5 ວິທີມີຄວາມສຸກໄດ້ໂດຍບໍ່ຕ້ອງສົມບູນແບບ
ການເສບຕິດຄວາມສົມບູນແບບ (Perfectionist) ຖືເປັນອາການທາງຈິດຊະນິດໜຶ່ງທີ່ຄົນສ່ວນຫລາຍເປັນແຕ່ບໍ່ຮູ້ໂຕ ຮູ້ຫລືບໍ່ວ່າຍິ່ງພະຍາຍາມເຮັດໂຕໃຫ້ສົມບູນແບບຫລາຍເທົ່າໃດ ຄວາມສຸກກໍຍິ່ງຫລຸດໜ້ອຍລົງເທົ່ານັ້ນ ແລະ ສິ່ງສຳຄັນຄວາມສົມບູນແບບນີ້ກໍເປັນຕົ້ນເຫດເຮັດໃຫ້ເກີດອາການເຄັ່ງຄຽດຊຳ້ເຮື້ອ ເຊິ່ງເປັນຈຸດກຳເນີດຂອງພະຍາດອື່ນໆຕາມມາໄດ້ອີກຫລວງຫລາຍ ແລະ ຕໍ່ໄປນີ້ແມ່ນ 10 ສັນຍານທີ່ບອກວ່າທ່ານກຳລັງສ່ຽງຕໍ່ການເປັນອາການເສບຕິດຄວາມສົມບູນແບບ :
- ທ່ານຮູ້ສຶກດີທຸກເທື່ອທີ່ໄດ້ຮັບລາງວັນ ຫລື ມີຄົນຍ້ອງຍໍຊົມເຊີຍທ່ານຕໍ່ໜ້າຄົນອື່ນ.
- ທ່ານຮັບບໍ່ໄດ້ທີ່ຖືກຕຳໜິ ແລະ ພະຍາຍາມແກ້ໂຕຢູ່ສະເໝີ ເພື່ອໃຫ້ພົ້ນຈາກຄຳຕຳໜິນັ້ນ.
- ທຸກເທື່ອທີ່ເຫັນຄົນອື່ນຜິດພາດ ຫລື ເສຍໜ້າ ທ່ານຈະຮູ້ສຶກດີ ແລະ ມັກບອກຕໍ່ເລື່ອງເຫລົ່ານັ້ນໃຫ້ຄົນອ້ອມຂ້າງຟັງ.
- ທ່ານບໍ່ຍອມເປີດເຜີຍຄວາມຮູ້ສຶກ ຫລື ເລື່ອງສ່ວນໂຕໃຫ້ຄົນອື່ນຟັງຫລາຍ ເພາະຢ້ານຄົນອື່ນຈະພົບວ່າທ່ານຍັງດີບໍ່ພໍ.
- ທ່ານບໍ່ກ້າສະເໜີວຽກ, ແຕ່ງໂຕ ຫລື ຄິດຫຍັງນອກກອບ ເພາະຢ້ານຄວາມຜິດພາດທີ່ຈະເກີດຂຶ້ນ.
- ເມື່ອມີຄວາມຜິດພາດເກີດຂຶ້ນ ທ່ານມັກຈະຄິດຊຳ້ໄປຊຳ້ມາ, ຮ້ອງໄຫ້ ແລະ ບໍ່ຍອມໃຫ້ອະໄພໂຕເອງງ່າຍໆ.
- ເມື່ອທ່ານສະດຸດລົ້ມ, ທັກທາຍຄົນຜິດ, ຍ່າງຕຳແວ່ນແກ້ວ ຫລື ແມ່ນແຕ່ພາດໃນເລື່ອງນ້ອຍໆ ເຊັ່ນ : ທ້ອງຮ້ອງ ຫລື ເອື້ອມໃນສະຖານທີ່ສາທາລະນະ ທ່ານຈະຮູ້ສຶກເສຍໜ້າ ແລ້ວຟ້າວເຮັດທຳທ່າຄືກັບວ່າບໍ່ມີຫຍັງເກີດຂຶ້ນ.
- ເມື່ອເຮັດແບບທົດສອບທີ່ກ່ຽວຂ້ອງກັບໂຕທ່ານ ທ່ານຈະຮູ້ສຶກເຄັ່ງຄຽດ ແລະ ໃຊ້ເວລາດົນຫລາຍໃນການເຮັດເຄື່ອງໝາຍໃນຊ່ອງທີ່ໃຫ້ໝາຍຫລາຍທີ່ສຸດ, ຫລາຍປານກາງ, ໜ້ອຍ ແລະ ໜ້ອຍທີ່ສຸດ.
- ເມື່ອຖືກຕັ້ງຄຳຖາມກ່ຽວກັບຂໍ້ດີຂອງໂຕເອງ ທ່ານມັກໃຫ້ຄຳຕອບແບບທີ່ສັງຄົມຄາດຫວັງ ເຊັ່ນ : ເປັນຄົນກົງຕໍ່ເວລາ, ຊື່ສັດ, ດຸໝັ່ນ, ອົດທົນ.
- ທ່ານມັກຕັ້ງເປົ້າໝາຍໃນຊີວິດໃຫ້ສູງໄວ້ສະເໝີ ໂດຍມີເປົ້າໝາຍເລື່ອງທີ່ຍັງເຮັດບໍ່ສຳເລັດ ແລະ ເມື່ອເຮັດສຳເລັດແລ້ວ ທ່ານກໍຈະຫຍັບເປົ້າໝາຍໃຫ້ໄກຫລາຍຂຶ້ນໄປເລື້ອຍໆ.
ຖ້າໃຜອ່ານຮອດບ່ອນນີ້ແລ້ວຮູ້ສຶກຄືກຳລັງເບິ່ງເຫັນໂຕເອງ ຢ່າຟ້າວຕົກໃຈ ລອງມາເບິ່ງວິທີການໃຊ້ຊີວິດແບບມີຄວາມສຸກງ່າຍໆ ໂດຍບໍ່ຈຳເປັນຕ້ອງສົມບູນແບບ :
- ຝຶກໃຫ້ອະໄພຕົນເອງ : ທຸກເທື່ອທີ່ເຮັດຜິດພາດ ຫລື ເຮັດຫຍັງບໍ່ໄດ້ດັ່ງໃຈ ຕ້ອງເຊົາໂທດວ່າເປັນຄວາມຜິດພາດຂອງໂຕເອງ (ເຖິງວ່າຄວາມຜິດພາດນັ້ນຈະເກີດຈາກເຮົາແທ້ໆ) ໃຫ້ຄິດວ່າເຮົາໄດ້ເຮັດເຕັມທີ່ສຸດແລ້ວ ຝຶກຍອມຮັບໃນຜົນທີ່ເກີດຂຶ້ນໃຫ້ໄດ້ ຍ້ອນການຕິດວົນວຽນໄປມາຊຳ້ໆນັ້ນບໍ່ໄດ້ເຮັດໃຫ້ບັນຫາຈົບສິ້ນໄປ ມີແຕ່ຈະເຮັດໃຫ້ເຮົາເປັນທຸກໃຈຂຶ້ນຕື່ມ.
- ເຊົາປຽບທຽບ : ຢ່າເອົາໂຕເອງໄປປຽບທຽບກັບຄົນທີ່ປະສົບຄວາມສຳເລັດຫລາຍກ່ວາ ບໍ່ວ່າຈະເປັນນັກຮຽນເກຣດ 4 ທີ່ຢູ່ໜ້າຫ້ອງ, ຄົນເກັ່ງທີ່ສຸດໃນບ່ອນເຮັດວຽກ ຫລື ໝູ່ທີ່ຮັ່ງມີທີ່ສຸດໃນກຸ່ມ ເພາະຄວາມຈິງແລ້ວເຂົາເຫລົ່ານັ້ນອາດບໍ່ມີຄວາມສຸກໃນຊີວິດເລີຍກໍໄດ້ ລອງປ່ຽນຄວາມຄິດໃໝ່ ໂດຍຫັນໄປເບິ່ງຄົນທີ່ໃຊ້ຊີວິດທຳມະດາ, ແຕ່ຍິ້ມຫົວໄດ້ທຸກມື້ແທນດີກ່ວາ.
- ປີ້ນວິກິດໃຫ້ເປັນໂອກາດ : ເມື່ອຕ້ອງພະເຊີນກັບເຫດການທີ່ເຮັດໃຫ້ເຮົາຮູ້ສຶກເສຍໜ້າ ຫລື ອັບອາຍ ເຊັ່ນ : ຖືກຕຳໜິຕໍ່ໜ້າຄົນອື່ນ ຫລື ຖືກຢອກແຮງໆຈົນໜ້າຈືດ ຢ່າເສຍໃຈ ຫລື ນ້ອຍໃຈກັບຄຳເວົ້ານັ້ນ ລອງປ່ຽນຄວາມຄິດໃໝ່ວ່າຄວາມຈິງເຂົາຄົງປາຖະໜາດີ ຢາກໃຫ້ເຮົາປັບປຸງໂຕໃຫ້ດີຂຶ້ນ ພຽງແຕ່ເຂົາເວົ້າບໍ່ເປັນ ແລະ ບໍ່ຮູ້ຈັກກາລະເທສະ ເມື່ອເບິ່ງໄດ້ແນວນີ້ໃຈຂອງທ່ານກໍຈະເປັນສຸກໂດຍຄວາມຄິດບວກຂອງໂຕເອງ.
- ຫລຸດຄວາມຄາດຫວັງ : ການຕັ້ງຄວາມຄາດຫວັງໃນຊີວິດຫລາຍໆມີແຕ່ຈະເຮັດໃຫ້ເປັນທຸກໃຈ ແລະ ເມື່ອໃດທີ່ເຮົາເປັນທຸກ ລັດສະໝີຄວາມທຸກກໍຈະແຜ່ໄປຍັງຄົນອ້ອມຂ້າງນຳ ເຮັດໃຫ້ບໍ່ມີໃຜຢາກເຂົ້າໃກ້. ສະນັ້ນເຮົາຈຶ່ງຄວນຫລຸດຄວາມຄາດຫວັງລົງ ແລະ ເມື່ອເຮົາບໍ່ຄາດຫວັງກັບໂຕເອງຫລາຍ ເຮົາກໍຈະຮູ້ສຶກມ່ວນກັບສິ່ງທີ່ເຮົາເຮັດຫລາຍຍິ່ງຂຶ້ນ ບາງເທື່ອຜົນທີ່ຕາມມາອາດຈະດີກ່ວາກໍມີ.
- ແນມຫາຄວາມສຸກນ້ອຍໆອ້ອມໂຕ : ການຈ້ອງຈະໄປໃຫ້ເຖິງເປົ້າໝາຍຕະຫລອດເວລາ ອາດເຮັດໃຫ້ເຮົາພາດຫລາຍສິ່ງດີໆໃນຊີວິດ ບາງສິ່ງທີ່ເຮົາຄິດວ່າບໍ່ມີປະໂຫຍດໃນມື້ນີ້ ເມື່ອຄິດຍ້ອນກັບໄປອາດເປັນສິ່ງທີ່ເຮັດໃຫ້ເຮົາຮູ້ສຶກເສຍດາຍກໍເປັນໄດ້, ລອງຍ່າງອອກມາຈາກຂອບເຂດເກົ່າໆ, ເພີດເພີນກັບຄວາມສຸກນ້ອຍໆໃນຫລາຍໆທາງທີ່ເຮົາເບິ່ງຂ້າມ ເອົາເວລາທີ່ມີຄ່າມາມອບໃຫ້ກັບໝູ່, ຄົນຮັກ ແລະ ຄອບຄົວ ແລ້ວຈະຮູ້ວ່າໂລກທີ່ຂາດຄວາມສົມບູນແບບໜ່ວຍນີ້ເປັນຕາຢູ່ຍິ່ງກ່ວາເກົ່າ.
ຮູ້ຫລືບໍ່ວ່າລູກກົກມີທ່າອ່ຽງທີ່ຈະມີອາການເສບຕິດຄວາມສົມບູນແບບຫລາຍກ່ວາລູກຄົນກາງ ຫລື ລູກຫລ້າ ເພາະມັກຖືກພໍ່ແມ່ຄາດຫວັງວ່າຈະຕ້ອງເປັນທີ່ເພິ່ງຂອງຄອບຄົວ, ໃນຄອບຄົວຄົນຈີນ ລູກຜູ້ຊາຍຈະມີອາການເສບຕິດຄວາມສົມບູນແບບຫລາຍກ່ວາລູກແມ່ຍິງ ຍ້ອນເຫດຜົນດຽວກັນ ຜົນການວິໄຈະພົບວ່າຄົນທີ່ເສບຕິດຄວາມສົມບູນແບບຈະມີລາຍຮັບໜ້ອຍກ່ວາຄົນທີ່ໃຊ້ຊີວິດໂດຍບໍ່ສົນໃຈຄວາມສົມບູນແບບເລີຍ.
