຕັດສິນໃຈກັບໄປເຈລະຈາ ບິກແຊມ ອີກຮອບ ຍອມໃຫ້ສັນຍາຍາວຕາມຕ້ອງການ, ແຕ່ບໍ່ມີເງິນໂບນັດ ຖ້າພາທີມຫລຸດພົ້ນການຕົກຊັ້ນໄດ້ສຳເລັດ.
ເອຟເວີຕັນ ພະຍາຍາມຕິດຕໍ່ທັງ ມາຣ໌ໂກ ຊິລວາ ຂອງວັດຟອຣ໌ດ, ດິເອໂກ ຊິເມໂອເນ ຂອງແອັດເລຕິໂກ ມາດຣິດ ລວມທັງ ຄາຣ໌ໂລ ອັນເຊລອດຕິ ແຕ່ລົ້ມເຫລວທັງໝົດ.
