10 ເດືອນພະແນກການເງິນແຂວງຊຽງຂວາງເກັບລາຍຮັບໄດ້ເກືອບ 80% ຂອງແຜນການປີ
ຫົວໜ້າພະແນກການເງິນແຂວງຊຽງຂວາງ ໃຫ້ຮູ້ວ່າ: ຊຽງຂວາງເປັນແຂວງຂາດດຸນທາງດ້ານງົບປະມານ, ສາມາດກຸ້ມຕົນເອງພຽງ 24-26% ຂອງແຜນລາຍຈ່າຍ, ລວມລາຍຈ່າຍພາກລົງທຶນຂອງລັດ ຜ່ານການຈັດຕັ້ງປະຕິບັດການຈັດເກັບລາຍຮັບເຂົ້າງົບປະມານ 10 ເດືອນ 2017 ບັນລຸໄດ້ພຽງ 78,5% ຂອງແຜນປີ, ໃນນີ້, ຮັບຈາກສ່ວຍສາອາກອນປະຕິບັດໄດ້ 89 ຕື້ກີບ, ລາຍຮັບຈາກຊັບສິນ ແລະ ຄຸ້ມຄອງວິສາຫະກິດໄດ້ 6,2 ຕື້ກີບລວມແລ້ວປະຕິບັດໄດ້ພຽງ 95 ຕື້ກວ່າກີບ, ຖ້າທຽບໃສ່ໄລຍະດຽວຂອງປີຜ່ານມາ ເພີ່ມຂຶ້ນ 14%.
ສ່ວນວຽກງານທົດລອງ 3 ສ້າງຂອງຂະແໜງການເງິນຜ່ານການຈັດຕັ້ງປະຕິບັດສາມາດຕີລາຄາໄດ້ເຊິ່ງນັບແຕ່ສູນກາງຮອດຂັ້ນຮາກຖານບ້ານໄດ້ແບ່ງຂັ້ນຄຸ້ມຄອງ,ເປັນແຜນສູ້ຊົນໃນການສ້າງລາຍຮັບເພື່ອເປັນການພັດທະນາພື້ນຖານໂຄງລ່າງຂອງທ້ອງຖິ່ນ, ສ້າງຄວາມເຂັ້ມແຂງເພິ່ງຕົນເອງ-ກຸ້ມຕົນເອງເທື່ອລະກ້າວ, ໃນການປະຕິບັດດັ່ງກ່າວກໍ່ແມ່ນມີຜົນດີ, ຖ້າທຽບໃສ່ລາຍຮັບກ່ອນທີ່ບໍ່ເຮັດ 3 ສ້າງເຫັນວ່າດີກ່ອນເກົ່າ. ທັງນີ້, ກໍ່ຍ້ອນການຊີ້ນໍາ-ນໍາພາຈາກອຳນາດການປົກຄອງແຂວງ, ການປະສານສົມທົບກັບບັນດາຂະແໜງການທີ່ກ່ຽວ ຂ້ອງ ແລະ ຂະແໜງ 3 ສາຍຕັ້ງກະຊວງການເງິນບວກຄວາມພະຍາຍາມເອົາໃຈໃສ່ຂອງອ້າຍນ້ອງພະນັກງານຂະແໜງການເງິນ, ໃນການຂຸດຄົ້ນໃນການຈັດເກັບລາຍຮັບເຂົ້າງົບປະມານແຫ່ງລັດ.
ປັດຈຸບັນແຂວງຊຽງຂວາງ ມີ 7 ເມືອງ. ໃນນັ້ນ, ມີເມືອງເຮັດທົດລອງ 3 ສ້າງ 3 ເມືອງປະກອບດ້ວຍ 6 ບ້ານຢູ່ຂັ້ນເມືອງມີພະນັກງານ 152 ສະຫາຍ, ຢູ່ຂັ້ນແຂວງມີພະນັກງານ 103 ຄົນ, ລວມແລ້ວທົ່ວແຂວງມີພະນັກງານການເງິນທັງໝົດ 255 ຄົນ, ພ້ອມນີ້ ຍັງໄດ້ຖືເອົາວຽກງານຄຸ້ມຄອງລາຍຈ່າຍເປັນຕົ້ນແມ່ນ: ການເບີກຈ່າຍເງິນເດືອນຖືເປັນບຸລິມະສິດ, ວາງມາດຕະການຄຸ້ມຄອງການເກັບລາຍຮັບ ແລະ ຄຸ້ມຄອງລາຍຈ່າຍ, ຕິດຕາມກວດກາໃນການຈັດຕັ້ງປະຕິບັດຂອງພະນັກງານ ແລະ ລົງກວດກາໄລ່ລຽງບັນດາຫົວໜ່ວຍທຸລະກິດ, ກວດກາຄືນຂອງຫ້ອງການກວດກາການເງິນຢ່າງເປັນປົກກະຕິ ແລະ ເດັດຂາດຖ້າມີການລະເມີດໃນການປະຕິບັດໜ້າທີ່ຂອງພະນັກງານການເງິນ ກໍໄດ້ເຂັ້ງວດປະຕິບັດຕາມວິໄນຂອງພະນັກງານການເງິນໂດຍເດັດຂາດ.
+ຮອງນາຍົກ ເຄື່ອນໄຫວຊີ້ນໍາວຽກງານເກັບລາຍຮັບ ຢູ່ແຂວງຈໍາປາສັກ ແລະ ແຂວງສະຫວັນນະເຂດ
