ສປຊ ເຕືອນເຊື້ອ HIV/AIDS ລະບາດໜັກຢູ່ເອຢິບ
ສະຫະປະຊາຊາດຖະແຫລງສະແດງຄວາມກັງວົນຕໍ່ສະຖານະການເຊື້ອໄວຣັສ HIV ສາເຫດຂອງພະຍາດເອດສ໌ທີ່ແຜ່ລະບາດຢ່າງວ່ອງໄວຢູ່ເອຢິບ ໂດຍມີຈຳນວນຜູ້ຕິດເຊື້ອລາຍໃໝ່ເພີ່ມຂຶ້ນເຖິງ 40% ໃນແຕ່ລະປີ, ສ່ວນຄວາມພະຍາຍາມສະກັດການແຜ່ລະບາດມີອຸປະສັກຈາກຄວາມບໍ່ເຂົ້າໃຈໃນສັງຄົມ ແລະ ຂາດເຂີນທຶນສະໜັບສະໜູນ ເພື່ອປຸກລະດົມຕໍ່ຕ້ານພະຍາດເອດສ໌ລະບາດ.
ເຈົ້າໜ້າທີ່ ສປຊ ກ່າວວ່າ: ເຊື້ອໄວຣັສ HIV ລະບາດໜັກຢູ່ເອຢິບໃນກຸ່ມໄວລຸ້ນ ແລະ ໜຸ່ມສາວຈຳນວນຫລາຍຂຶ້ນກວ່າຄົນທີ່ຢູ່ໃນໄວອື່ນໆ. ຂໍ້ມູນສະຫະປະຊາຊາດລະບຸວ່າ: ເອຢິບເຊິ່ງມີປະຊາກອນປະມານ 95 ລ້ານຄົນ ຢູ່ໃນອັນຮອງຈາກອີຣານ, ຊູດັງ ແລະ ໂຊມາລີທີ່ມີອັດຕາເຊື້ອ HIV/AIDS ລະບາດໜັກ, ຜູ້ປ່ວຍເອດສ໌ຢູ່ເອຢິບມັກຖືກຈຳຄຸກ, ຫາທາງຕັ້ງຂໍ້ຫາແລະ ສັງຄົມກີດກັນ. ພະຍາດເອດສ໌ມີສ່ວນສຳພັນກັບຄົນຮັກເພດດຽວກັນ ເຊິ່ງເຖິງວ່າບໍ່ແມ່ນເລື່ອງຜິດກົດໝາຍຢູ່ເອຢິບ, ແຕ່ເບິ່ງວ່າຮັກຮ່ວມເພດເປັນເລື່ອງທີ່ຂັດກັບສາສະໜາ ແລະ ທຳມະຊາດໃນປະເທດອະນຸລັກນິຍົມແຫ່ງນີ້. UNAIDS ລາຍງານວ່າ: ມີຜູ້ຕິດເຊື້ອ HIV ຢູ່ເອຢິບຈຳນວນກວ່າ 11.000 ຄົນ ແຕ່ກະຊວງສາທາລະນະສຸກລາຍງານຄາດວ່າ: ມີປະມານ 7.000 ຄົນ.
