ເອກະຊົນມອບເຄື່ອງກິລາ 30 ຊຸດໃຫ້ແກ່ ນັກປິ່ງປ໋ອງລາວກ່ອນແຂ່ງຂັນທີ່ ສປ ຈີນ

- advert banner 728 90 728x90 - ເອກະຊົນມອບເຄື່ອງກິລາ 30 ຊຸດໃຫ້ແກ່ ນັກປິ່ງປ໋ອງລາວກ່ອນແຂ່ງຂັນທີ່ ສປ ຈີນ

ບໍລິສັດ ໂນອາ ຈໍາກັດ ຊຸກຍູ້ເຄື່ອງຝຶກຊ້ອມໃຫ້ແກ່ສະຫະພັນປິ່ງປ໋ອງແຫ່ງຊາດລາວຈໍານວນ 30 ຊຸດ ກ່ອນເຂົ້າຮ່ວມການແຂ່ງຂັນລາຍການເສັ້ນທາງສາຍໄໝ (SILK ROAD COP) ທີ່ເມືອງໜານໜິງ ແຂວງກວາງຊີ ສປ ຈີນ ຈະຈັດຂຶ້ນໃນຕົ້ນເດືອນທັນວາ 2017 ນີ້ ເຊິ່ງພິທີມອບເຄື່ອງດັ່ງກ່າວຈັດຂຶ້ນໃນທ້າຍເດືອນພະຈິກຜ່ານມານີ້ ຢູ່ສະໜາມຝຶກຊ້ອມປິ່ງປ໋ອງເອັສວີໂພນທັນ ໂດຍຕາງໜ້າຮັບຂອງທ່ານນາງ ສົມໃຈ ວົງສາ ຮອງປະທານສະຫະພັນປິ່ງປ໋ອງແຫ່ງຊາດລາວ.

- new3 - ເອກະຊົນມອບເຄື່ອງກິລາ 30 ຊຸດໃຫ້ແກ່ ນັກປິ່ງປ໋ອງລາວກ່ອນແຂ່ງຂັນທີ່ ສປ ຈີນ

ທ່ານນາງ ດາລາວອນ ມະນີຈັນ ຄູຝຶກນັກກິລາປິ່ງປ໋ອງທີມຊາດລາວ ກ່າວວ່າ: ການແຂ່ງຂັນປິ່ງປ໋ອງລາຍການເສັ້ນທາງສາຍໄໝ ເຊິ່ງຈະຈັດຂຶ້ນລະຫວ່າງວັນທີ 12-14 ທັນວານີ້ ທີ່ ສປ ຈີນ ເປັນເຈົ້າພາບ ເຊິ່ງມີ 11 ປະເທດເຂົ້າຮ່ວມ. ຂະນະທີ່ ສປປ ລາວ ເຮົາໄດ້ສົ່ງນັກກິລາເຂົ້າຮ່ວມຈໍານວນ 9 ຄົນ ຍິງ 4 ຄົນ ປະກອບມີ: ນາງ ທິບພະກອນ ສຸທໍາມະວົງ, ນາງ ສີສັງວານ ພິມມະຢູນ, ນາງ ນິດນະພາ ກົງເພັດ, ນາງ ແສງດາວຽງ ດວງປັນຍາ, ທ້າວ ຈັນສະໝອນ ຄູນລາດສຸວັນນະວົງ, ທ້າວ ສອນປະສິດ ສໍສັງສິນ, ທ້າວ ແສງສະຖິດ ສຸຂະທໍາມະວົງ, ທ້າວ ມີໄຊ ໂພນສະຫວັນ ແລະ ທ້າວ ແສງອາທິດ. ພາຍຫລັງໄດ້ຮັບການແຈ້ງເຊີນຈາກ ສປ ຈີນ ໃນຕົ້ນເດືອນຕຸລາ ພວກເຮົາກໍໄດ້ເລີ່ມຝຶກຊ້ອມແຕ່ທ້າຍເດືອນຕຸລາເປັນຕົ້ນມາ ໂດຍມີ 2 ຈຸດຝຶກຊ້ອມຄື: ສູນຝຶກຊ້ອມປິ່ງປ໋ອງວຽງຈັນເຊັນເຕີ ແລະ ສູນຝຶກຊ້ອມປິ່ງປ໋ອງເອັສວີໂພນທັນ. ດັ່ງນັ້ນ, ກ່ອນເຂົ້າຮ່ວມແຂ່ງຂັນລາຍການດັ່ງກ່າວ ທາງບໍລິສັດ ໂນອາ ຈໍາກັດ ໄດ້ເຫັນຄວາມສໍາຄັນຂອງນັກກິລາປິ່ງປ໋ອງລາວ ຈຶ່ງໄດ້ຊຸກຍູ້ເຄື່ອງຝຶກຊ້ອມໃຫ້ແກ່ນັກກິລາຈໍານວນ 30 ຊຸດ ເພື່ອກຽມຄວາມພ້ອມເຂົ້າຮ່ວມແຂ່ງຂັນ ໂດຍຕັ້ງຄວາມຫວັງຈະຍາດເອົາອັນດັບທີ່ດີມາສູ່ ສປປ ລາວ ພ້ອມທັງສ້າງຜົນງານອັນໂດດເດັ່ນໃນເວທີພາກພື້ນ ແລະ ສາກົນ.

ທ່ານນາງ ດາລາວອນ ມະນີຈັນ ກ່າວຕື່ມວ່າ: ຂ້າພະເຈົ້າໃນນາມຄູຝຶກຂໍສະແດງຂອບໃຈ ແລະ ຮູ້ບຸນຄຸນຕໍ່ບໍລິສັດດັ່ງກ່າວທີ່ຊຸກຍູ້ເຄື່ອງຝຶກຊ້ອມໃນການເຂົ້າຮ່ວມແຂ່ງຂັນຄັ້ງນີ້ ເຊິ່ງພວກເຮົາໃຫ້ຄໍາໝັ້ນສັນຍາວ່າຈະເຮັດໃຫ້ດີທີ່ສຸດໃນການເຂົ້າຮ່ວມແຂ່ງຂັນ ພ້ອມຈະຍາດເອົາຜົນງານມາໃຫ້ປະຊາຊົນລາວດ້ວຍ​ຄວາມ​ພູມ​ໃຈ.

error: Content is protected !!