ໂຣນັລໂດ ສ້າງສະຖິຕິຍິງໄດ້ທຸກນັດ ໃນຢູຟາ ແຊ້ມປ້ຽນລີກ ຮອບແບ່ງກຸ່ມ
ຄຣິສເຕຍໂນ ໂຣນັລໂດ ກອງໜ້າຊາວປັອກຕຸຍການ ຂອງ ຣິລ ມາດຣິດ ສະໂມສອນໃນ ລາລີກາ ສະເປນ ສ້າງສະຖິຕິຍິງປະຕູໄດ້ທັງ 6 ນັດໃນຮອບແບ່ງກຸ່ມຂອງການແຂ່ງຂັນບານເຕະ ຢູຟາ ແຊ້ມປ້ຽນລີກ ຫລັງຍິງໄດ້ 1 ປະຕູໃນນັດສົ່ງທ້າຍຮອບແບ່ງກຸ່ມ H ນັດທີ່ ຣີລ ມາດຣິດ ບຽດຊະນະ ໂບຣຸສເຊຍ ດ໊ອດມູນ ສະໂມສອນຈາກບຸນເດສລີກາ ເຢຍລະມັນ 3-2 ໃນວັນທີ 6 ທັນວາ.
ຈາກຜົນງານດັ່ງກ່າວ ສົ່ງຜົນໃຫ້ ໂຣນັລໂດ ກາຍເປັນຄົນທຳອິດທີ່ຍິງໄດ້ທຸກນັດໃນຮອບແບ່ງກຸ່ມ ນັບແຕ່ລະດູການ 1992-1993 ທີ່ລາຍການ ຢູຟາ ແຊ້ມປ້ຽນລີກ ນຳການແຂ່ງຂັນແບບແບ່ງກຸ່ມມານຳໃຊ້ ແລະ ປ່ຽນຊື່ຈາກ ຢູໂຣປ້ຽນ ຄັບ ມາເປັນ ຢູຟາ ແຊ້ມປ້ຽນລີກ.
ສຳລັບ ໂຣນັລໂດ ຍິງໄປແລ້ວ 9 ປະຕູຈາກ 6 ນັດ ໃນການແຂ່ງຂັນບານເຕະ ຢູຟາ ແຊ້ມປ້ຽນລີກ ລະດູການນີ້, ແຕ່ໃນລີກ ລາວຫາກໍຍິງໄດ້ພຽງ 2 ປະຕູຈາກ 10 ນັດເທົ່ານັ້ນ.
ສ່ວນການແຂ່ງຂັນບານເຕະ ຢູຟາ ແຊ້ມປ້ຽນລີກ ຮອບແບ່ງກຸ່ມແມ່ນສຳເລັດແລ້ວ ແລະ ໄດ້ມາແລ້ວ 16 ທີມ ປະກອບມີ: ແຊ້ມກຸ່ມ A-H: ແມນເຊັສເຕີ ຢູໄນເຕັດ, ປາຣີ ແຊງແຊກແມງ, ໂຣມາ, ບາເຊໂລນາ, ລີເວີພູລ, ແມນເຊັສເຕີ ຊິຕີ້, ເບຊິກຕັສ ແລະ ສະເປີ. ຮອງແຊ້ມກຸ່ມ A-H: ບາເຊິລ, ບາເຢິນ ມິວນິກ, ເຊລຊີ, ຢູເວນຕຸສ, ເຊບີຢາ, ຊັກເຕີ ໂດເນັດ, ປໍໂຕຣ ແລະ ຣີລ ມາດຣິດ.
