ອິນເດຍຍິງລູກສອນໄຟໃສ່ປາກິດສະຖານ ອິດສະລາມາບັດຍິງປືນໃຫຍ່ຕອບໂຕ້ກັບ
ອິນເດຍຍິງລູກສອນໄຟໂຈມຕີດິນແດນຫລາຍແຫ່ງຢູ່ປາກິດສະຖານ ລວມທັງພື້ນທີ່ຂັດແຍ່ງຢູ່ແຄຊາເມຍ, ສ່ວນປາກິດສະຖານຕອບໂຕ້ດ້ວຍການຍິງປືນໃຫຍ່ ຖືເປັນການຍົກລະດັບສະຖານະການຄວາມຂັດແຍ່ງຮຸນແຮງຂຶ້ນ ລະຫວ່າງສອງມະຫາອໍານາດໃນອາຊີໃຕ້.
ກອງທັບອິນເດຍອອກຖະແຫລງການວ່າ: ມີການຍິງລູກສອນໄຟໂຈມຕີເປົ້າໝາຍ 9 ແຫ່ງຢູ່ປາກິດສະຖານ ລວມທັງພາກພື້ນ, ອາຊາດ, ຊໍາມູ ແລະ ພັກສະມີ ເຊິ່ງເປັນພາກພື້ນແຄຊາເມຍພາຍໃໃຕ້ການປົກຄອງຂອງປາກິດສະຖານ ແລະ ພື້ນທີ່ບາງສ່ວນຂອງແຄວ້ນປັນຈາບ ເຊິ່ງມີປະຊາກອນຫລາຍທີ່ສຸດໃນປາກິດສະຖານ.
ກອງທັບປາກິດສະຖານກ່າວວ່າ: ເຫດການດັ່ງກ່າວສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 8 ຄົນ ແລະ ມີຜູ້ໄດ້ຮັບບາດເຈັບອີກ 35 ຄົນ ໂດຍໃນຈໍານວນຜູ້ເສຍຊີວິດ ແລະ ຜູ້ໄດ້ຮັບບາດເຈັບມີເດັກນ້ອຍລວມຢູ່ນໍາ.
ຂະນະທີ່ນາຍົກລັດຖະມົນຕີ ນາວາ ຊາຣີບ ຜູ້ນໍາປາກິດສະຖານ ກ່າວວ່າ: ປາກິດສະຖານຈະບໍ່ຖິ້ມໄລຍະໄວ້ດົນ ເພື່ອຕອບໂຕ້ການຄຸກຄາມ ແລະ ຄວາມດື້ດ້ານຂອງອິນເດຍ, ພ້ອມປະນາມນາຍົກລັດຖະມົນຕີ ນາເຣນທຣາ ໂມດີ ເຈດຕະນາເປັນຝ່າຍເລີ່ມການໂຕມຕີ ເພື່ອຮຽກຮ້ອງຄະແນນນິຍົມພາຍໃນປະເທດ.
ຕໍ່ມາ, ກອງທັບອິນເດຍລາຍງານວ່າ: ກອງທັບປາກິດສະຖານເປັນຝ່າຍລະເມີດຂໍ້ຕົກລົງຢຸດຍິງ ດ້ວຍການຍິງປືນໃຫຍ່ຂ້າມເສັ້ນຄວບຄຸມ (LOC) ໃນພາກພື້ນແຄຊາເມຍ ເຊິ່ງລັດຖະບານນິວເດລີຢືນຢັນວ່າ: ຈະມີການຕອບສະໜອງຕໍ່ເລື່ອງນີ້ຕາມຄວາມເໝາະສົມ ພາຍຫລັງມີຜູ້ເສຍຊີວິດຢ່າງໜ້ອຍ 3 ຄົນຈາກເຫດການນີ້.
ທັງນີ້, ການພົວພັນລະຫວ່າງອິນເດຍກັບປາກິດສະຖານຫລຸດລົງເຖິງຂີດສຸດໃນຮອບຫລາຍປີ ພາຍຫລັງເກີດເຫດກຸ່ມຕິດອາວຸດກວາດຍິງກຸ່ມນັກທ່ອງທ່ຽວ ຢູ່ເມືອງພາຮາລແກນ ໃນລັດຊໍາມູ ແລະ ພັກສະມີ ຫລື ພາກພື້ນແຄຊາເມຍ ພາຍໃຕ້ອະທິປະໄຕຂອງອິນເດຍ ໃນວັນທີ 22 ເມສາຜ່ານມາ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 26 ຄົນ.
