ທ່ານ ໂດນັນ ທຣໍາ ຢືນຢັນຈະຂຶ້ນພາສີນໍາເຂົ້າ ຈາກການາດາ, ແມັກຊິໂກ 25% ແລະ ຈີນ 10% ເລີ່ມມີຜົນບັງຄັບໃຊ້ 1 ກຸມພາ 2025
ສໍານັກຂ່າວຣອຍເຕີລາຍງານວັນທີ 31 ມັງກອນ 2025 : ໂຄສົກທໍານຽບຂາວເປີດເຜີຍວ່າ ປະທານາທິບໍດີ ໂດນັນ ທຣໍາ ຈະຈັດເກັບພາສີນໍາເຂົ້າສິນຄ້າຈາກການນາດາ ແລະ ແມັກຊີໂກ ໃນອັດຕາ 25% ແລະ ຈັດເກັບພາສີນໍາເຂົ້າສິນຄ້າຈາກຈີນ 10% ໂດຍຈະມີຜົນບັງຄັບໃຊ້ນັບແຕ່ວັນທີ 1 ກຸມພາ 2025 ເປັນຕົ້ນໄປ ເພື່ອແກ້ບັນຫາການໄຫລວຽນຂອງເຟນທານິນ, ບັນຫາຜູ້ອົບພະຍົບ ແລະ ການຂາດດຸນການຄ້າ ເຊິ່ງເປັນໄປຕາມຄໍາໝັ້ນສັນຍາຂອງປະທານາທິບໍດີທີ່ເຄີຍໄດ້ກ່າວໄວ້.
ເຖິງຢ່າງໃດກໍຕາມສ່ວນນໍ້າມັນທີ່ນໍາເຂົ້າຈາກການາດາ, ທ່ານ ທຣໍາ ກ່າວວ່າ: ຈະເກັບພາສີໃນອັດຕາ 10% ໂດຍອາດມີຜົນບັງຄັບໃຊ້ໃນວັນທີ 18 ກຸມພາ.
ທາງດ້ານຫົວໜ້າຍຸດທະສາດການຕະຫລາດຂອງ Corpay Cross-Border Solutions ໃຫ້ຮູ້ວ່າ: ມາດຕະການປັບຂຶ້ນພາສີນຳເຂົ້າຂອງປະທານາທິບໍດີທຣໍາ ອາດເຮັດໃຫ້ພາສີຂອງຄົນອາເມລິກາ ເພີ່ມຂຶ້ນ 272,000 ລ້ານໂດລາຕໍ່ປີ ພ້ອມຍັງປະເມີນວ່າຈະເຮັດໃຫ້ຄົນອາເມລິກາຕ້ອງເສຍເງິນຫລາຍກວ່າ 2,600 ໂດລາຕໍ່ປີ ສໍາລັບແຕ່ລະຄົວເຮືອນ.
ກ່ອນໜ້ານີ້ ສໍານັກງານຂໍ້ມູນດ້ານພະລັງງານຂອງອາເມລິກາໄດ້ເປີດເຜີຍຂໍ້ມູນທີ່ລະບຸວ່າ ອາເມລິກາ ນໍາເຂົ້ານໍ້າມັນເກືອບ 4.6 ລ້ານຖັງ ຕໍ່ມື້ຈາກການາດາໃນເດືອນຕຸລາທີ່ຜ່ານມາ ແລະ ນໍາເຂົ້ານໍ້າມັນ 563,000 ຖັງຈາກແມັກຊີໂກ, ການຜະລິດນໍ້າມັນຂອງອາເມລິກາສະເລ່ຍເກືອບ 13.5 ລ້ານຖັງຕໍ່ມື້ໃນເດືອນດຽວ.
