ເຈົ້າໜ້າທີ່ກູ້ໄພມູນນິທິຈີນ ລາຍງານໃຫ້ຮູ້ວ່າ: ໃນເວລາປະມານ 8:00 ໂມງຂອງວັນທີ 7 ທັນວານີ້, ໄດ້ເກີດອຸປະຕິເຫດລົດກະບະສອງແຖວຮັບສົ່ງນັກຮຽນໝາຍເລກທະບຽນ ບຂ 6136 ກໍາແພງນະຄອນ, ພີກຄວໍ້າຢູ່ເສັ້ນທາງເຂດບ້ານເວີນແທນເມືອງໄຊທານີ, ຫລັງຈາກແລ່ນມາດ້ວຍຄວາມໄວແລ້ວເສຍຫລັກໄປຕໍາເອົາຕົ້ນໄມ້ແຄມທາງຈົນເຮັດໃຫ້ມີນັກຮຽນທີ່ນັ່ງມານໍາລົດເສຍຊີວິດຄາທີ່ 2 ຄົນ ແລະ ບາດເຈັບອີກຫລາຍສີບຄົນ.
ເຈົ້າໜ້າທີ່ ໃຫ້ຮູ້ວ່າ: ລົດຄັນດັ່ງກ່າວຂັບໂດຍທ້າວ ຄຳ ອາຍຸປະມານ 35 ປີຢູ່ບ້ານທ່າຈໍາປາ ແລະ ແລ່ນມາແຕ່ເສັ້ນທາງບ້ານທ່າຈໍາປາເພື່ອມຸ້ງໜ້າໄປສົ່ງນັກຮຽນຢູ່ໂຮງຮຽນ ມສ ທ່າດິນແດງ, ຊຶ່ງຢູ່ຫ່າງຈາກບ່ອນເກີດປະມານ 8 ກິໂລແມັດ, ແຕ່ພໍມາຮອດຈຸດເກີດເຫດຊຶ່ງເປັນທາງຊື່ບວກກັບເປັນທາງດິນແດງ, ລົດໃຫຍ່ຄັນດັ່ງກ່າວຈຶ່ງເລັ່ງຄວາມໄວເພື່ອແຊງລົດຈັກທີ່ແລ່ນໃນທິດທາງດຽວກັນແລ້ວເສຍຫລັກເຈືອກໄປຕໍາຕົ້ນໄມ້ຢູ່ຂ້າງທາງຢ່າງແຮງ, ເຮັດໃຫ້ນັກຮຽນທີ່ນັ່ງມານໍາລົດຊື່ທ້າວ ກຸງສີ ອາຍຸ 11 ປີ ແລະ ທ້າວ ບຸນມາ ອາຍຸ 11 ປີເຊັ່ນກັນ, ທັງສອງຢູ່ບ້ານທ່າຈໍາປາ, ເມືອງໄຊທານີເສຍຊີວິດຄາທີ່ ແລະ ໝູ່ອີກ 38 ຄົນທີ່ນັ່ງມານໍາໄດ້ຮັບບາດເຈັບສາຫັດ.
