ສົງຄາມການຄ້າເດືອດ ! ທ່ານ ທຣໍາ ຂູ່ເກັບພາສີເພີ່ມ ພາຍຫລັງການາດາ-EU ຕອບໂຕ້ການເກັບພາສີນໍາເຂົ້າເຫລັກ ແລະ ອາລູມີນຽມ 25% ຂອງອາເມລິກາ
ສະຖານະການສົງຄາມການຄ້າມີທ່າອ່ຽງເຄັ່ງຕຶງຂຶ້ນອີກ ພາຍຫລັງປະທານາທິບໍດີ ໂດນັລ ທຣໍາ ຂອງອາເມລິກາ ປະກາດວ່າ: ຈະກໍານົດມາດຕະການເກັບພາສີສິນຄ້ານໍາເຂົ້າເພີ່ມອີກ ພາຍຫລັງມາດຕະການຫລ້າສຸດໃນການເກັບພາສີນໍາເຂົ້າເຫລັກ ແລະ ອາລູມີນຽມທັງໝົດໃນລະດັບ 25% ເຊິ່ງມີຜົນບັງຄັບໃຊ້ໄປໃນວັນທີ 12 ມີນາ ສົ່ງຜົນເຮັດໃຫ້ການາດາ ແລະ ເອີຣົບທີ່ໄດ້ຮັບຜົນກະທົບ ປະກາດທ່າທີຕອບໂຕ້ຢ່າງວ່ອງໄວພາຍໃນເວລາຕໍ່ມາ.
ໂດຍສະຫະພາບເອີຣົບປະກາດວ່າ: ຈະເພີ່ມການເກັບພາສີສໍາລັບສິນຄ້າທີ່ນໍາເຂົ້າຈາກອາເມລິກາມູນຄ່າສູງເຖິງ 2.8 ໝື່ນລ້ານໂດລາສະຫະລັດ ເລີ່ມແຕ່ວັນທີ 1 ເມສາ.
ຂະນະທີ່ລັດຖະບານການາດາປະກາດໃນວັນທີ 13 ມີນາວ່າ: ຈະເກັບພາສີ 25% ສໍາລັບສິນຄ້າຈາກອາເມລິກາ ມູນຄ່າກວ່າ 2 ໝື່ນລ້ານໂດລາສະຫະລັດ ເຊິ່ງລວມທັງສິນຄ້າປະເພດເຫລັກ, ຄອມພິວເຕີ ແລະ ອຸປະກອນກິລາ.
ທ່ານ ທຣໍາ ກ່າວຕໍ່ນັກຂ່າວວ່າ: ທ່ານຈະຕອບໂຕ້ມາດຕະການຂອງການາດາ ແລະ EU ແລະ ເນັ້ນຄໍາເຕືອນທີ່ຈະເປີດເຜີຍແນວທາງການໃຊ້ພາສີອາກອນຕອບໂຕ້ (Reciprocal Tariffs) ຕໍ່ປະເທດຕ່າງໆທົ່ວໂລກໃນເດືອນໜ້າ.
EU ປະເມີນວ່າ: ການເກັບພາສີເຫລັກ ແລະ ອາລູມີນຽມ 25% ຂອງອາເມລິກາ ຈະສົ່ງຜົນກະທົບຕໍ່ການສົ່ງອອກເຫລັກ ແລະ ອາລູມີນຽມຂອງປະເທດ EU ໄປອາເມລິກາ ປະມານ 5%. ຂະນະທີ່ການດາມີການສົ່ງອອກເຫລັກ ແລະ ອາລູມີນຽມໄປອາເມລິກາປະມານ 90%.
ເຖິງຢ່າງໃດກໍຕາມ, ສໍາລັບປະເທດອື່ນໆທີ່ເປັນຜູ້ສະໜອງໂລຫະຂອງອາເມລິກາເຊັ່ນ: ອັງກິດ, ອົດສະຕຣາລີ, ແມັກຊິກ ແລະ ເບຣຊິນ ຍັງບໍ່ມີການສະແດງທ່າທີຕອບໂຕ້.
ອ້າງອີງ:
- https://edition.cnn.com/2025/03/12/economy/trump-steel-aluminum-tariffs-hnk-intl/index.html
- https://www.bbc.com/news/articles/c3e4d8epdzdo
