ການຮ່ວມທຶນຕ້ອງສຶກສາໃຫ້ຮອບຄອບ

- Untitled design - ການຮ່ວມທຶນຕ້ອງສຶກສາໃຫ້ຮອບຄອບ

ໃນຍຸກກົນໄກເສດຖະກິດຕະຫຼາດ ບັນຫາການແກ້ງແຍ່ງແຂ່ງຂັນ, ການເອົາລັດ ເອົາປຽບກັນ ເປັນເລື່ອງທີ່ສັງ ຄົມພວມປະເຊີນໜ້າ ແລະເປັນໄພອັນຕະລາຍທີ່ໃກ້ຕົວ ໄດ້ຖີບຕົວຂຶ້ນສູ່ລະດັບສູງໃນຫຼາຍຮູບແບບ ເຮັດໃຫ້ຄົນໃນສັງ ຄົມຈໍານວນບໍ່ໜ້ອຍ ອາດບໍ່ສາມາດແນມເຫັນກົນລະຍຸດການທໍາທຸລະກໍາແບບໃໝ່ ໂດຍໄດ້ນໍາໃຊ້ສື່ອອນລາຍເປັນຕົວຊັກນໍາແລະມັນໄດ້ກາຍເປັນໄພງຽບທີ່ພວມທໍາລາຍສະຖາບັນຄອບຄົວ ລວມເຖິງສະຖຽນລະພາບທາງດ້ານເສດຖະກິດ-ການເມືອງຂອງຊາດພວກເຮົານໍາອີກ.

ຫຼາຍຄົນ ຄົງຈົດຈໍາຄໍາພັງເພີຍຂອງບູຮານລາວ ເຄີຍກ່າວໄວ້ວ່າ: ໄປເສິກໄປຂ້າ ໄປຄ້າໄປຕົວະ; ສະນັ້ນ ກ່ອນຈະຊື້ສິ່ງຂອງ ຫຼື ວ່າຈະຮ່ວມທຶນທຸກຄັ້ງ ເຖິງຊິນ້ອຍ ຫຼື ໃຫຍ່, ໜ້ອຍ ຫຼື ຫຼາຍ ມັນກໍມີຄວາມສ່ຽງກັນທັງນັ້ນ ແຕ່ພວກເຮົາຕ້ອງມີຄົ້ນຄິດຕຶກຕອງ, ສຶກສາ, ພິຈາລະນາຢ່າງລະອຽດຖີ່ຖ້ວນ, ຫາກບໍ່ດັ່ງນັ້ນ ກໍອາດພົບກັບສິ່ງທີ່ບໍ່ຄາດຄິດເກີດຂຶ້ນກັບຕົວເຮົາຢ່າງແນ່ນອນ ເຊິ່ງຈະເຫັນໄດ້ໃນໄລຍະຊຸມປີ 80 ສັງຄົມຂອງນະຄອນຫຼວງວຽງຈັນ ກໍພົບບັນຫາການຝາກເງິນດ້ວຍຜົນຕອບແທນເປັນດອກເບ້ຍສູງ ເຮັດໃຫ້ຄົນແຫ່ແຫນກັນເຂົ້າຮ່ວມທຶນເປັນຈໍານວນຫຼວງຫຼາຍ ແຕ່ສຸດທ້າຍກໍຫົດຫາຍໄປທັງຕົ້ນແລະດອກ ຄືສະຫະກອນສີວິໄລ, ສະຫະກອນເມດຕາ…ທີ່ເຮັດໃຫ້ຫຼາຍຄົວເຮືອນຕ້ອງລະທົມຂົມຂື່ນກັບການສູນເສຍເງິນຄໍາຂອງຕົນ.

ກໍຄືໃນລະຫວ່າງກອງປະຊຸມສະໄໝສາມັນຂອງສະພາແຫ່ງຊາດຊຸດທີແລ້ວໃນປີ 2016  ການນໍາລະດັບສູງຂອງກະ ຊວງປ້ອງກັນປ້ອງກັນຄວາມສະຫງົບ ກໍໄດ້ລາຍງານປະກົດການຫຍໍ້ທໍ້ທີ່ເກີດຂຶ້ນໃນສັງຄົມໂດຍສະເພາະຢູ່ນະຄອນຫຼວງ ວຽງຈັນໃນນີ້ໄດ້ເປີດເຜີຍໃຫ້ເຫັນທາດແທ້ແລະພຶດຕິ ກໍາທີ່ສໍ້ສົນຂອງບໍລິສັດແມັກສຄີ້ ( ແມັກກີ້ ) ເຊິ່ງກວາດເອົາເງິນຂອງປະຊາຊົນໄປ 10 ກ່ວາລ້ານໂດລາສະຫະຣັດແລະມີ 1.500 ກ່ວາຄົນ ຕ້ອງມາສູນເສຍເງິນຄໍາແບບເປົ່າປະໂຫຍດ ເຊິ່ງບໍລິສັດດັ່ງກ່າວ ໄດ້ຖືກສານປະຊາຊົນນະຄອນຫຼວງວຽງຈັນ ຕັດສິນຄະດີບຸກຄົນຜູ້ບໍລິຫານບໍລິສັດດັ່ງກ່າວໃນຖານສໍ້ໂກງຊັບຂອງພົນລະເມືອງໃນວັນທີ 16 ກຸມພາ ຜ່ານມານີ້ແລະໃນຫວ່າງປີແລ້ວນີ້ກໍມີບາງບໍລິສັດ ໄດ້ດໍາເນີນທຸລະກິດບໍ່ຖືກຕ້ອງຕາມກົດໝາຍແລະເກີດເປັນເລື່ອງເປັນຄວາມກັນຢ່າງໃຫຍ່ ເຮັດໃຫ້ຫຼາຍໆຄອບຄົວຕ້ອງມາເດືອດຮ້ອນ ຍ້ອນເງິນໂຕເອງແລະແທນທີ່ຈະໄດ້ເງິນທີ່ອອກດອກມີຜົນ ແຕ່ກໍກົງກັນຂ້າມກັບບັນຫາດັ່ງກ່າວແມ່ນບໍ່ເປັນໄປຕາມຄວາມເປັນຈິງໃນສັນຍາທີ່ເຄີຍມີໄວ້ຕໍ່ກັນ ແລະໃນຂະນະນີ້ ກໍເກີດມີບັນຫາໃນລັກສະນະດຽວກັນ ໂດຍບໍລິສັດເອຊຽນເຟັສຈໍາກັດ ທີ່ເປັນຊາວກໍາປູເຈຍເປັນປະທານ ກໍກວາດເງິນປະຊາຊົນເຮົາໄປ 10 ກວ່າລ້ານໂດລາສະຫະຣັດເຊັ່ນກັນ.

ປັດຈຸບັນ ອາດຍັງມີອີກຫຼາຍບໍລິສັດທີ່ໄດ້ເຄື່ອນໄຫວໃນລັກສະນະລະດົມທຶນ ແລະທຸລະກິດຕ່ອງໂສ້ ເຊິ່ງພວກເຂົາ ຍັງມີການໂຄສະນາໃຫ້ຫົວໜ້າກຸ່ມລະດົມສະມາຊິກຮ່ວມລົງທຶນ ຫຼື ຮ່ວມຊື້ຜະລິດຕະພັນ ທີ່ຄົນບໍ່ຄ່ອຍສົນໃຈໄປຂາຍໃຫ້ສະມາຊິກກຸ່ມອື່ນໆ, ຕໍ່ບັນຫາທຸລະກິດເຫຼົ່ານີ້ ໄດ້ສ້າງຄວາມສູນເສຍຕໍ່ຊັບສິນຂອງປະຊາຊົນເປັນຈໍານວນຫຼວງ ຫຼາຍ, ມີຫຼາຍຄົນທີ່ມີສາຍເລືອດດຽວກັນ ກໍຕ້ອງຕັດຂາດການພົວພັນໃນສາຍຄອບຄົວ ຫຼື ເພື່ອນມິດຍາດພີ່ນ້ອງ ຍ້ອນຕົກຂຸມພາງຂອງຄົນໃກ້ຊິດແລະລັກສະນະຂອງການລະດົມທຶນແລະທຸລະກິດຕ່ອງໂສ້ ເຊິ່ງມັນອາດກາຍເປັນເຄືອຄ່າຍລັກສະນະຂອງການຟອກເງິນ ແລະທັງເປັນໄພຂົມຂູ່ແລະຄຸກຄາມທາງເສດຖະກິດຂອງຊາດ ລວມໄປເຖິງຄວາມໝັ້ນຄົງທາງດ້ານການເມືອງຂອງພວກເຮົານໍາອີກ.

- Wave100S AD to Website 2020 0 - ການຮ່ວມທຶນຕ້ອງສຶກສາໃຫ້ຮອບຄອບ

ໃນໄລຍະຜ່ານ ທະນາຄານແຫ່ງ ສປປ ລາວ ກໍໄດ້ອອກແຈ້ງເຕືອນມາຍັງພໍ່ແມ່ປະຊາຊົນມາແລ້ວແລະຄັ້ງຫຼ້າສຸດ ເພື່ອສະກັດກັ້ນການເຄື່ອນໄຫວລະດົມທຶນທີ່ບໍ່ຖືກຕ້ອງຕາມລະບຽບກົດໝາຍແລະຫຼີກເວັ້ນຜົນເສຍຫາຍທີ່ອາດຈະເກີດຂຶ້ນຕໍ່ທ່ານ,  ຫ້ອງການທະນາຄານແຫ່ງ ສປປ ລາວ ໄດ້ແຈ້ງເຕືອນມາຍັງພະນັກງານ, ທະຫານ, ຕໍາຫຼວດແລະປະຊາຊົນລາວ ລວມທັງຊາວຕ່າງປະເທດທີ່ອາໃສຢູ່ ສປປ ລາວ ໃຫ້ມີສະຕິລະວັງຕົວຕໍ່ການຝາກເງິນ, ການບໍລິການຊໍາລະ, ການຮ່ວມຮຸ້ນ (ລົງທຶນ) ແລະອື່ນໆ ໂດຍກວດສອບຄວາມຖືກຕ້ອງວ່າບຸກຄົນ, ນິຕິບຸກ ຄົນດັ່ງກ່າວ ໄດ້ຮັບອະນຸຍາດຈາກຂະແໜງການທີ່ມີສິດອໍານາດກ່ຽວຂ້ອງຢ່າງຖືກຕ້ອງແລ້ວບໍ, ຫາກພົບເຫັນກໍລະນີສົງໄສ ຫຼື ເຫັນການເຄື່ອນໄຫວລະດົມທຶນທີ່ບໍ່ຖືກຕ້ອງຕາມກົດໝາຍ, ທ່ານສາມາດໂທສອບຖາມ ຫຼື ແຈ້ງຕໍ່ກົມກ່ຽວຂ້ອງຂອງທະນາຄານແຫ່ງ ສປປ ລາວ ຕາມເບີໂທ 021 265 713-715 ຫຼື 021 265 607 ໄດ້ທຸກເວລາ.

# ໂດຍ: ຣັດສະໝີ ດວງສັດຈະ

- WhatsApp Image 2020 05 27 at 5 - ການຮ່ວມທຶນຕ້ອງສຶກສາໃຫ້ຮອບຄອບ
- WhatsApp Image 2020 05 27 at 5 - ການຮ່ວມທຶນຕ້ອງສຶກສາໃຫ້ຮອບຄອບ
error: Alert: ເນື້ອຫາຂ່າວມີລິຂະສິດ !!