ທະນາຄານກາງອິນເດຍຫລຸດດອກເບ້ຍຄັ້ງທໍາອິດໃນຮອບເກືອບ 5 ປີ ຮັບມືເສດຖະກິດຂະຫຍາຍຕົວຊ້າ

       ທະນາຄານກາງອິນເດຍຫລຸດອັດຕາດອກເບ້ຍນະໂຍບາຍເປັນຄັ້ງທໍາອິດນັບແຕ່ກາງປີ 2020 ທ່າມກາງສະຖານະການເສດຖະກິດຂະຫຍາຍຕົວຊ້າ.

       ທະນາຄານກາງອິນເດຍ (RBI) ອອກຖະແຫລງການກ່ຽວກັບການຫລຸດອັດຕາດອກເບ້ຍນະໂຍບາຍລົງ 0.25 ຈຸດ ເຫລືອຢູ່ 6.25% ໂດຍເປັນໄປຕາມຄວາມຄາດໝາຍຂອງບັນດານັກວິເຄາະ ແລະ ເປັນການຫລຸດອັດຕາດອກເບ້ຍນະໂຍບາຍຄັ້ງທໍາອິດຂອງອິນເດຍ ນັບແຕ່ເດືອນພຶດສະພາ 2020.

       ເຖິງຢ່າງໃດກໍຕາມ, ການຫລຸດອັດຕາດອກເບ້ຍເກີດຂຶ້ນໃນໄລຍະອັດຕາການເຕີບໃຫຍ່ຂອງລວມຍອດຜະລິດຕະພັນພາຍໃນ (GDP) ຂອງອິນເດຍ ເຊິ່ງມີຂະໜາດເສດຖະກິດໃຫຍ່ເປັນອັນດັບສາມຂອງທະວີບອາຊີຂະຫຍາຍຕົວຊ້າທີ່ສຸດໃນຮອບ 4 ປີ ຢູ່ລະດັບ 6.7%.

      ເຖິງວ່າອັດຕາການເຕີບໃຫຍ່ຂອງການລົງທຶນ ແລະ ຂະແໜງການບໍລິໂພກໃນເຂດເມືອງຂອງອິນເດຍ ຍັງຢູ່ໃນສະພາບອ່ອນແອ, ສ່ວນຜົນກໍາໄລຂອງບໍລິສັດຫລາຍແຫ່ງຫລຸດລົງໃນໄລຍະ 6 ເດືອນຕົ້ນປີຂອງປີງົບປະມານປັດຈຸບັນ, ແຕ່ບັນດານັກວິເຄາະເຊື່ອວ່າ: ອັດຕາເງິນເຟີ້ຫລຸດລົງ ເຊິ່ງຢູ່ລະດັບ 5.22% ໃນເດືອນທັນວາຜ່ານມາ ອຸປະສົງໃນຊົນນະບົດທີ່ເພີ່ມຂຶ້ນ ແລະ ຜົນຜະລິດທາງກະສິກໍາເຊິ່ງໃນພາບລວມຍັງເປັນໄປຕາມເປົ້າໝາຍຈະເປັນປັດໄຈຊ່ວຍສະໜັບສະໜູນການເຕີບໃຫຍ່ທາງເສດຖະກິດຂອງອິນເດຍ.