ນັກວິໄຈຢັ້ງຢືນວ່າໝາເຂົ້າໃຈຄຳເວົ້າຂອງຄົນແທ້
ນັກວິໄຈພົບວ່າ ໝາມີຄວາມສາມາດໃນການໄຈ້ແຍກຄຳສັບ ແລະ ສຽງສູງຕໍ່າຂອງມະນຸດໄດ້ແທ້ ໂດຍໃຊ້ສະໝອງພາກສ່ວນ ດຽວກັບທີ່ມະນຸດໃຊ້.
ວຽກງານວິໄຈຈາກວາລະສານວິຊາການ Science ໂດຍ Attila Andics ແລະ ທີມງານເຜີຍວ່າ : ຄວາມສາມາດໃນການ ຮຽນຮູ້ຄຳສັບບໍ່ໄດ້ຈຳກັດຢູ່ໃນແຕ່ມະນຸດເທົ່ານັ້ນ ໂດຍມະນຸດມີຄວາມສາມາດນີ້ມາຈາກການໃຊ້ພາສາໃນການສື່ສານ, ແຕ່ຄວາມ ສາມາດໃນການຮຽນຮູ້ຄຳສັບນີ້ມີມາຕັ້ງແຕ່ຍຸກບູຮານແລ້ວ ເຊິ່ງເຮັດໃຫ້ສິ່ງມີຊີວິດສາມາດນຳໄປເຊື່ອມໂຍງລະຫ່ວາງສຽງກັບ ຄວາມໝາຍໄດ້.
ຄຳເວົ້າເປັນພື້ນຖານຂອງພາສາຂອງມະນຸດ ແຕ່ເຮົາບໍ່ຄ່ອຍຈະພົບວ່າສັດຊະນິດອື່ນນໃຊ້ສຽງໃນການສື່ສານ ນອກຈາກນີ້ ລະດັບສຽງສູງຕໍ່າຍັງເປັນອີກວິທີທີ່ມະນຸດໃຊ້ໃນການສື່ຄຳເວົ້າຄືກັນ ດັ່ງຄຳເວົ້າຍ້ອງຍໍມັກຈະມີລະດັບສຽງທີ່ສູງກ່ວາ ແລະ ມີການຂຶ້ນລົງຫລາຍກ່ວາ ໝາຍຄວາມວ່າມະນຸດໃຊ້ທັງຄຳສັບ ແລະ ລະດັບສຽງໃນການສື່ສານ.
ທີມວິໄຈສຶກສາວ່າ : ໝາມີກົນໄກດຽວກັນກັບທີ່ມະນຸດມີຫລືບໍ່ ໂດຍໄດ້ທົດລອງໃຫ້ໝາຟັງສຽງຂອງຜູ້ຝຶກ ໂດຍຜູ້ຝຶກຈະອອກ ສຽງຄຳສັບໂດຍໃຊ້ລະດັບສຽງທີ່ແຕກຕ່າງກັນ ທັງເວົ້າໃຫ້ເປັນຄຳຍ້ອງຍໍ ແລະ ເວົ້າແບບປົກກະຕິ ທັງນີ້ຄຳສັບ ແລະ ລະດັບສຽງຈະຈັບຄູ່ໃນແບບທີ່ແຕກຕ່າງກັນໄປໄດ້ແກ່ : ຄຳເວົ້າຍ້ອງຍໍໃນລະດັບສຽງຍ້ອງຍໍ, ເວົ້າຄຳຍ້ອງຍໍໃນລະດັບສຽງປົກກະຕິ, ເວົ້າຄຳປົກກະຕິໃນລະດັບສຽງຍ້ອງຍໍ ແລະ ເວົ້າຄຳປົກກະຕິໃນລະດັບສຽງປົກກະຕິ. ນັກວິໄຈໄດ້ໃຊ້ເຄື່ອງສະແກນສະໝອງ fMRI ເພື່ອເບິ່ງວ່າສະໝອງພາກສ່ວນໃດຂອງໝາໄດ້ຮັບການກະຕຸ້ນແດ່ ຜົນທີ່ອອກມາເຜີຍວ່າ : ບໍ່ວ່າລະດັບສຽງຈະເປັນແນວໃດ ໝາຈະປະມວນຄຳສັບ ແລະ ຮູ້ຈັກຄຳສັບໄດ້ວ່າເປັນຄຳທີ່ໂດດເດັ່ນ ແລະ ຍິ່ງກ່ວານັ້ນ ກິດຈະກຳໃນສະໝອງຍັງມີຄວາມຄ້າຍຄືກັບມະນຸດນຳອີກ ນັ້ນແມ່ນໃຊ້ສະໝອງເບື້ອງຊ້າຍໃນການເຮັດວຽກ.
ນອກຈາກນີ້ ນັກວິໄຈຍັງພົບຕື່ມວ່າ ໝາຮູ້ຈັກປະມວນຜົນລະດັບສຽງທີ່ມາກັບຄຳສັບ ໂດຍໃຊ້ສະໝອງເບື້້ອງຂວາພາກສ່ວນທີ່ ກ່ຽວຂ້ອງກັບການໄດ້ຍິນຄືກັນກັບໃນມະນຸດ ໂດຍລວມແລ້ວນັກວິໄຈພົບວ່າ ໝາໃຊ້ທັງຄວາມໝາຍຂອງຄຳເວົ້າ ແລະ ລະດັບ ສຽງເພື່ອປະມວນຜົນວ່າການອອກສຽງຄຳເວົ້ານັ້ນຖືວ່າເປັນລາງວັນຫລືບໍ່ ເຊິ່ງກໍໝາຍຄວາມວ່າ ໝາໜ້າຈະເຂົ້າໃຈທັງຄຳເວົ້າ ແລະ ລະດັບສຽງຂອງມະນຸດ.
ນັກວິໄຈຢັ້ງຢືນຕື່ມວ່າ ຕາມທິດສະດີວິວັດທະນາການ ໝາທີ່ຖືກເລືອກໃຫ້ຢູ່ລອດໜ້າຈະເປັນໝາທີ່ຖືກລ້ຽງມາ ແລະ ກໍເປັນ ເຫດຜົນທີ່ເຮັດໃຫ້ເກີດໂຄງສ້າງສະໝອງທີ່ກ່ຽວກັບການປະມວນຜົນພາສາໃນໝາ ແຕ່ວິວັດທະນາການຍັງບໍ່ໄວປານນັ້ນ. ດັ່ງນັ້ນຈຶ່ງກ່າວໄດ້ວ່າ ມະນຸດເປັນສິ່ງມີຊີວິດຊະນິດດຽວທີ່ມີຄວາມສາມາດໃນການຄິດຄົ້ນຄຳເວົ້າ.
