ຟາມພູຕາເວັນ ເປີດໃຫ້ເຂົ້າທ່ຽວຊົມຢ່າງເປັນທາງການແລ້ວ
ພິທີເປີດຟາມພູຕາເວັນຢ່າງເປັນທາງການ ໄດ້ຈັດຂຶ້ນໃນວັນທີ 9 ທັນວານີ້, ທີ່ບ້ານນາໄຊ, ເມືອງທ່າພະບາດ ແຂວງບໍລິຄຳໄຊ, ໂດຍການເຂົ້າຮ່ວມຂອງທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີທ່ານນາງ ດາລຸນີ ດວງປະເສີດ ອຳນວຍການຟາມ ພູຕາເວັນ, ພ້ອມດ້ວຍມວນຊົນເຂົ້າຮ່ວມເປັນຈຳນວນຫລາຍ.
ທ່ານເຈົ້າແຂວງບໍລິຄຳໄຊ ມີຄຳເຫັນວ່າ: ດັ່ງທີ່ຮູ້ນຳກັນແລ້ວວ່າ ຂະແໜງການ ທ່ອງທ່ຽວແມ່ນຂະແໜງການໜຶ່ງທີ່ສ້າງລາຍຮັບຫລາຍສົມຄວນເຂົ້າໃນການພັດທະນາເສດຖະກິດ-ສັງຄົມ ທີ່ພັກ-ລັດຖະບານ ໄດ້ຖືເອົາເປັນຂະແໜງການໜຶ່ງທີ່ສຳຄັນ ແລະ ໃນຂະນະດຽວກັນ ຟາມພູຕາເວັນ ກໍເປັນແຫລ່ງທ່ອງທ່ຽວໜຶ່ງໃນຈຳນວນຮ້ອຍກວ່າແຫ່ງ ທີ່ຂຶ້ນກັບແຂວງ ບໍລິຄຳໄຊໂດຍກົງ, ຊຶ່ງໄດ້ເປີດໃຫ້ເຂົ້າທ່ຽວຊົມຢ່າງເປັນທາງການເປັນປີທີ 2 ແລ້ວ, ຊຶ່ງໄດ້ຮັບການຕອບຮັບຈາກປີຜ່ານມາຢ່າງຫລວງຫລາຍ, ໂດຍສະເພາະ ມີນັກທ່ອງທ່ຽວເຂົ້າມາທ່ຽວຊົມໃນແຕ່ລະວັນຢ່າງບໍ່ຂາດສາຍ, ແຕ່ຟາມດັ່ງກ່າວ ໄດ້ມີກຳນົດເວລາໃນການເປີດພຽງແຕ່ 1 ເດືອນເທົ່ານັ້ນ ຈຶ່ງເຮັດໃຫ້ນັກທ່ອງທ່ຽວບາງກຸ່ມ, ບາງຄົນ ພາດການມາທ່ຽວ ແລະ ໃນປີນີ້ ກໍໄດ້ເປີດໃຫ້ທ່ຽວອີກຄັ້ງ ແຕ່ໄດ້ເພີ່ມເວລາອອກໄປອີກເປັນ 4 ເດືອນຄື: ນັບແຕ່ຕົ້ນເດືອນທັນວາ 2017 ເຖິງ ທ້າຍເດືອນມີນາ 2018, ໂດຍຈະເຮັດໃຫ້ນັກທ່ອງທ່ຽວສາມາດເຂົ້າມາທ່ຽວໄດ້ຢ່າງພໍໃຈ.
ຜູ້ອຳນວຍການຟາມພູຕາເວັນ ໃຫ້ຮູ້ວ່າ: ສຳລັບປີ້ເຂົ້າທ່ຽວຊົມ ຈະເພີ່ມຈາກ 10 ພັນກີບໃນປີຜ່ານມາເປັນ 15 ພັນກີບ/ຄົນ, ສ່ວນວັນເສົາ-ວັນອາທິດ ແມ່ນ 25 ພັນກີບ/ຄົນ, ພ້ອມແຖມນ້ຳດື່ມ 1 ຕຸກ ແລະ ຈືນລູກຊີ້ນ 1 ຖ້ວຍ, ສ່ວນນັກຮຽນ-ນັກສຶກສາ ຂໍພຽງມີໜັງສືຢັ້ງຢືນຈາກໜ່ວຍງານກ່ຽວຂ້ອງ ກໍສາມາດເຂົ້າຊົມໄດ້ໂດຍບໍ່ເສຍຄ່າໃດໆ. ພິເສດ ໃນປີນີ້ ຈະໄດ້ເພີ່ມກິດຈະກຳຕ່າງໆຂຶ້ນອີກຢ່າງຫລວງຫລາຍ ເພື່ອໃຫ້ນັກທ່ອງທ່ຽວມ່ວນຊື່ນ ແລະ ຢາກກັບໄປທ່ຽວຟາມດັ່ງກ່າວອີກຄັ້ງ.
