ການຄ້າ ນວ ທໍາລາຍໝາກກະໂພກ, ບັ້ງໄຟດອກ ທີ່ລັກລອບນຳເຂົ້າ ແລະ ຈຳໜ່າຍມູນຄ່າເກືອບ 300 ລ້ານກີບ

ວັນທີ 7 ກຸມພາ 2025 ຜ່ານມານີ້ ພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ ໄດ້ທໍາລາຍໝາກກະໂພກ ແລະ ບັ້ງໄຟດອກ 576 ກວ່າກິໂລກຣາມ ໂດຍການເຂົ້າ ຮ່ວມຂອງທ່ານ ນາງ ວັນມະນີ ພິມມະສານ ຫົວໜ້າພະແນກອຸດສາຫະກຳ ແລະ ການຄ້າ ນວ, ພັທ ບົວລີ ກອງອຸເທນ ຫົວໜ້າພະແນກເຕັກນິກ ກອງພັນໃຫຍ່ 497 ພ້ອມດ້ວຍພາກສ່ວນກ່ຽວຂ້ອງ.

ທ່ານ ມະໂນສັກ ໄຊສິລິກຸນ ຮອງຫົວໜ້າຂະແໜງການຄ້າພາຍໃນ ລາຍງານວ່າ: ໃນໄລຍະບຸນປີໃໝ່ສາກົນ ປີໃໝ່ຊາວຈີນ ແລະ ຊາວຫວຽດນາມ ປີ 2025 ໄດ້ກວດກາບັນດາຮ້ານຄ້າ ແລະ ຕະຫລາດໃນນະຄອນຫລວງວຽງຈັນທັງໝົດ 24 ຕະຫລາດ ແລະ 166 ຮ້ານ. ພົບເຫັນການລັກລອບນຳເຂົ້າ ແລະ ຈຳໜ່າຍ ໝາກກະໂພກ ແລະ ບັ້ງໄຟດອກ ທີ່ເປັນສິນຄ້າເກືອດຫ້າມນໍາເຂົ້າ ແລະ ຈໍາໜ່າຍ ລວມນໍ້າໜັກທັງໝົດປະມານ 576.6 ກິໂລກຣາມ ຄິດເປັນມູນຄ່າ 295,040,000 ກີບ ພ້ອມທັງໄດ້ເຮັດບົດບັນທຶກກວດກາ ແລະ ຢຶດສິນຄ້າດັ່ງກ່າວຕາມລະບຽບການ.

ທີ່ມາ: ໜັງສືພິມ ວຽງຈັນໃໝ່