ອຸປະຕິເຫດ ຍັງເປັນພະຍາດເກົ່າໆ ຈົນກາຍເປັນ ມະເຮັງທີ່ຊຳເຮື້ອທີ່ຂ້າຊີວິດຄົນລາວ

ໂດຍ: ຜາຕຸງ

ຈາກສະຫຼຸບລາຍງານຈຳນວນອຸປະຕິເຫດທີ່ເກີດຂຶ້ນໃນຂອບເຂດທົ່ວປະເທດຂອງກົມຕຳຫຼວດ ຈາລະຈອນ ກົມໃຫຍ່ຕຳຫຼວດໃຫ້ຮູ້ວ່າ: ໃນເດືອນພຶດສະພາຜ່ານມາ ທົ່ວປະເທດ ມີອຸປະຕິເຫດເກີດຂຶ້ນທັງໝົດ 532 ລາຍ ເພີ່ມຂຶ້ນຈາກເດືອນເມສາ 202 ລາຍ, ພາຫະນະເປ່ເພ 931ຄັນ ຫຼຸດລົງ 344 ຄັນ, ມີຄົນໄດ້ຮັບບາດເຈັບ 800 ຄົນ, ຫຼຸດລົງ 367 ຄົນ, ແຕ່ສິ່ງທີ່ໜ້າຕົກໃຈຫຼາຍແມ່ນຕົວເລກຜູ້ເສຍຊີວິດຈາກອຸປະຕິເຫດເຫຼົົ່ານັ້ນມີເຖິງ70ຄົນ, ຫຼຸດລົງຈາກເດືອນເມສາ 39 ຄົນ. ລວມມູນຄ່າການເສຍຫາຍຫຼາຍກວ່າ 19,369 ລ້ານກວ່າກີບ, ເພີ່ມຂຶ້ນຈາກເດືອນ ເມສາ ເກືອບ 543 ລ້ານກີບ.

ຈຳນວນທີ່ຮ່ວມກໍອຸປະຕິເຫດນັ້ນມີທັງຄົນລາວເຮົາ ແລະຄົນຕ່າງປະເທດຢູ່ນຳ ຊຶ່ງມີຄົນຕ່າງປະເທດເຖິງ37ຄົນ ລວມມີສັນຊາດຫວຽດນາມ,ຈີນ, ໄທ, ຝຣັ່ງ ແລະ ມຽນມາ ຕາມລຳດັບ, ເກນອາຍຸ ຕ່ຳກວ່າ 15 ປີ ມີ 130 ຄົນ, ແຕ່ 16 ຫາ 30 ປີ ມີຫຼາຍກວ່ 600 ຄົນ, ອາຍຸ 31-50ປີ 400 ກວ່າຄົນ , ອາຊີບກຳມະກອນແມ່ນກວມອັດຕາສ່ວນຫຼາຍກວ່າໝູ່ມີເຖິງ 201 ຄົນ, ຖ້າແບ່ງເປັນແຂວງທີ່ເກີດອຸປະຕິເຫດຫຼາຍກວ່າເພິ່ນ ແມ່ນແຂວງຈຳປາສັກ, ຮອງລົງມາແມ່ນນະຄອນ ຫຼວງວຽງຈັນ, ແຂວງວຽງຈັນ, ສະຫວັນນະເຂດ ແລະ ແຂວງອື່ນໆຕາມລຳດັບ.

ຕາມການກວດກາຕົວຈິງຂອງເຈົ້າໜ້າທີ່ ຈາລະຈອນແຕ່ລະແຂວງໃຫ້ຮູ້ວ່າ ຈຳນວນອຸປະຕິເຫດເກີດຂຶ້ນທັງໝົດນັ້ນລ້ວນແລ້ວແຕ່ມາຈາກການຂາດລະບຽບວິໄນຜູ້ຂັບຂີ່ບໍ່ເຄົາລົບລະບຽບການສັນຈອນທາງບົກ, ເຕັກນິກລົດບໍ່ຮັບປະກັນ, ດື່ມສິ່ງມຶນເມົາແລ້ວຂັບຂີ່ລົດ ແລະ ອື່ນໆ ເຊັ່ນ: ຂີ່ດ້ວຍຄວາມໄວເກີນກຳນົດ, ປ່ຽນທິດທາງເດີນ ຫຼື ຍ້ອນສວນທາງ, ບໍ່ປ່ອຍສິດ, ຊີງຂຶ້ນໜ້າບໍ່ຮັບປະກັນ.

ຈາກຕົວເລກອຸປະຕິເຫດທີ່ເກີດຂຶ້ນຕາມທ້ອງຖະໜົນທັງໃນນະຄອນຫຼວງວຽງຈັນ ແລະ ແຂວງຕ່າງໆທົ່ວປະເທດ ໃນເດືອນພຶດສະພາຜ່ານມານີ້ ໄດ້ຢັ້ງຢືນໃຫ້ພວກເຮົາເຫັນແລ້ວວ່າ ຈັນຍາບັນຂອງຜູ້ຂັບຂີ່ຍວດຍານພາຫະນະຂອງຄົນໃນສັງຄົມເຮົາເວົ້າສະເພາະແຕ່ຄົນຈຳນວນໜຶ່ງເທົ່ານັ້ນເດີ ບໍ່ໄດ້ຕີລວດກວດພຽງແບບລວດແຂ້ວເຕົ່າດອກ  ເພາະວ່າມີຄົນຈຳນວນໜຶ່ງຍັງຂາດມາລະຍາດຂາດ ຄວາມນັບຖື ລະບຽບກົດໝາຍບ້ານເມືອງ ໂດຍສະເພາະ ລະບຽບການສັນຈອນທາງບົກ (ຜູ້ຂຽນຂໍຍ້ອງຍໍສັນ ລະເສີນຜູ້ຄົນຈຳນວນຫຼາຍທີ່ເອົາໃຈໃສ່ໃນເລື່ອງມາລະຍາດໃນການຂັບຂີ່ ມີນ້ຳໃຈຕໍ່ເພື່ອນຮ່ວມທາງ ເຮັດໃຫ້ເພື່ອນຮ່ວມທາງມີຄວາມປອດໄພ ນີ້ຂໍນັບຖືຈິດໃຈຢ່າງສູງສົ່ງຂອງພວກທ່ານ)

ແນວໃດກໍດີ ເມື່ອລວມມູນຄ່າການເສຍຫາຍຈາກອຸປະຕິເຫດທີ່ເກີດຂຶ້ນໃນເດືອນພຶດສະພາຜ່ານມາມີຫຼາຍກວ່າ19,369 ລ້ານກວ່າກີບ, ເພີ່ມຂຶ້ນຈາກເດືອນ ເມສາ ເກືອບ 543 ລ້ານກີບ, ນີ້ເປັນຕົວເລກ ຄວາມສູນເສຍທີ່ຫຼາຍສົມຄວນ, ນອກຈາກມູນຄ່າຄວາມເສຍຫາຍທາງດ້ານຊັບສິນ ແລ້ວຊີວິດຄົນເຮົາກໍສູນເສຍໄປເປນຈຳນວນຫຼາຍເຊັ່ນດຽວກັນ ຊຶ່ງສ່ວນຫຼາຍແມ່ນໄວກຳລັງແຮງໃນການສ້າງສາພັດທະນາປະເທດຊາດ ກຳລັງແຮງຂອງໄວໜຸ່ມທີ່ມີສ່ວນສຳຄັນໃນການສ້າງສາ ເຖິງເວລາຄິດໄດ້ແລ້ວວ່າຊີວິດເຮົາມີຄ່າ ຢ່າມາຈົບຊີວິດຍ້ອນຂາດລະບຽບວິໃນ ຈົ່ງເອົາໃຈໃສ່ປະຕິບັດລະບຽບການສັນຈອນທາງບົກຢ່າງເຂົ້ມງວດ ແລ້ວຊີວິດເຮົາຈະປອດໄພຈາກອຸປະຕິເຫດຕາມທ້ອງຖະໜົນ ຂໍຢ່າໃຫ້ ພະຍາດເກົ່າໆ ພະຍາດເດີມໆ ເຕີມພິດຮ້າຍຈົນກາຍເປັນ ມະເຮັງທີ່ຊຳເຮື້ອ ຍາກທີ່ຈະແກ້ໄດ້.