ສານອາເມລິກາຍົກເລີກຄໍາສັ່ງທ່ານ ທຣໍາ ສັ່ງປິດສໍານັກຂ່າວ VOA ຊີ້ລະເມີດກົດໝາຍ ແລະ ຂັດລັດຖະທໍາມະນູນ
ຜູ້ພິພາກສາສານລັດຖະບານກາງອາເມລິກາຍົກເລີກຄໍາສັ່ງປິດສໍານັກຂ່າວ Voice of America (VOA) ແລະ ພັນທະມິດທີ່ໄດ້ຮັບທຶນສະໜັບສະໜູນຈາກລັດ, ພ້ອມມີຄໍາສັ່ງໃຫ້ລັດຖະບານຂອງປະທານາທິບໍດີ ໂດນັລ ທຣໍາ ຄືນຕໍາແໜ່ງ ແລະ ງົບປະມານແກ່ອົງກອນຂ່າວເຫລົ່ານີ້, ພ້ອມທັງອະນຸຍາດໃຫ້ກັບມາອອກອາກາດທາງວິທະຍຸ, ໂທລະພາບ ແລະ ອອນລາຍໄດ້ຕາມປົກກະຕິ ໂດຍຊີ້ວ່າ: ຄໍາສັ່ງປິດກິດຈະການກ່ອນໜ້ານີ້ລະເມີດກົດໝາຍ ແລະ ຂັດຕໍ່ລັດຖະທໍາມະນູນ.
ລັດຖະບານ ທຣໍາ ເຄີຍສັ່ງປິດ VOA ແລະ ອົງກອນຂ່າວອື່ນໆທີ່ລັດສະໜັບສະໜູນເຊັ່ນ: Radio Free Asia ແລະ Middle East Broadcasting Networks ເຊິ່ງສົ່ງຜົນເຮັດໃຫ້ພະນັກງານ 1,300 ກວ່າຄົນຖືກພັກວຽກ ເນື່ອງຈາກລັດຖະບານ ທຣໍາ ເບິ່ງວ່າ: ສໍານັກຂ່າວເຫລົ່ານີ້ມີທ່າອ່ຽງຕໍ່ຕ້ານທ່ານ ທຣໍາ ແລະ ເປັນຝ່າຍຫົວຮຸນແຮງ.
ຜູ້ພິພາກສາ ຣອຍ ແລມເບິຣ ລະບຸວ່າ: ການກະທໍາຂອງລັດຖະບານອາເມລິກາ ບໍ່ຄໍານຶ່ງເຖິງຜົນກະທົບຕໍ່ພະນັກງານ, ນັກຂ່າວ ແລະ ຜູ້ບໍລິໂພກຂ່າວສານທົ່ວໂລກ. ອີກທັງຍັງອາດລະເມີດກົດໝາຍ International Broadcasting Act ແລະ ອໍານາດຂອງສະພາຄອງເກຣດໃນການຈັດສັນງົບປະມານສະໜັບສະໜູນອົງກອນຂ່າວເຫລົ່ານີ້.
ໂດຍສານອາເມລິກາເນັ້ນວ່າ: ສະພາຄອງເກຣດຄືຜູ້ມີອໍານາດໃນການອະນຸມັດງົບປະມານ ແລະ ກໍານົດໃຫ້ລາຍການຂ່າວເຫລົ່ານີ້ມີເນື້ອໃນທີ່ “ຖືກຕ້ອງ ເປັນກາງ ແລະ ຄວບຄຸມ” ລັດຖະບານບໍ່ມີສິດຍົກເລີກ ຫລື ສັ່ງຢຸດງົບປະມານແຕ່ພຽງຝ່າຍດຽວ.
ນອກຈາກນີ້, ຜູ້ພິພາກສາ ແລມເບິຣ ຍັງຕັ້ງຄໍາຖາມວ່າ: ຖ້າ VOA ກ້າເລົ່າຄວາມຈິງກ່ຽວກັບອາເມລິກາແບບກົງໄປກົງມາ ນັ້ນບໍ່ຄວນເປັນຈຸດແຂງຂອງສື່ຫວາ ?.
ອ້າງອີງ:
- https://www.bbc.com/news/articles/c0jz58zjllzo
- https://www.reuters.com/legal/us-judge-blocks-trumps-shutdown-government-funded-radio-broadcasts-2025-04-22/
- https://www.politico.com/news/2025/04/22/voice-of-america-donald-trump-00303983
- https://www.washingtonpost.com/style/media/2025/04/22/voice-of-america-voa-ruling-employees-return/
