ອາເມລິກາຂູ່ຖອນຕົວຈາກການເຈລະຈາສັນຕິພາບຣັດເຊຍ-ອູແກຣນ ຖ້າຍັງບໍ່ມີຄວາມຄືບໜ້າ
ທ່ານ ມາໂກ ຣູບິໂອ ລັດຖະມົນຕີຕ່າງປະເທດອາເມລິກາ ກ່າວວ່າ: ອາເມລິກາກຽມພິຈາລະນາຢຸດຄວາມພະຍາຍາມໃນການເຈລະຈາຢຸດສົງຄາມລະຫວ່າງອູແກຣນກັບຣັດເຊຍ ຖ້າຍັງບໍ່ມີຄວາມຄືບໜ້າໃນມໍ່ໆນີ້ ພາຍຫລັງສໍາເລັດກອງປະຊຸມຮ່ວມກັບເຈົ້າໜ້າທີ່ລະດັບສູງຂອງເອີຣົບ ແລະ ອູແກຣນ ຢູ່ນະຄອນຫລວງປາຣີສ ປະເທດຝຣັ່ງ.
ທ່ານ ຣູບິໂອ ກ່າວວ່າ: ອາເມລິກາຕ້ອງຕັດສິນໃຈຢ່າງຮີບດ່ວນວ່າຄວາມເປັນໄປໄດ້ໃນການຢຸດສົງຄາມຈະເກີດຂຶ້ນໄດ້ແທ້ ຫລື ບໍ່ພາຍໃນໄລຍະເວລາມໍ່ໆນີ້. ພ້ອມເນັ້ນວ່າ: ຖ້າສະຖານະການຍັງບໍ່ມີຄວາມຄືບໜ້າ ອາເມລິກາອາດຈໍາເປັນຕ້ອງຖອນຕົວຈາກຂະບວນການເຈລະຈາ ແລະ ຫັນໄປດໍາເນີນນະໂຍບາຍທາງເລືອກອື່ນແທນ.
ໃນລະຫວ່າງນີ້ ອາເມລິກາໄດ້ສະເໜີຂໍ້ຕົກລົງສັນຕິພາບໃໝ່ຕໍ່ອູແກຣນ ແລະ ຣັດເຊຍ ເຊິ່ງໜຶ່ງໃນເງື່ອນໄຂສໍາຄັນຄືຍອມຮັບໃຫ້ຣັດເຊຍຄອບຄອງໄຄຣເມຍຢ່າງເປັນທາງການ ແລກກັບການຢຸດຍິງຕາມແນວໜ້າສົງຄາມ. ທັງນີ້ ອູແກຣນຈະນໍາເອົາຂໍ້ສະເໜີດັ່ງກ່າວໄປຫາລືກັບປະທານາທິບໍດີ ໂວໂລດິເມຍ ເຊເລນສກີ, ຂະນະທີ່ຣັດເຊຍກໍາລັງຢູ່ລະຫວ່າງພິຈາລະນາ.
ປະທານາທິບໍດີ ໂດນັລ ທຣໍາ ໃຫ້ສໍາພາດສະໜັບສະໜູນແນວທາງຂອງທ່ານ ຣູບິໂອ, ພ້ອມເນັ້ນວ່າ: ອາເມລິກາບໍ່ຕ້ອງການຖ່ວງເວລາ ຖ້າຄູ່ເຈລະຈາບໍ່ມີຄວາມຈິງໃຈໃນການຢຸດສົງຄາມ ໂດຍລະບຸວ່າ: ຖ້າໜຶ່ງໃນສອງຝ່າຍຍັງຫລິ້ນເກມທາງການເມືອງ ອາເມລິກາພ້ອມຈະຖອນຕົວທັນທີ, ແຕ່ຍັງປະຕິເສດຈະເປີດເຜີຍໄລຍະເວລາທີ່ຊັດເຈນ.
ຂະນະດຽວກັນ, ຣັດເຊຍໄດ້ອອກມາສະແດງທ່າທີຜ່ານໂຄສົກເກຣມລິນ ຢືນຢັນວ່າມີຄວາມພະຍາຍາມໃນການແກ້ໄຂບັນຫາຢ່າງຕໍ່ເນື່ອງ ເຖິງຈະຍອມຮັບວ່າສະຖານະການຍັງເຕັມໄປດ້ວຍຄວາມຊັບຊ້ອນ. ສ່ວນສື່ຣັດເຊຍລາຍງານວ່າ: ຄໍາເວົ້າຂອງທ່ານ ຣູບິໂອ ເປັນຄໍາຂາດຈາກວໍຊິງຕັນຕໍ່ລັດຖະບານອູແກຣນ.
ອີກດ້ານໜຶ່ງ, ອາເມລິກາ ແລະ ອູແກຣນ ໄດ້ລົງນາມບັນທຶກຄວາມເຂົ້າໃຈ (MOU) ບາດກ້າວທໍາອິດສູ່ການຈັດຕັ້ງຂໍ້ຕົກລົງການຮ່ວມມືດ້ານແຮ່ທາດສໍາຄັນ ເພື່ອສະໜັບສະໜູນການຟື້ນຟູເສດຖະກິດຂອງອູແກຣນ ເຊິ່ງຖືເປັນຄວາມຄືບໜ້າທີ່ສໍາຄັນ ພາຍຫລັງຂໍ້ຕົກລົງກ່ອນໜ້ານີ້ລົ້ມເຫລວຈາກບັນຫາຄວາມຂັດແຍ່ງທາງການເມືອງໃນເດືອນກຸມພາຜ່ານມາ.
ເຖິງຢ່າງໃດກໍຕາມ, ຄວາມເຄັ່ງຕຶງໃນພື້ນທີ່ຍັງດໍາເນີນຕໍ່ໄປ ພາຍຫລັງຣັດເຊຍຍິງລູກສອນໄຟໂຈມຕີເມືອງຄາຄິບ ສົ່ງຜົນເຮັດໃຫ້ມີຜູ້ເສຍຊີວິດ ແລະ ບາດເຈັບຈໍານວນໜຶ່ງ ສະທ້ອນໃຫ້ເຫັນວ່າສະຖານະການຄວາມຂັດແຍ່ງຍັງຢູ່ໃນສະພາບບອບບາງ ເຖິງວ່າຈະມີຄວາມພະຍາຍາມໃນການເຈລະຈາຢ່າງຕໍ່ເນື່ອງກໍຕາມ.
ອ້າງອີງ:
- https://edition.cnn.com/2025/04/18/europe/rubio-russia-war-in-ukraine-us-talks-intl-hnk/index.html
- https://www.reuters.com/world/us-ready-abandon-efforts-broker-russia-ukraine-peace-deal-rubio-says-2025-04-18/
- https://www.bbc.com/news/articles/c20x5xn1g92o
