ປະເທດ ຈີເອມເອສ (GMS) ຫາລືການຊື້-ຂາຍໄຟຟ້າແກ້ໄຂອຸປະສັກຕ່າງໆ

- advert banner 728 90 728x90 - ປະເທດ ຈີເອມເອສ (GMS) ຫາລືການຊື້-ຂາຍໄຟຟ້າແກ້ໄຂອຸປະສັກຕ່າງໆ

ບັນດາປະເທດອານຸພາກພື້ນແມ່ນ້ຳຂອງ ຫລື ຈີເອມເອສ ມີ: ກໍາປູເຈຍ, ຈີນ, ລາວ, ມຽນມາ, ໄທ ແລະ ຫວຽດນາມ ແລະ ພາກສ່ວນທີ່ກ່ຽວຂ້ອງດ້ານນະໂຍບາຍ ແລະ ການຊື້-ຂາຍໄຟຟ້າ, ໄດ້ພ້ອມກັນປຶກສາຫາລືກ່ຽວກັບສິ່ງທ້າທາຍ ແລະ ອຸປະສັກຕ່າງໆ ໃນການສົ່ງເສີມການຊື້-ຂາຍໄຟຟ້າໃນອານຸພາກພື້ນແມ່ນ້ຳຂອງໃຫ້ເປີດກວ້າງ ແລະ ຫລາກຫລາຍກວ່າເກົ່າ ເພື່ອເຮັດໃຫ້ການແລກປ່ຽນ ແລະ ການຊື້-ຂາຍໄຟຟ້າມີການເຊື່ອມໂຍງກັນດີຂຶ້ນໃນຕໍ່ໜ້າ.

- new3 - ປະເທດ ຈີເອມເອສ (GMS) ຫາລືການຊື້-ຂາຍໄຟຟ້າແກ້ໄຂອຸປະສັກຕ່າງໆ

ການປຶກສາຫາລືດັ່ງກ່າວ, ໄດ້ມີຂຶ້ນຢູ່ກອງປະຊຸມຄະນະກຳມາທິການເພື່ອປະສານງານດ້ານການຄ້າພະລັງງານພາກພື້ນຄັ້ງທີ 23 ທີ່ນະຄອນຫລວງວຽງຈັນ ໃນວັນທີ 15 ທັນວາຜ່ານມານີ້, ຊຶ່ງຈັດໂດຍກະຊວງພະລັງງານ ແລະ ບໍ່ແຮ່ ຮ່ວມກັບທະນາຄານພັດທະນາອາຊີ, ພາຍໃຕ້ການເປັນປະທານຮ່ວມຂອງທ່ານ ຄຳໂສ້ ກຸໂພຄຳ ຮອງຫົວໜ້າກົມນະໂຍບາຍ ແລະ ແຜນພະລັງງານ ແລະ ທ່ານ ວັດທະນາພົງ ກຸໂຣວັັດ ຫົວໜ້າສູນນະໂຍບາຍໄຟຟ້າ ຫ້ອງການນະໂຍບາຍ ແລະ ແຜນພະລັງງານໄຟຟ້າກະຊວງພະລັງງານຣາຊະນາຈັກໄທ ແລະ ມີຜູ້ຮັບຜິດຊອບດ້ານນະໂຍບາຍ ແລະ ການຊື້-ຂາຍໄຟຟ້າ ຈາກປະເທດຈີເອມເອສ, ເອດີບີ, ທະນາຄານໂລກ, ອົງການຊ່ວຍເຫລືອປະເທດຝຣັ່ງ ແລະ ອົງການໃຈກາເຂົ້າຮ່ວມນໍາດ້ວຍ.

ໃນກອງປະຊຸມ, ໄດ້ພ້ອມກັນທົບທວນຄືນກ່ຽວກັບຜົນການຈັດຕັ້ງປະຕິບັດວຽກງານດັ່ງກ່າວໃນປີຜ່ານມາ, ພ້ອມທັງປຶກສາຫາລືໃນການປັບປຸງທາງດ້ານມາດຕະຖານ, ຂໍ້ກຳນົດລະບຽບກົດໝາຍ, ຂັ້ນຕອນການຂໍອະນຸມັດ ແລະ ຄ່າຜ່ານສາຍສົ່ງຂອງລະບົບສາຍສົ່ງໃນການເຊື່ອມໂຍງສຳລັບການແລກປ່ຽນ ແລະ ຊື້-ຂາຍໄຟຟ້າຢູ່ໃນອານຸພາກພື້ນແມ່ນ້ຳຂອງ.

- lattana 1 - ປະເທດ ຈີເອມເອສ (GMS) ຫາລືການຊື້-ຂາຍໄຟຟ້າແກ້ໄຂອຸປະສັກຕ່າງໆ

ທ່ານ ຄຳໂສ້ ກຸໂພຄຳ ກ່າວວ່າ: ກອງປະຊຸມຄັ້ງນີ້, ເພື່ອປຶກສາຫາລືກ່ຽວກັບແຜນການໃນການແລກປ່ຽນ, ຊື້-ຂາຍໄຟຟ້າຮ່ວມກັນຢູ່ໃນບັນດາປະເທດອານຸພາກພື້ນແມ່ນ້ຳຂອງ, ເຊິ່ງພວກເຮົາຈະໄດ້ປຶກສາຫາລືແບບເປີດກວ້າງກວ່າເກົ່າ. ໃນປັດຈຸບັນນີ້, ການຊື້-ຂາຍໄຟຟ້າມີພຽງແຕ່ລະຫວ່າງສອງປະເທດ, ແຕ່ວ່າໃນຕໍ່ໜ້າພວກເຮົາຈະໃຫ້ມີການຊື້-ຂາຍຫລາຍຂຶ້ນກວ່າເກົ່າ ແລະ ສາມາດຊື້-ຂາຍຂ້າມໄປຍັງປະເທດທີສາມໄດ້.

ຈີເອມເອສ ເປັນພາກພື້ນທີ່ມີການຊື້-ຂາຍ ແລະ ແລກປ່ຽນພະລັງງານໄຟຟ້າແຫ່ງໜຶ່ງຂອງໂລກຖັດຈາກເອີຣົບ ແລະ ອາຟຣິກກາ, ຊຶ່ງແຕ່ລະປະເທດລ້ວນແລ້ວມີສາຍສົ່ງເຊື່ອມຕໍ່ກັບປະເທດໃດໜຶ່ງ. ສຳລັບ ສປປ ລາວ ກໍມີສາຍສົ່ງເຊື່ອມຕໍ່ກັບ 5 ປະເທດເພື່ອນບ້ານຄື: ໄທ, ຈີນ, ຫວຽດນາມ, ກຳປູເຈຍ ແລະ ມຽນມາ, ຊຶ່ງໃນປີ 2016 ສປປ ລາວ ໄດ້ມີການສົ່ງອອກໄຟຟ້າຫລາຍກວ່າ 12 ລ້ານກິໂລວັດໂມງທົ່ວພາກພື້ນ, ມີຈຸດເຊື່ອມຕໍ່ໄຟຟ້າຮ່ວມກັນຫລາຍກວ່າ 50 ຈຸດ ແລະ ໃນແຕ່ລະປີໄດ້ມີການແລກປ່ຽນພະລັງງານໄຟຟ້າຫລາຍກວ່າ 30 ລ້ານກິໂລວັດໂມງ.

error: Content is protected !!