ລາວກໍານົດມື້ພັກລັດຖະການມີພຽງ 5 ວັນສໍາຄັນ

- lw - ລາວກໍານົດມື້ພັກລັດຖະການມີພຽງ 5 ວັນສໍາຄັນ
- Untitled design - ລາວກໍານົດມື້ພັກລັດຖະການມີພຽງ 5 ວັນສໍາຄັນ

ຕາມການລາຍງານຈາກຫ້ອງວ່າການສໍານັກງານນາຍົກລັດຖະມົນຕີວ່າ: ນາຍົກລັດຖະມົນຕີໄດ້ອອກດໍາລັດເລກທີ 386/ລບ ລົງວັນທີ 15 ທັນວາ 2017 ວ່າດ້ວຍວັນພັກ, ໂດຍກໍານົດໃຫ້ມີມື້ພັກລັດຖະການພຽງ 5 ວັນສໍາຄັນຄື: ປີໃໝ່ສາກົນ ວັນທີ 1 ມັງກອນ, ວັນແມ່ຍິງສາກົນ 8 ມີນາ, ວັນບຸນປີໃໝ່ລາວ (ວັນສັງຂານລ່ວງ, ສັງຂານເນົາ ແລະ ສັງຂານຂຶ້ນ), ວັນກໍາມະກອນສາກົນ 1 ພືດສະພາ ແລະ ວັນສະຖາປະນາ ສປປ ລາວ (ວັນຊາດ) 2 ທັນວາ. ສ່ວນວັນສໍາຄັນອື່ນໆຂອງອົງການ ແລະ ຂະແໜງການໃຫ້ກະຊວງ, ອົງການ, ການຈັດຕັ້ງກ່ຽວຂ້ອງຈັດພິທີລະນຶກເຖິງວັນດັ່ງກ່າວດ້ວຍການຈັດໂຮມຊຸມນຸມ ຫລື ສ້າງກິດຈະກໍາຕ່າງໆໂດຍການມີສ່ວນຮ່ວມຂອງສັງຄົມ.

ດໍາລັດດັ່ງກ່າວຍັງລະບຸອີກວ່າ: ໃຫ້ຫ້ອງວ່າການສໍານັກງານນາຍົກລັດຖະມົນຕີ ອອກແຈ້ງການກ່ຽວກັບວັນພັກຊົດເຊີຍ, ພ້ອມທັງເຜີຍແຜ່, ແນະນໍາ, ກວດກາການຈັດຕັ້ງປະຕິບັດດໍາລັດສະບັບນີ້ ແລະ ໃຫ້ກະຊວງ, ອົງການຈັດຕັ້ງທຽບເທົ່າກະຊວງ, ອົງການຈັດຕັ້ງພັກ-ລັດ, ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນຂັ້ນສູນກາງ ແລະ ທ້ອງຖິ່ນ, ສໍານັກງານຜູ້ຕາງໜ້າຂອງ ສປປ ລາວ ທີ່ປະຈໍາຢູ່ຕ່າງປະເທດ, ບັນດາອົງການຈັດຕັ້ງສາກົນ, ອົງການຈັດຕັ້ງທາງສັງຄົມ,​ ລັດວິສາຫະກິດ ແລະ ວິສາຫະກິດເອກະຊົນທັງພາຍໃນ ແລະ ຕ່າງປະເທດ ແລະ ປະຊາຊົນບັນດາເຜົ່າ ຈົ່ງຮັບຮູ້ ແລະ ປະຕິບັດຕາມເນື້ອໃນຂອງດໍາລັດສະບັບນີ້ຢ່າງເຂັ້ມງວດ.

ໃນຜ່ານມາ, ການພັກໃນວັນສໍາຄັນຕ່າງໆຢູ່ປະເທດເຮົາ ແລະ ສາກົນ ແມ່ນໄດ້ປະຕິບັດກັນມາເປັນປົກກະຕິ, ເຊິ່ງນອກຈາກໄດ້ພັກໃນມື້ລັດຖະບານກໍານົດໄວ້ໃນດໍາລັດສະບັບນີ້ແລ້ວ, ກໍຍັງມີການພັກໃນວັນສໍາຄັນອື່ນໆ ເຊັ່ນ: ວັນຄູແຫ່ງຊາດ 7 ຕຸລາ, ວັນເດັກນ້ອຍສາກົນ 1 ມິຖຸນາ ແລະ ວັນສໍາຄັນຕ່າງໆຂອງບັນດາຂະແໜງການ, ເຊິ່ງເປັນໂອກາດໃຫ້ພະນັກງານລັດຈໍານວນບໍ່ໜ້ອຍໄດ້ສວຍໂອກາດຖືເອົາມື້ດັ່ງກ່າວເປັນວັນພັກວຽກ ຫລື ສະເຫລີມສະຫລອງຢ່າງລື້ນເລິງ ອັນເປັນການຟູມເຟືອຍທັງເວລາ ແລະ ວັດຖຸເງິນຄໍາອີກດ້ວຍ.

- Wave100S AD to Website 2020 0 - ລາວກໍານົດມື້ພັກລັດຖະການມີພຽງ 5 ວັນສໍາຄັນ
- WhatsApp Image 2020 05 27 at 5 - ລາວກໍານົດມື້ພັກລັດຖະການມີພຽງ 5 ວັນສໍາຄັນ
- WhatsApp Image 2020 05 27 at 5 - ລາວກໍານົດມື້ພັກລັດຖະການມີພຽງ 5 ວັນສໍາຄັນ
error: Alert: ເນື້ອຫາຂ່າວມີລິຂະສິດ !!