ເປີດນໍາໃຊ້ລະບົບກວດກາຕູ້ຄອນເທນເນີເພີ່ມຄວາມເຂັ້ມງວດໃນການກວດກາສິນຄ້າທີ່ນຳເຂົ້າ

- container control unit - ເປີດນໍາໃຊ້ລະບົບກວດກາຕູ້ຄອນເທນເນີເພີ່ມຄວາມເຂັ້ມງວດໃນການກວດກາສິນຄ້າທີ່ນຳເຂົ້າ
- Untitled design - ເປີດນໍາໃຊ້ລະບົບກວດກາຕູ້ຄອນເທນເນີເພີ່ມຄວາມເຂັ້ມງວດໃນການກວດກາສິນຄ້າທີ່ນຳເຂົ້າ

ກົມພາສີ ກະຊວງການເງິນ, ໄດ້ເພີ່ມມາດຕະການເຝົ້າລະວັງການລັກລອບນໍາເຂົ້າສິນຄ້າທີ່ຜິດລະບຽບກົດໝາຍທີ່ຈະເປັນໄພອັນຕະລາຍຕໍ່ປະເທດຊາດ ແລະ ໃນວັນທີ 14 ທັນວານີ້, ທີ່ລານພັກສິນຄ້າ-ທ່ານາແລ້ງ (CY) ໄດ້ເປີດນໍາໃຊ້ລະບົບກວດກາຕູ້ຄອນເທນເນີ (CCU) ດ້ວຍເຄື່ອງກວດທີ່ທັນສະໄໝ, ກວດສອບໄດ້ງ່າຍ ແລະ ບໍ່ກີດກັ້ນການຂົນສົ່ງສິນຄ້າເຂົ້າ-ອອກຜ່ານດ່ານພາສີ, ໂດຍການເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະ ຊວງການເງິນ, ມີຜູ້ຕາງໜ້າຫ້ອງການຄະນະກໍາມະການແຫ່ງຊາດເພື່ອກວດກາ ແລະ ຄວບຄຸມຢາເສບຕິດ ປກສ, UNODC, ເອກອັກຄະລັດຖະທູດຜູ້ໃຫ້ການສະໜັບສະໜູນ, ພ້ອມດ້ວຍເຈົ້າໜ້າທີ່ພາສີກ່ຽວຂ້ອງເຂົ້າຮ່ວມ.

ທ່ານ ບຸນປະເສີດ ສີກຸນລະບຸດ ຮັກສາການຫົວໜ້າກົມພາສີ ໃຫ້ຮູ້ວ່າ: ໂຄງການກວດກາຕູ້ຄອນເທນເນີດັ່ງກ່າວ, ເປັນແຫ່ງທໍາອິດໃນ ສປປ ລາວ ທີ່ເປີດນຳໃຊ້ຢູ່ດ່ານພາສີສາກົນຂົວມິດຕະພາບລາວ-ໄທແຫ່ງທີ (1 ນະຄອນຫລວງວຽງຈັນ-ໜອງຄາຍ) ໂດຍໄດ້ຮັບການຊ່ວຍເຫລືອຈາກອົງການສະຫະປະຊາຊາດເພື່ອຕ້ານຢາເສບຕິດ ແລະ ອາດຊະຍາກໍາ (UNODC) ແລະ ບັນດາປະເທດຜູ້ໃຫ້ການສະໜັບສະໜູນເຊັ່ນ: ການາດາ, ອົດສະຕາລີ ແລະ ສະຫະລັດອາເມລິກາ.

ອີງຕາມອົງການພາສີໂລກໄດ້ຮັບຮອງເອົາແຜນປະຕິບັດງານການກວດກາຕູ້ຄອນເທນເນີ ເພື່ອກວດກາສິນຄ້າຜິດກົດໝາຍ, ຢາເສບຕິດ, ສິນຄ້າທີ່ສາມາດໃຊ້ໄດ້ສອງລັກສະນະ (ເພື່ອຮັບໃຊ້ທົ່ວໄປ ຫລື ເພື່ອນໍາໄປຜະລິດອາວຸດນິວເຄຣຍ), ເຄື່ອງປ່າຂອງດົງ, ສັດປ່າຕ້ອງຫ້າມ ແລະ ສິນຄ້າທີ່ລະເມີດຊັບສິນທາງປັນຍາ, ຊຶ່ງອົງການພາສີໂລກໄດ້ກໍານົດໃຫ້ບັນດາປະເທດສະມາຊິກທີ່ມີຄວາມສ່ຽງໃນການເຄື່ອນຍ້າຍສິນຄ້າເຫລົ່ານີ້, ໂດຍສະເໜີໃຫ້ເຂົ້າຮ່ວມໂຄງການດັ່ງກ່າວລວມມີ 36 ປະເທດນັບທັງ ສປປ ລາວເຮົາ ແລະ ອີກ 18 ປະເທດແມ່ນກໍາລັງດໍາເນີນຂັ້ນຕອນ ແລະ ໄດ້ຮັບທຶນຊ່ວຍເຫລືອດັ່ງກ່າວ. ສຳລັບ ສປປ ລາວ ຍັງຕ້ອງມີພັນທະກັບສາກົນທີ່ຕິດພັນກັບການຈັດຕັ້ງປະຕິບັດວຽກງານພາສີ, ເພື່ອຊ່ວຍໃນການຕ້ານ ແລະ ສະກັດກັ້ນການລັກລອບນໍາເຂົ້າ-ສົ່ງອອກ ແລະ ຜ່ານແດນຜິດກົດໝາຍ ເຊັ່ນ: ຕໍ່ຍັດຕິສະພາຄວາມໝັ້ນຄົງອົງການສະຫະປະຊາຊາດໃນການສົ່ງເສີມລະບອບບໍ່ແຜ່ຜາຍອາວຸດທໍາລາຍລ້າງຜານ ສະບັບເລກທີ 1540/ສປຊ, ພັນທະຂອງສປປ ລາວ ຕໍ່ພາຄີສົນທິສັນຍາການບໍ່ແຜ່ຜາຍອາວຸດນິວເຄຣຍ ປີ 1970, ສົນທິສັນຍາວ່າດ້ວຍອາວຸດຊີວະພາບ 1973, ສົນທິສັນຍາວ່າດ້ວຍອາວຸດເຄມີ 1997 ແລະ ຂໍ້ຕົກ ລົງເຂດປອດອາວຸດນິວເຄຣຍອາຊີໃຕ້. ສະນັ້ນໂຄງການກວດກາຕູ້ຄອນເທນເນີ ບໍ່ພຽງແຕ່ເປັນໂຄງການຊ່ວຍເຫລືອສ້າງຂີດຄວາມສາມາດໃຫ້ເຈົ້າໜ້າທີ່ພາສີໃນການຄຸ້ມຄອງຕູ້ສີນຄ້າເທົ່ານັ້ນ, ແຕ່ໂຄງການຍັງຊ່ວຍຊຸກຍູ້ ແລະ ປະກອບສ່ວນຂອງຂະແໜງພາສີໃນການປະຕິບັດພັນທະສາກົນທີ່ ສປປ ລາວ ເຮົາເຂົ້າຮ່ມເປັນພາຄີໃຫ້ມີປະສິດທິຜົນ.

 

- Wave100S AD to Website 2020 0 - ເປີດນໍາໃຊ້ລະບົບກວດກາຕູ້ຄອນເທນເນີເພີ່ມຄວາມເຂັ້ມງວດໃນການກວດກາສິນຄ້າທີ່ນຳເຂົ້າ
- WhatsApp Image 2020 05 27 at 5 - ເປີດນໍາໃຊ້ລະບົບກວດກາຕູ້ຄອນເທນເນີເພີ່ມຄວາມເຂັ້ມງວດໃນການກວດກາສິນຄ້າທີ່ນຳເຂົ້າ
- WhatsApp Image 2020 05 27 at 5 - ເປີດນໍາໃຊ້ລະບົບກວດກາຕູ້ຄອນເທນເນີເພີ່ມຄວາມເຂັ້ມງວດໃນການກວດກາສິນຄ້າທີ່ນຳເຂົ້າ
error: Alert: ເນື້ອຫາຂ່າວມີລິຂະສິດ !!