ສະຖິຕິໃໝ່ ! ເອັມບັບເປ ກາຍເປັນ ນັກເຕະນ້ອຍທີ່ສຸດຍິງເຖິງ 10 ປະຕູໃນຢູຟາ
ຄີລີຢັນ ເອັມບັບເປ ກອງໜ້າຕົວເກັ່ງຂອງ ປາຣີ ແຊງແຊກແມງ ທຳລາຍສະຖິຕິນັກເຕະອາຍຸນ້ອຍທີ່ສຸດທີ່ຍິງເຖິງ 10 ປະຕູ ໃນການແຂ່ງຂັນບານເຕະ ຢູຟາ ແຊ້ມປ້ຽນລີກ ຫລັງຍິງ 1 ປະຕູໃນນັດທີ່ບຸກເສຍໃຫ້ກັບ ບາເຢິນ ມິວນິກ 1-3 ໃນວັນທີ 5 ທັນວາ.
ເອັມບັບເປ ຍິງປະຕູຕີໄຂ່ແຕກໃນນາທີ 50 ແລະ ເຖິງວ່າຈະບໍ່ສາມາດຊ່ວຍ ປາຣີ ຫລຸດພົ້ນຈາກການປະລາໄຊໄດ້ ແຕ່ກໍເຮັດໃຫ້ ເອັມບັບເປ ສ້າງສະຖິຕິຍິງໄດ້ 10 ປະຕູໃນ ຢູຟາ ແຊ້ມປ້ຽນລີກ ດ້ວຍອາຍຸພຽງ 18 ປີ 11 ເດືອນ ເຊິ່ງຖືວ່າອາຍຸນ້ອຍທີ່ສຸດໃນປະຫວັດສາດການແຂ່ງຂັນ.
ໂດຍສະຖິຕິດັ່ງກ່າວທຳລາຍສະຖິຕິເກົ່າຂອງ ຄາຣິມ ເບນເຊມາ ກອງໜ້າຊາວຝຣັ່ງ ທີ່ເຮັດໄດ້ໃນຕອນອາຍຸ 20 ປີ 10 ເດືອນ. ຂະນະທີ່ ລິໂອເນລ ເມສຊີ ກອງໜ້າຂອງ ບາເຊໂລນາ ກວ່າຈະຍິງໄດ້ 10 ປະຕູໃນລາຍການນີ້ກໍຕ້ອງໃຊ້ເວລາເຖິງ 21 ປີ 3 ເດືອນກັບ 7 ວັນ.
ສຳລັບ ເອັມບັບເປ ຍິງໄປ 6 ປະຕູໃນ ຢູຟາ ແຊ້ມປ້ຽນລີກ ລະດູການຜ່ານມາ ເຊິ່ງເຮັດໃຫ້ ເອັມບັບເປ ພາ ໂມນາໂກ ຜ່ານເຂົ້າເຖິງຮອບຮອງຊະນະເລີດ ແລະ ຍິງເພີ່ມອີກ 4 ປະຕູໃນລະດູການນີ້ ຫລັງຍ້າຍມາຮ່ວມທີມກັບ ປາຣີ ລວມທັງໝົດເປັນການຍິງໄປແລ້ວ 10 ປະຕູຈາກການລົງແຂ່ງຂັນພຽງ 15 ນັດເທົ່ານັ້ນ.
