ສຽງແຄນແດນລ້ານຊ້າງ

- 11152 BIG - ສຽງແຄນແດນລ້ານຊ້າງ
- Untitled design - ສຽງແຄນແດນລ້ານຊ້າງ

ນັບວ່າເປັນຂ່າວຮືຮາໂດ່ງດັງໃນໂລກໂຊຊຽວ ແລະ ກໍ ເປັນ ນິມິດໝາຍທັງແມ່ນໂຊກເຂົ້າ ຂ້າງຕ້ອນຮັບປີໃໝ່ສາກົນ ແລະ ຕ້ອນຮັບປີທ່ອງທ່ຽວລາວທີ່ ຈະມາເຖິງ ເຊິ່ງທາງອົງການ ແນສໂກ (UNESCO) ໄດ້ປະກາດເອົາສຽງແຄນລາວເປັນ ມໍລະດົກທາງພູມປັນຍາທີ່ຈັບ ຕ້ອງບໍ່ໄດ້. ແຫລ່ງຂ່າວທີ່ໜ້າ ພູມໃຈນີ້ໄດ້ມີຂຶ້ນໃນວັນພະຫັດ ວັນທີ 7 ທັນວາ 2017 ທີ່ ຜ່ານ ມາ ຢູ່ໃນກອງປະຊຸມ ຄະນະກຳ ມະການດ້ານພູມປັນຍາທາງ ວັດທະນະທຳ, ອົງການສຶກສາ ວິທະຍາສາດ ແລະ ວັດທະນະ ທຳ ໃນລະຫວ່າງວັນທີ 4-9 ທັນວາ 2017ທີ່ເກາະເຊຈຸ ສ.ເກົາຫລີ.
ເມື່ອເຫັນ ແລະ ໄດ້ຍິນຂ່າວນີ້ແລ້ວຄົນລາວເຊື້ອຊາດລາວ ແລະ ສັນຊາດລາວທີ່ຢູ່ພາຍໃນ ແລະ ຕ່າງປະເທດກໍຮືຮາດີໃຈ ທີ່ເຫັນວ່າສຽງແຄນລາວໄດ້ ກາຍເປັນມໍລະດົກຕົກທອດ ອັນສຳຄັນຂອງໂລກ ແລະ ເປັນລິຄະສິດຂອງຊາດລາວ, ຄົນ ລາວ ເມື່ອກ່າວເຖິງແຄນ ແລະ ສຽງແຄນແລ້ວເປັນວັດຖຸ ແລະ ເຄື່ອງດົນຕີທີ່ຕິດພັນ ແລະ ເກີດມາພ້ອມກັບຊາດລາວ, ຄົນລາວຢ່າງແກະບໍ່ອອກ ດັ່ງຄຳພັງເພີຍທີ່ໄດ້ເວົ້າຕິດປາກ ຕໍ່ໆກັນມາວ່າ: ຢູ່ເຮືອນສູງ, ກິນເຂົ້າໜຽວຈ້ຳປາແດກ, ດ່ຽວ ສຽງແຄນ, ຟ້ອນລຳແພນສຸດສະແນນລ່ອງຂອງຢູ່ບ່ອນໃດ, ບ່ອນນັ້ນແມ່ນຄົນລາວ ເຊ່ິງມາຮອດຍຸກປັດຈຸບັນ ເຊື້ອຊາດລາວ, ຄົນລາວເກືອບເວົ້າ ໄດ້ວ່າ ຢູ່ຢັງຍາຍກະຈາຍໄປໃນ ຫລາຍ ປະເທດ. ພວກເຂົາເຈົ້າເຫລົ່າ ນັ້ນໄປຢູ່ໃສ, ເຮັດຫຍັງກໍບໍ່ລືມ ສຽງລຳສຽງແຄນພາກັນອະນຸລັກຮັກສາໃຫ້ເປັນມໍລະດົກຕົກທອດຮອດເຊັ່ນລູກເຊັ່ນຫລານ.

 

+ ອົງການອາຫານໂລກ ແລະ ອົງການສະຫະປະຊາຊາດກອງທຶນສໍາລັບປະຊາກອນຮ່ວມມືສົ່ງເສີມການພັດທະນາໄວໜຸ່ມຍິງລາວ

+ ເມືອງຫລວງພະບາງໄດ້ຮັບລາງວັນເມືອງສິ່ງແວດລ້ອມ

ເມື່ອເອີ່ຍເຖິງສິລະປະວັດ ທະນະທຳ, ເວົ້າສະເພາະເຄື່ອງ ດົນຕີຂອງຄົນລາວເຮົາແລ້ວ, ມັນບໍ່ພຽງແຕ່ແຄນກັບສຽງແຄນ ເທົ່ານັ້ນ, ຍັງມີຫລາຍສິ່ງຫລາຍ ຢ່າງທີ່ເກີດມາຈາກພູມປັນຍາ ຂອງຄົນລາວເປັນຕົ້ນເຄື່ອງ ເສບ, ເຄື່ອງດົນຕີລາວກໍຍັງປະ ກອບໄປດ້ວຍວັດຖຸອຸປະກອນ ທີ່ຫລາກຫລາຍອັນເປັນເອກະລັກສະເພາະເຊັ່ນ: ປີ້, ຄຸ່ຍ,ກະຈັບ ປີ່,ຊໍ, ກອງ, ລະນາດ, ຄ້ອງວົງ ແລະ ອື່ນໆ. ສ່ວນວ່າທຳນອງ ຂັບລຳນັ້ນກໍເກືອບເວົ້າໄດ້ວ່າ ມີຢູ່ທຸກເຂດ ແຂວງທີ່ກາຍເປັນມໍລະດົກຂອງທ້ອງຖິ່ນ ແລະ ຂອງຊາດເຊັ່ນ: ໄປທາງພາກ ໃຕ້ກໍມີຂັບໂສມ, ລຳສີພັນດອນ, ລຳສະລະວັນເລາະຂຶ້ນມາແຖວ ພາກກາງກໍມີລຳສີ່ຈັງຫວະຂອງ ຊາວສະຫວັນນະເຂດເຊັ່ນ: ລຳຄອນສະຫວັນ, ລຳບ້ານຊອກ, ລຳຕັ່ງຫວາຍ ແລະ ລຳຜູ້ໄທ. ຂຶ້ນມາແຖວ ແຂວງຄຳມ່ວນກໍມີ ລຳມະຫາໄຊ, ແຂວງບໍລິຄຳໄຊ ກໍມີຂັບເມີ້ຍ, ຊຽງຂວາງກໍມີຂັບ ພວນ, ແຂວງວຽງຈັນກໍມີຂັບງື່ມ, ຫລວງພະບາງກໍມີຂັບທຸ້ມ ແລະ ແຂວງອື່ນໆກໍມີຂັບລຳ ເອກະລັກ ສະເພາະຂອງຕົນເອງໃນຫລາຍ ທ້ອງຖິ່ນນອກນັ້ນ, ຍັງມີລຳຄູ່, ລຳກອນ, ລຳເຕີ້ຍ, ລຳເລື່ອງຕໍ່ ກອນຂອງແຕ່ລະເຂດແຂວງ ເຜົ່າຊົນເກືອບວ່ານັບບໍ່ໄຄ່ວ.
ນີ້ຄືສິ່ງທີ່ບົ່ງບອກເຖິງ ຄວາມອຸດົມສົມບູນຂອງສິລະ ປະວັດທະນະທຳຂອງຊາດລາວຄົນລາວ ເຊິ່ງໄດ້ກຳເນີດເກີດ ຂຶ້ນ ແລະ ຕິດພັນກັບວິຖີຊີວິດ, ການດຳລົງຄົວຕົວມາຫລາຍ ຍຸກຫລາຍສະໄໝ ແລະ ໄດ້ ຫລາຍພັນປີໃນຍຸກຂອງລ້ານ ຊ້າງລາວເຮົາໄດ້ ເລື່ອງລືໄປ ດ້ວຍອະລິຍະທຳ, ສິລະປະວັນ ນະຄະດີ, ພື້ນແຜ່ນຕຳນານອັນ ລືຊື່ນັບແຕ່ການປະດິດຄິດແຕ່ງ, ນະວະນິຍາຍ, ບົດລຳ, ບົດຟ້ອນ, ບົດເພງຂອງຄົນລາວກໍມີຊື່ ສຽງໂດ່ງດັງໄປບໍ່ແມ່ນຂອງ ຢອກເຊັ່ນວ່າເລື່ອງນາງແຕ່ງ ອ່ອນ, ສັງສິນໄຊ, ທ້າວກ່ຳກາ ດຳ, ນິທານນົກກະຈອກຟ້າ, ຂຸນ ລູນາງອົ້ວ, ຜາແດງນາງໄອ່, ໜັງສືຜູກລານຕ່າງໆຈົນມາ ຮອດປັດຈຸບັນຊາດລາວຄົນ ລາວຍັງອະນຸລັກຮັກສາ ແລະ ອຸດົມສົມບູນໄປດ້ວຍຊັບສິນທາງ ປັນຍາທີ່ຫລາກຫລາຍສີສັນ ຢ່າງຄັບຄັ່ງ.

- Wave100S AD to Website 2020 0 - ສຽງແຄນແດນລ້ານຊ້າງ

ໃນອານາຄົດເຮົາຄິດວ່າ, ຖ້າພວກເຮົາຫາກພ້ອມກັນເສີມຂະຫຍາຍ ແລະ ອະນຸລັກຮັກສາ ສິລະປະວັດທະນະທຳອັນຍອດຍິ່ງທີ່ເກີດຈາກພູມປັນຍາຂອງ ຄົນລາວເຮົາແລ້ວຫລາຍສິ່ງ ຫລາຍຢ່າງອາດກາຍເປັນມໍລະດົກຂອງໂລກກໍເປັນໄດ້.

 

ໂດຍ: ທິດກ່ຳ

- WhatsApp Image 2020 05 27 at 5 - ສຽງແຄນແດນລ້ານຊ້າງ
- WhatsApp Image 2020 05 27 at 5 - ສຽງແຄນແດນລ້ານຊ້າງ
error: Alert: ເນື້ອຫາຂ່າວມີລິຂະສິດ !!