ອາຣັບອອກຖະແຫລງການໃຫ້ອາເມລິກາ ຍົກເລີກຮັບຮອງສະຖານະເຢລູຊາເລມ
ລັດຖະມົນຕີຕ່າງປະເທດກຸ່ມປະເທດອາຣັບອອກຖະແຫລງການຮ່ວມກັນໃນວັນທີ 10 ທັນວານີ້ ຮຽກຮ້ອງໃຫ້ອາເມລິກາຍົກເລີກການຕັດສິນໃຈຮັບຮອງນະຄອນເຢລູຊາເລມເປັນເມືອງຫລວງຂອງອິດສະລາແອນ ໂດຍເນັ້ນວ່າການເຄື່ອນໄຫວດັ່ງກ່າວຈະຍິ່ງສ້າງຄວາມຂັດແຍ່ງໄປທົ່ວພາກພື້ນ.
ຖະແຫລງການສະມາຊິກສັນນິບາດອາຣັບພາຍຫລັງກອງປະຊຸມຄະນະລັດຖະມົນຕີຕ່າງປະເທດຫລາຍຊົ່ວໂມງຢູ່ນະຄອນຫລວງໄຄໂຣຂອງເອຢິບລະບຸວ່າ: ຄຳປະກາດຂອງປະທານາທິບໍດີ ໂດນັນ ທຣຳ ຜູ້ນຳອາເມລິກາ ຖືເປັນການລະເມີດກົດໝາຍສາກົນຢ່າງຮ້າຍແຮງ. ຂະນະດຽວກັນຂໍໃຫ້ປະຊາຄົມໂລກຮັບຮອງລັດຖະບານປາແລັສຕິນ. ຖະແຫລງການປະເທດອາຣັບລະບຸວ່າ: ການກະທຳຂອງອາເມລິກາສົ່ງຜົນໃຫ້ຕ້ອງຢຸດບົດບາດການເປັນຜູ້ສະໜັບສະໜູນ ແລະ ຜູ້ໄກ່ເກ່ຍໃນຂະບວນການເຈລະຈາສັນຕິພາບ ອິດສະລາແອນ-ປາແລັສຕິນ ເນື່ອງຈາກອາເມລິກາມີພຶດຕິກຳທີ່ເຂົ້າຂ້າງອິດສະລາແອນ. ນອກຈາກນີ້ ອາຣັບຈະນຳເລື່ອງເຂົ້າສູ່ສະພາຄວາມໝັ້ນຄົງແຫ່ງສະຫະປະຊາຊາດເພື່ອຫາຂໍ້ມະຕິປະນາມການຕັດສິນໃຈຂອງອາເມລິກາ ເພາະຂັດຕໍ່ກົດໝາຍສາກົນ.
