ຕໍາຫລວດໄທສະກັດຈັບຢາບ້າຂ້າມຊາດແຄມນໍ້າຂອງພ້ອມຂອງກາງຢາໄອ 658 ກິໂລກຣາມ ແລະ ຢາບ້າຫລາຍກວ່າ 1.1 ແສນເມັດ
ສໍານັກຂ່າວໄທລາຍງານວັນທີ 12 ກຸມພາ 2025 ເຈົ້າໜ້າທີ່ ໜ່ວຍງານສະກັດກັ້ນ ແລະ ປາບປາມຢາເສບຕິດປະເທດໄທ ຈັບກຸມຜູ້ຄ້າຢາເສບຕິດເຊິ່ງເປັນຄົນລາວ 3 ຄົນ ພ້ອມຂອງກາງ ຢາໄອສ໌ 658 ກິໂລກຣາມ ແລະ ຢາບ້າຫຼາຍກວ່າ 1 ແສນເມັດ ທີ່ນຳຂ້າມເຂົ້າຝັ່ງໄທໃນພຶ້ນທີ່ ບໍລິເວນແຄມນໍ້າຂອງ ເຂດບ້ານແພງໃຕ້ ອຳເພີ ບ້ານແພງ ຈັງຫວັດນະຄອນພະນົມ ໃນເວລາ 11:00 ໂມງ ຂອງວັນທີ 11 ກຸມພາ 2025.
ຕາມການລາຍງານຂອງເຈົ້າໜ້າທີ່ໃຫ້ຮູ້ວ່າ: ໄດ້ຮັບແຈ້ງຈາກສາຍຂ່າວວ່າຈະມີການລັກລອບລໍາລຽງຢາເສບຕິດເຂົ້າປະເທດໄທ ບໍລິເວນແຄມນໍ້າຂອງ ເຂດບ້ານແພງໃຕ້ ອຳເພີ ບ້ານແພງ ຈັງຫວັດນະຄອນພະນົມ, ຈຶ່ງໄດ້ຈັດກໍາລັງເຝົ້າກວດທຸກຈຸດທີ່ຄາດວ່າຈະມີການລັກລອບຂ້າມມາຍັງປະເທດໄທ, ຕໍ່ມາກວດພົບເຮືອ 2 ລຳ ແລະ ລົດຕູ້ 1 ຄັນ, ເຈົ້າໜ້າທີ່ຈຶ່ງໄດ້ສະແດງໂຕ ເຂົ້າຈັບກຸມຜູ້ຕ້ອງຫາໄດ້ 3 ຄົນຊຶ່ງເປັນລາວອາຍຸລະຫວ່າງ 16-17 ປີ, ພ້ອມຍຶດຂອງກາງ ຢາໄອສ໌ 16 ເປົາ ນ້ຳໜັກລວມ 658 ກິໂລກຣາມ ແລະ ຢາບ້າ 58 ມັດ ຈຳນວນປະມານ 116,000 ເມັດ ຈາກນັ້ນເຈົ້າໜ້າທີ່ຈຶ່ງໄດ້ນຳຂອງກາງເພື່ອກວດສອບ ແລະ ນຳສົ່ງຜູ້ຖືກຫາເພື່ອດຳເນີນຄະດີຕາມກົດໝາຍຕໍ່ໄປ.
