Boeing ກຽມເລີກຈ້າງພະນັກງານປະມານ 400 ຕໍາແໜ່ງ ພາຍຫລັງນາຊາເລື່ອນໂຄງການສົ່ງຈະຫລວດໄປດວງຈັນ
ໄບອິ້ງ (Boeing) ປະກາດໃນວັນທີ 8 ກຸມພາວ່າ: ຈະມີການປົດພະນັກງານໃນໂຄງການສົ່ງຈະຫລວດສູ່ດວງຈັນ Space Launch System ໂດຍຄາດວ່າຈະຫລຸດຕໍາແໜ່ງວຽກລົງປະມານ 400 ຕໍາແໜ່ງ ເນື່ອງຈາກການປັບປຸງໂຄງການອາຣ໌ເທມິສ (Artemis) ຂອງອົງການບໍລິຫານການບິນ ແລະ ອະວະກາດແຫ່ງຊາດ ຫລື ອົງການນາຊາ (NASA) ແລະ ການຄາດຄະເນກ່ຽວກັບຕົ້ນທຶນຂອງໂຄງການດັ່ງກ່າວ.
ສໍານັກຂ່າວຣອຍເຕີລາຍງານວ່າ: ໂບອິ້ງເຊິ່ງເປັນບໍລິສັດຜູ້ຜະລິດຍົນຈາກຊີແອດເທິລເປີດເຜີຍວ່າ: ຈະອອກໜັງສືແຈ້ງການເລີກຈ້າງທີ່ບໍ່ສະໝັກໃຈເປັນໄລຍະເວລາ 60 ວັນໃຫ້ພະນັກງານທີ່ໄດ້ຮັບຜົນກະທົບໃນອາທິດໜ້າ.
ໂຄສົກຂອງໂບອິ້ງລະບຸຜ່ານອີເມລວ່າ: ພວກເຮົາກໍາລັງເຮັດວຽກຮ່ວມກັບລູກຄ້າ ແລະ ຊອກຫາໂອກາດໃນການຍ້າຍພະນັກງານໄປຕໍາແໜ່ງອື່ນໆໃນບໍລິສັດເພື່ອຊ່ວຍຫລຸດການສູນເສຍຕໍາແໜ່ງງານ.
ໂຄງການອາຣ໌ເທມິສ ເຊິ່ງມີການປະເມີນຕົ້ນທຶນທໍ 9.3 ໝື່ນລ້ານໂດລາຈົນຮອດປີ 2025 ໄດ້ຮັບການຈັດຕັ້ງໂດຍນາຊາ ເຊິ່ງເປັນໜ່ວຍງານອະວະກາດຂອງອາເມລິກາໃນໄລຍະການບໍລິຫານງານສະໄໝທໍາອິດຂອງປະທານາທິບໍດີ ໂດນັລ ທຣໍາ ເຊິ່ງຖືເປັນຄວາມພະຍາຍາມຕົ້ນຕໍຂອງອາເມລິກາທີ່ຈະສົ່ງນັກບິນອະວະກາດກັບໄປດວງຈັນເປັນຄັ້ງທໍາອິດນັບແຕ່ໂຄງການອາພໍໂລ 17 (Apollo 17) ຂອງນາຊາ.
ເຖິງຢ່າງໃດກໍຕາມ, ໂຄງການດັ່ງກ່າວມີຄວາມຊັກຊ້າ ແລະ ຕົ້ນທຶນເພີ່ມຂຶ້ນຫລາຍ.
ໂຄງການ Artemis 2 ທີ່ເຄີຍມີແຜນສົ່ງຈະຫລວດພ້ອມຈຸບິນໄປບິນອ້ອມດວງຈັນໃນທ້າຍປີ 2024 ຕອນນີ້ໄດ້ເລື່ອນໄປເປັນເດືອນກັນຍາ 2025.
ສ່ວນໂຄງການ Artemis 3 ເຊິ່ງເປັນການລົງຈອດເທິງດວງຈັນຂອງນັກບິນອະວະກາດເປັນຄັ້ງທໍາອິດພາຍໃຕ້ໂຄງການນີ້ ຈະເກີດຂຶ້ນໃນເດືອນກັນຍາ 2026 ແທນທີ່ຈະເປັນທ້າຍປີ 2025 ຕາມທີ່ເຄີຍວາງແຜນໄວ້ກ່ອນໜ້ານີ້.
