ແອັດສະປາຍ ແລະ ປັອກຕຸຍການ ປະກາດພາວະສຸກເສີນ ຫລັງຈາກໄຟຟ້າດັບຄັ້ງໃຫຍ່ທົ່ວປະເທດ


ສໍານັກຂ່າວຕ່າງປະເທດລາຍງານວັນທີ 28 ເມສາ 2025 ເກີດເຫດໄຟຟ້າດັບເປັນວົງກວ້າງໃນປະເທດແອັດສະປາຍ ແລະ ປັອກຕຸຍການ ສົ່ງກະທົບຕໍ່ການເດີນທາງຂອງປະຊາຊົນ ລວມທັງສັນຍານອິນເຕີເນັດ ຈົນລັດຖະບານທັງສອງປະເທດຕ້ອງປະກາດພາວະສຸກເສີນ,
ຕາມການລາຍງານຂອງສື່ທ້ອງຖິ່ນລະບຸວ່າ ໄຟດັບຄັ້ງນີ້ຍັງສົ່ງຜົນກະທົບໃນບາງເຂດຂອງ ປະເທດຝຣັ່ງ ແລະ ປະເທດ ອັນດໍຣາ ເຊິ່ງຄາດວ່າໃຊ້ເວລາປະມານ 6-10 ຊົ່ວໂມງໃນການສ້ອມແປງ.


ຫລ້າສຸດ ໃນຄໍ່າຄືນຜ່ານມາ ນາຍົກລັດຖະມົນຕີຂອງປະເທດ ແອັດສະປາຍ ໄດ້ປະກາດວ່າ ປັດຈຸບັນສາມາດຟື້ນຟູລະບົບໄຟຟ້າໄດ້ແລ້ວເກືອບ 50% , ແນວໃດກໍຕາມຍັງບໍ່ສາມາດບອກໄດ້ວ່າສະຖານະການ ຈະກັບຄືນເປັນປົກກະຕິເວລາໃດ.
ເຫດການໄຟຟ້າດັບຄັ້ງໃຫຍ່ນີ້ເລີ່ມມີການລາຍງານແຕ່ຕອນບ່າຍຂອງວັນທີ 28 ເມສາ ແລະ ສົ່ງຜົນກະທົບຢ່າງໄວ ເນື່ອງຈາກປະຊາຊົນຫລາຍລ້ານຄົນບໍ່ມີໄຟຟ້າໃຊ້, ໄຟຈະລາຈອນບໍ່ສາມາດໃຊ້ໄດ້, ລົດໄຟ ແລະ ຖ້ຽວບິນຕ້ອງຢຸດໃຫ້ບໍລິການ ລວມທັງລະບົບສື່ສານຕ່າງໆໄດ້ຮັບຜົນກະທົບ.