ລາວຍ້ອງຍໍຜູ້ມີຜົນງານຮັບໃຊ້ກອງປະຊຸມສຸດ

- Untitled design - ລາວຍ້ອງຍໍຜູ້ມີຜົນງານຮັບໃຊ້ກອງປະຊຸມສຸດ

ພິທີປະດັບຫລຽນໄຊແຮງງານໃຫ້ກົມກອງ, ບຸກຄົນ ແລະ ອານຸກໍາມະການຕ່າງໆທີ່ມີຜົນງານເດັ່ນໃນການຮັບໃຊ້ກອງປະຊຸມສຸດຍອດອາຊຽນຄັ້ງທີ 28-29 ແລະ ກອງປະຊຸມປີ່ນອ້ອມສໍາຄັນຕ່າງໆທີ່ ສປປ ລາວ ຮັບກຽດເປັນເຈົ້າພາບ ໄດ້ຈັດຂຶ້ນໃນວັນທີ 5 ເມສານີ້ທີ່ນະຄອນຫລວງວຽງຈັນ, ໂດຍການໃຫ້ກຽດເຂົ້າຮ່ວມຂອງທ່ານນາຍົກລັດຖະມົນຕີ ທອງລຸນ ສີສຸລິດ. ໃນນີ້ມີບຸກຄົນໄດ້ຮັບຫລຽນໄຊແຮງງານຊັ້ນ II ຈຳນວນ 3.100 ທ່ານ, 37 ກົມກອງ, ຫລຽນໄຊແຮງງານ ຊັ້ນ III ຈໍານວນ 4.380 ທ່ານ, 6 ກົມກອງ, ຫລຽນກາແຮງງານມີ 2.880 ທ່ານ, 1 ກົມກອງ ແລະ ໄດ້ຮັບໃບຍ້ອງຍໍລັດຖະບານຈໍານວນ 2.700 ທ່ານ, 2 ກົມກອງ ແລະ ປະດັບຫລຽນກາແຮງງານໃຫ້ພາກທຸລະກິດອີກຈໍານວນໜຶ່ງທີ່ປະກອບສ່ວນເຂົ້າໃນການເປັນປະທານອາຊຽນ ແລະ ເປັນເຈົ້າພາບກອງປະຊຸມສຸດຍອດດັ່ງກ່າວໄດ້ຮັບຜົນສໍາເລັດຈົບງາມ.

ໃນໂອກາດນີ້, ທ່ານນາຍົກລັດຖະມົນຕີໄດ້ມີຄໍາເຫັນວ່າ: ການເປັນເຈົ້າພາບຈັດກອງປະຊຸມສຸດຍອດອາຊຽນ ແລະ ປະທານອາຊຽນຂອງປະເທດເຮົາໃນປີ 2016 ຜ່ານມາ, ໄດ້ຍົກສູງຖານະບົດບາດຂອງປະເທດເຮົາໃນເວທີພາກພື້ນ ແລະ ສາກົນໃຫ້ສູງເດັ່ນຂຶ້ນ ແລະ ຂໍໃຫ້ທຸກພາກສ່ວນກ່ຽວຂ້ອງສືບຕໍ່ຈັດຕັ້ງຜັນຂະຫຍາຍຜົນສໍາເລັດຂອງກອງປະຊຸມດັ່ງກ່າວໃຫ້ເປັນຮູບປະທໍາເພື່ອນໍາຜົນປະໂຫຍດສູງສຸດມາສູ່ປະເທດ, ພ້ອມທັງຕາງໜ້າພັກ ແລະ ລັດຖະບານສະແດງຄວາມຂອບໃຈຢ່າງຈິງໃຈ ແລະ ຍ້ອງຍໍຊົມເຊີຍມາຍັງພະນັກງານ, ທະຫານ, ຕໍາຫລວດ, ນັກທຸລະກິດ, ຄ້າຊາວຂາຍ ແລະ ປະຊາຊົນບັນດາເຜົ່າທຸກຖ້ວນໜ້າທີ່ໄດ້ຕັ້ງໜ້າປະກອບສ່ວນຢ່າງຫ້າວຫັນຕາມພາລະໜ້າທີ່ຂອງຕົນ ກໍຄືການຮ່ວມແຮງຮ່ວມໃຈເປັນເຈົ້າພາບທີ່ດີ ແລະ ຂອບໃຈບັນດາປະເທດອາຊຽນ, ຄູ່ເຈລະຈາອາຊຽນ ແລະ ປະເທດເພື່ອນມິດອື່ນໆທີ່ໄດ້ໃຫ້ການຊ່ວຍເຫລືອສະໜັບສະໜູນ ແລະ ການຮ່ວມມືໃນການເປັນເຈົ້າພາບ ແລະ ປະທານອາຊຽນ ຂອງ ສປປ ລາວ ໃນປີ 2016 ໄດ້ຮັບຜົນສໍາເລັດຢ່າງຈົບງາມ ແລະ ບັນດາບົດຮຽນໃນການເປັນປະທານອາຊຽນໃນປີ 2016 ເປັນພື້ນຖານອັນສໍາຄັນສໍາລັບ ສປປ ລາວ ເພື່ອກະກຽມໃຫ້ແກ່ການເປັນປະທານອາຊຽນຄັ້ງທີ 3 ໃນປີ 2024 ກໍຄືການເປັນປະທານກອງປະຊຸມພາກພື້ນ ແລະ ສາກົນອື່ນໆໃນຕໍ່ໜ້າ.

- Wave100S AD to Website 2020 0 - ລາວຍ້ອງຍໍຜູ້ມີຜົນງານຮັບໃຊ້ກອງປະຊຸມສຸດ
- WhatsApp Image 2020 05 27 at 5 - ລາວຍ້ອງຍໍຜູ້ມີຜົນງານຮັບໃຊ້ກອງປະຊຸມສຸດ
- WhatsApp Image 2020 05 27 at 5 - ລາວຍ້ອງຍໍຜູ້ມີຜົນງານຮັບໃຊ້ກອງປະຊຸມສຸດ
error: Alert: ເນື້ອຫາຂ່າວມີລິຂະສິດ !!