ສະຫາຍ ບຸນຍັງ ວໍລະຈິດ ແລະ ຄະນະຜູ້ແທນຂັ້ນສູງພັກ, ລັດ ສປປ ລາວ ສືບຕໍ່ເຄື່ອນໄຫວຢ້ຽມຢາມ ສສ ຫວຽດນາມ

- president6 - ສະຫາຍ ບຸນຍັງ ວໍລະຈິດ ແລະ ຄະນະຜູ້ແທນຂັ້ນສູງພັກ, ລັດ ສປປ ລາວ ສືບຕໍ່ເຄື່ອນໄຫວຢ້ຽມຢາມ ສສ ຫວຽດນາມ
- Untitled design - ສະຫາຍ ບຸນຍັງ ວໍລະຈິດ ແລະ ຄະນະຜູ້ແທນຂັ້ນສູງພັກ, ລັດ ສປປ ລາວ ສືບຕໍ່ເຄື່ອນໄຫວຢ້ຽມຢາມ ສສ ຫວຽດນາມ

- 25593811 10215115493226367 1183405073 n - ສະຫາຍ ບຸນຍັງ ວໍລະຈິດ ແລະ ຄະນະຜູ້ແທນຂັ້ນສູງພັກ, ລັດ ສປປ ລາວ ສືບຕໍ່ເຄື່ອນໄຫວຢ້ຽມຢາມ ສສ ຫວຽດນາມ

ໃນຕອນເຊົ້າວັນທີ 20 ທັນວາ 2017, ສະຫາຍເລຂາທິການໃຫຍ່,ປະທານປະເທດ ບຸນຍັງ ວໍລະຈິດ ແລະ ຄະນະຜູ້ແທນຂັ້ນສູງ ພັກ, ລັດ ສປປ ລາວ ໄດ້ໄປວາງພວງມາລາທີ່ ສຸສານປະທານໂຮ່ຈິມິນ, ອານສາວະລີນັກຮົບວິລະຊົນຫວຽດນາມ ໂດຍມີ ສະຫາຍຫົວໜ້າຄະນະພົວພັນຕ່າງປະເທດຂອງສູນກາງພັກກອມມູນິດຫວຽດນາມ, ສະຫາຍຫົວໜ້າຫ້ອງວ່າການສຳນັກງານປະທານປະເທດ ສສ ຫວຽດນາມ, ສະຫາຍປະທານຄະນະກຳມະການປະຊາຊົນ ນະຄອນຫຼວງຮ່າໂນ້ຍ.

ຫຼັງຈາກນັ້ນ ສະຫາຍ ບຸນຍັງ ວໍລະຈິດ ໄດ້ຢ້ຽມຊົມການວາງສະແດງຮູບພາບ ມິດຕະພາບ ຄວາມສາມັກຄີພິເສດ ຫວຽດນາມ-ລາວ ທີ່ ຈັດຂຶ້ນຢູ່ຫໍປະຊຸມກະຊວງປ້ອງກັນປະເທດ ແລະ ໄດ້ພົບປະໂອ້ລົມບັນດາ ສະຫາຍອາດີດທະຫານອາສາສະໝັກ ແລະ ຊ່ຽວຊານຫວຽດນາມ, ບັນດານັກສຶກສາລາວທີ່ຮຽນຢູ່ ສສຫວຽດນາມແລະຊາວຫນຸ່ມຫວຽດນາມ ຈຳນວນຫລາຍຮ້ອຍຄົນ. ໃນການພົບປະໂອ້ລົມຄັ້ງນີ້ ໄດ້ມີການເຂົ້າຮ່ວມຂອງ ສະຫາຍເລຂາທິການໃຫຍ່ ຫງວຽນ ຟູ ຈ້ອງ, ບັນດາສະຫາຍການນຳຂັ້ນສູງພັກ, ລັດ ຂອງ ຫວຽດນາມ ແລະ ລາວ ຫຼາຍສະຫາຍ.

ເນື້ອໃນໂອ້ລົມຂອງ ສະຫາຍ ບຸນຍັງ ວໍລະຈິດ ມີດັ່ງນີ້:

ມື້ນີ້, ໃນໂອກາດທີ່ນຳພາຄະນະຜູ້ແທນຂັ້ນສູງພັກ-ລັດສປປລາວມາຢ້ຽມຢາມສັນຖະວະໄມຕີຢ່າງເປັນທາງການທີ່ສສຫວຽດນາມຕາມຄຳເຊື້ອເຊີນຂອງສະຫາຍເລຂາທິການໃຫຍ່ຫງວຽນຟູຈ້ອງແລະປະທານປະເທດເຈິ່ນດ້າຍກວາງ, ຂ້າພະເຈົ້າມີຄວາມປິຕິຊົມຊື່ນເປັນຢ່າງຍິ່ງທີ່ໄດ້ມາພົບປະກັບບັນດາສະຫາຍອາດີດທະຫານອາສາສະໝັກແລະຊ່ຽວຊານຫວຽດນາມຜູ້ທີ່ເປັນເພື່ອນຮ່ວມຮົບກັບພວກຂ້າພະເຈົ້າໃນຊຸມປີແຫ່ງການຕໍ່ສູ້ກູ້ຊາດເພື່ອເອກະລາດແຫ່ງຊາດຂອງສອງຊາດລາວ-ຫວຽດນາມແລະໄດ້ພົບກັບບັນດາຜູ້ຕາງໜ້າຄົນຮຸ່ນໜຸ່ມຂອງສອງປະເທດ, ຜູ້ເຊິ່ງຈະເປັນຜູ້ສານຕໍ່ສາຍພົວພັນພິເສດທີ່ຫາຍາກລະຫວ່າງລາວ-ຫວຽດນາມ.

ການມາຢ້ຽມຢາມຫວຽດນາມຂອງຄະນະໃນຄັ້ງນີ້ ພໍດີຖືກກັບບັນຍາກາດແຫ່ງປີສາມັກຄີມິດຕະພາບເຊິ່ງປະຊາຊົນສອງຊາດລາວ-ຫວຽດນາມໄດ້ພ້ອມກັນສະເຫຼີມສະຫຼອງສອງວັນປະຫວັດສາດຄື:ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 55 ປີ (5/9/1962-5/9/2017) ແລະວັນເຊັນສົນທິສັນຍາມິດຕະພາບແລະການຮ່ວມມືລະຫວ່າງລາວ-ຫວຽດນາມຄົບຮອບ 40 ປີ (18/7/1977-18/7/2017) ຢ່າງເປັນຂະບວນຟົດຟື້ນ ດ້ວຍຮູບການທີ່ອຸດົມສົມບູນແລະເຕັມໄປດ້ວຍຄວາມໝາຍອັນເລິກເຊິ່ງ, ເຊິ່ງເປັນໂອກາດທີ່ປະຊາຊົນສອງຊາດໄດ້ທົບທວນຫວນຄືນມູນເຊື້ອແຫ່ງຄວາມສາມັກຄີພິເສດທີ່ການນຳລຸ້ນກໍ່ຕັ້ງຄື: ປະທານໂຮ່ຈີມິນຜູ້ຍິ່ງໃຫຍ່, ປະທານໄກສອນພົມວິຫານແລະປະທານສຸພານຸວົງທີ່ແສນເຄົາລົບຮັກໄດ້ພ້ອມກັນກໍ່ສ້າງແລະຖະນຸຖະໜອມມາເປັນເວລາຫຼາຍທົດສະວັດຜ່ານມາແລະໄດ້ຮັບການສືບທອດ, ເສີມຂະຫຍາຍດ້ວຍເລືອດເນື້ອເຫື່ອໄຄຂອງບັນດາລຸ້ນການນຳປະຕິວັດ, ນັກຮົບປະຕິວັດແລະປະຊາຊົນສອງຊາດລາວ-ຫວຽດນາມຈົນໄດ້ກາຍເປັນສາຍພົວພັນພິເສດທີ່ຫາຍາກ, ເປັນມໍລະດົກລວມອັນລໍ້າຄ່າ, ເປັນກົດເກນແຫ່ງການຄົງຕົວແລະຂະຫຍາຍຕົວຂອງສອງຊາດ, ເປັນໜຶ່ງໃນປັດໃຈຕັດສິນໄຊຊະນະຂອງພາລະກິດປະຕິວັດຂອງແຕ່ລະປະເທດ.

ບັນດາສະຫາຍທີ່ຮັກແພງ,

ພວກຂ້າພະເຈົ້າມີຄວາມເອກອ້າງ, ທະນົງໃຈເປັນຢ່າງຍິ່ງທີ່ເຫັນວ່າເຖິງວັນເວລາໄດ້ຜ່ານພົ້ນໄປຫຼາຍສິບປີແລ້ວກໍ່ຕາມ, ສະພາບການໃນພາກພື້ນແລະສາກົນມີຄວາມສັບສົນ, ຜັນແປຢ່າງວ່ອງໄວແລະຄາດເດົາໄດ້ຍາກ, ແຕ່ສາຍພົວພັນອັນບໍລິສຸດຜຸດຜ່ອງ, ໃກ້ຊິດສະໜິດສະໜົມລະຫວ່າງປະຊາຊົນສອງຊາດ ລາວ-ຫວຽດນາມບໍ່ພຽງແຕ່ບໍ່ໄດ້ຈືດຈາງລົງຕາມການເວລາແຕ່ຍິ່ງໄດ້ຮັບການເສີມຂະຫຍາຍທັງທາງກວ້າງແລະທາງເລິກ, ນັບມື້ມີປະສິດທິຜົນແລະພວມນຳເອົາຜົນປະໂຫຍດຕົວຈິງມາໃຫ້ແກ່ປະຊາຊົນສອງຊາດລາວ ແລະຫວຽດນາມ ເຊິ່ງສະແດງອອກໃນການພົວພັນດ້ານການເມືອງ​ສືບ​ຕໍ່ມີຄວາມໜັກແໜ້ນ, ເປັນພື້ນຖານໃຫ້ແກ່ການພົວພັນໃນຂົງເຂດອື່ນໆ, ການນຳຂັ້ນສູງຂອງສອງພັກ, ສອງລັດ, ທຸກຂະແໜງການແຕ່ສູນກາງຮອດທ້ອງຖິ່ນກໍ່ລ້ວນແລ້ວແຕ່ມີການໄປມາຫາສູ່ກັນຢ່າງຫຼວງຫຼາຍ, ມີການຊ່ວຍເຫຼືອສະໜັບສະໜູນກັນ, ແລກປ່ຽນບົດຮຽນໃນການພັດທະນາເສດຖະກິດ-ສັງຄົມ; ການພົວພັນຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບ, ດ້ານການຕ່າງປະເທດສືບຕໍ່ມີໜັກແໜ້ນ, ມີການປະສານສົມທົບຢ່າງກົມກຽວໃນການປົກປັກຮັກສາໝາກຜົນຂອງການປະຕິວັດ, ຕີຖອຍກົນອຸບາຍທຳລາຍມ້າງເພຂອງບັນດາອິດທິກຳລັງປໍລະປັກ, ມີການປະສານສົມທົບຢ່າງສະໜິດແໜ້ນໃນເວທີພາກພື້ນ ແລະສາກົນ, ປະກອບສ່ວນເຂົ້າຢ່າງຕັ້ງໜ້າເຂົ້າໃນພາລະກິດສັນຕິພາບ, ມິດຕະພາບ ແລະ ການຮ່ວມມືໃນພາກພື້ນແລະໃນໂລກ; ການພົວພັນດ້ານເສດຖະກິດ-ການຄ້າ, ການລົງທຶນ, ສຶກສາ, ວັດທະນະທຳແລະດ້ານອື່ນໆລ້ວນແລ້ວແຕ່ມີຄວາມຄືບໜ້າ…ສິ່ງທີ່ເຫັນໄດ້ປະຈັກຕາແມ່ນການລົງທຶນຂອງຫວຽດນາມຢູ່ລາວແມ່ນນອນຢູ່ໃນແຖວໜ້າຂອງບັນດາປະເທດທີ່ມີການລົງທຶນຢູ່ລາວ, ຈຳນວນນັກສຶກສາຂອງລາວຢູ່ຫວຽດນາມນັບມື້ນັບເພີ່ມຂຶ້ນເຊິ່ງໄລ່ມາຮອດປະຈຸບັນໄດ້ມີລູກຫຼານຂອງປະຊາຊົນລາວຈຳນວນ 14.000 ກວ່າຄົນພວມສຶກສາຮໍ່າຮຽນຢູ່ບັນດາສະຖາບັນການສຶກສາຂອງຫວຽດນາມແຕ່ເໜືອເຖິງໃຕ້ແລະພວມໄດ້ຮັບການສຶກສາອົບຮົມ, ຕັກເຕືອນຈາກຄູອາຈານຫວຽດນາມເປັນຢ່າງດີອັນໄດ້ເຮັດໃຫ້ນັກສຶກສາລາວ ທີ່ຮຽນຈົບຢູ່ຫວຽດນາມພວມມີໜ້າທີ່ຕຳແໜ່ງສຳຄັນຢູ່ໃນກົງຈັກຂອງພັກ, ລັດສປປລາວ ໃນປະຈຸບັນ.ນີ້ເປັນທຶນຮອນອັນປະເສີດໃຫ້ແກ່ສປປລາວພວກຂ້າພະເຈົ້າໃນພາລະກິດປົກປັກຮັກສາແລະສ້າງສາປະເທດຊາດທີ່ແສນຮັກຂອງຕົນໃນໄລຍະໃໝ່.

ບັນດາສະຫາຍທີ່ນັບຖືແລະ​ຮັກ​ແພງ,

ເມື່ອຫວນຄືນເຖິງມູນເຊື້ອແຫ່ງສາຍພົວພັນພິເສດລະຫວ່າງສອງພັກ, ສອງລັດແລະປະຊາຊົນສອງຊາດ ລາວ-ຫວຽດນາມໃນ​ໄລ​ຍະ​ຜ່ານ​ມາ, ພວກເຮົາຍິ່ງມີຄວາມຊາບ​ຊຶ້ງ​ເປັນ​ຢ່າງ​ຍິ່ງ ຕໍ່ການປະກອບສ່ວນອັນໃຫ່ຍຫລວງ, ສຳຄັນຂອງບັນດາການນຳລຸ້ນກໍ່ຕັ້ງ, ພວກເພິ່ນທັງເປັນຜູ້ໄດ້ສ້າງແລະຖະນຸຖະໜອມສາຍພົວພັນນັ້ນດ້ວຍເຫື່ອແຮງ, ເລືອດເນື້ອ, ດ້ວຍສະຕິປັນຍາ, ໄດ້ຮ່ວມຂຸມຄອງດຽວກັນ, ສຸກທຸກຢູ່ຄຽງຂ້າງກັນ,ຊ່ວຍເຫຼືອກັນແບບເຂົ້າເມັດຫັກ, ຜັກເສັ້ນແບ່ງ, ຍອມເສຍສະຫຼະໃຫ້ແກ່ກັນແລະກັນເພື່ອພວກເຮົາມີສັນຕິສຸກຄືວັນນີ້. ຂ້າພະເຈົ້າມີຄວາມຊາບຊຶ້ງທີ່ເຫັນວ່າພາຍໃຕ້ການນຳພາຂອງພັກກອມມູນິດອິນດູຈີນທີ່ປະທານໂຮ່ຈີມິນສ້າງຕັ້ງ​ຂຶ້ນໃນປີ 1930,ບັນດາສະຫາຍອາດີດທະຫານອາສາສະໝັກ, ຊ່ຽວຊານທະຫານຫວຽດນາມເຊິ່ງຍາມນັ້ນອາຍຸບາງສະຫາຍບໍ່ທັນເຖິງ 20 ປີ ແຕ່ໂດຍປະຕິບັດຕາມຄຳສັ່ງສອນຂອງປະທານ ໂຮ່ຈີມິນ: “ຊ່ວຍເພື່ອນແມ່ນຊ່ວຍຕົນເອງ” ໄດ້ພ້ອມກັນພາຍບາໂລຂ້າມສາຍພູຫຼວງທີ່ຍິ່ງໃຫຍ່ໄປປະເທດລາວຂອງພວກຂ້າພະເຈົ້າເພື່ອປະຕິບັດພັນທະສາກົນຮ່ວມກັບກອງທັບ ແລະ ປະຊາຊົນລາວຕໍ່​ສູ້​ຕ້ານພວກລ່າເມືອງຂຶ້ນຈັກກະພັດແບບເກົ່າແລະແບບໃໝ່,ມີການຮ່ວມສຳພັນສູ້ຮົບນຳກັນ, ປະສານສົມທົບກັນໃນບັ້ນຮົບຕ່າງໆ, ພ້ອມກັນສ້າງວິລະກຳອັນລໍ້າເລີດ ຈົນສາມາດຍາດໄດ້ໄຊຊະນະເປັນຂັ້ນໆມາ ເຊິ່ງເດັ່ນກ່ວາໝູ່ແມ່ນການປະກາດເອກະລາດໃນປີ 1945 ຢູ່ທັງສອງປະເທດ, ພ້ອມກັນສືບຕໍ່ຕໍ່ສູ້ຕ້ານພວກລ່າເມືອງຂຶ້ນຝລັ່ງທີ່ກັບມາຮຸກຮານປະເທດຂອງພວກເຮົາເປັນຄັ້ງທີ່ 2, ຕີເອົາຊະນະພວກລ່າເມືອງຂຶ້ນຝຣັ່ງໃນບັ້ນຮົບດຽນບຽນຟູ້ທີ່ລືຊື່ໃນ ເດືອນ ພຶດສະພາ ປີ 1954 ອັນໄດ້ບັງຄັບໃຫ້ພວກລ່າເມືອງຂຶ້ນຝຣັ່ງຕ້ອງຍອມເຊັນສັນຍາເຊີແນວກ່ຽວກັບອິນດູຈີນ, ເປັນການສິ້ນສຸດແອກປົກຄອງຂອງພວກລ່າເມືອງຂຶ້ນແບບເກົ່າ…

ໃນໄລຍະຕໍ່ສູ້ຕ້ານພວກລ່າເມືອງຂຶ້ນແບບໃໝ່ແຕ່ ປີ 1955 ເປັນຕົ້ນມາ, ບັນດາສະຫາຍທະຫານອາສາສະໝັກຫວຽດນາມຍັງໄດ້ສືບຕໍ່ຮ່ວມກັບກອງທັບແລະປະຊາຊົນລາວຕໍ່ສູ້ຢ່າງພິລະອາດຫານ, ທໍລະຫົດອົດທົນ, ຍອມເສຍສະຫລະເພື່ອກັນແລະກັນ, ຄຽງບ່າຄຽງໄຫ່ລກັນ ພ້ອມກັນຍາດເອົາໄຊຊະນະລຽນຕິດໃນບັນດາບັ້ນຮົບທີ່ຂ້ຽວຂາດຈົນກ້າວໄປເຖິງໄຊຊະນະປະຫວັດສາດໃນປີ 1975 ເຊິ່ງຢູ່ຫວຽດນາມແມ່ນບັ້ນຮົບໂຮ່ຈີມິນໃນລະດູບານໃໝ່ 1975, ສໍາເລັດພາລະກິດປົດປ່ອຍຊາດ ແລະ ທ້ອນໂຮມປະເທດຊາດຢ່າງເປັນເອກະພາບ, ສ່ວນຢູ່ລາວແມ່ນການຍຶດອໍານາດແບບບົວບໍ່ຊໍ້ານໍ້າບໍ່ຂຸ່ນ ແລະ ສະຖາປະນາສປປ ລາວ ຂຶ້ນໃນວັນທີ 2 ທັນວາ ປີ 1975, ສອງ​ປະ​ເທດ​ໄດ້ສຳເລັດການປະຕິວັດຊາດປະຊາທິປະໄຕ ແລະ ກ້າວຂຶ້ນຕາມເສັ້ນທາງສັງຄົມນິຍົມ.

ພວກຂ້າພະເຈົ້າຕີລາຄາສູງ ແລະ ຮູ້ບຸນຄຸນເປັນຢ່າງຍິ່ງຕໍ່ການປະກອບສ່ວນອັນໃຫຍ່ຫຼວງ, ການເສຍສະຫຼະອັນສູງສົ່ງຂອງບັນດາສະຫາຍທະຫານອາສາສະໝັກຫວຽດນາມໃຫ້ແກ່ພາລະກິດປະຕິວັດຂອງປະຊາຊົນລາວ, ເຊິ່ງໃນຈຳນວນນັ້ນ, ຫລາຍສະຫາຍກໍ່ບໍ່ສາມາດເຫັນໄດ້ໄຊຊະນະສຸດທ້າຍຂອງການປະຕິວັດສອງປະເທດແລະ​ ໃນ​ການ​ພົບ​ປະມື້ນີ້, ພວກເຮົາສາມາດພົບປະກັບບັນດາສະຫາຍຈຳ​ນວນ​ໜຶ່ງທີ່​ເປັນຜູ້ຕາງໜ້າຂອງທະຫານລຸງໂຮ່ຈໍານວນໜຶ່ງເທົ່ານັ້ນ, ມີທະຫານອາສາສະໝັກຈຳນວນບໍ່ໜ້ອຍໄດ້ເສຍຊີວິດເລືອດເນື້ອຂອງ​ຕົນເພື່ອພາລະກິດຂອງການປະຕິວັດຢູ່ບົນດິນແດນພວກຂ້າພະເຈົ້າ, ເຊິ່ງມື້ນີ້ກໍ່ມີຜູ້ຕາງໜ້າຂອງຄອບຄົວອາດີດທະຫານອາສາສະໝັກຫວຽດນາມ​ຈຳ​ນວນ​ໜຶ່ງທີ່ເສຍຊີວິດຢູ່ລາວມາ​ຮ່ວມ. ພວກຂ້າພະເຈົ້າສຸດທີ່ຊາບຊຶ້ງຕໍ່ຄວາມເປັນຈິງທີ່ວ່າບົນດິນແດນຂອງ​ປະ​ເທດລາວຢູ່ທຸກຮ່ອງຫ້ວຍ,ພູເຂົາ, ປ່າເລິກດົງໜາກໍ່ລ້ວນແຕ່ມີຢາດເຫື່ອ, ຢາດເລືອດຂອງນັກຮົບປະຕິວັດລາວ​ແລະຫວຽດນາມໄດ້ເຈືອຈານ​ເຂົ້າ​ກັນເພື່ອຍາດເອົາເອກະລາດມາໃຫ້ປະຊາຊົນສອງຊາດລາວ-ຫວຽດນາມ ດັ່ງທີ່ ປະທານໄກສອນພົມວິຫານໄດ້ຕີລາຄາການພົວພັນພິເສດລາວ-ຫວຽດນາມໃນພິທີລະນຶກວັນຄ້າຍວັນເກີດຂອງ ປະທານໂຮ່ຈີມິນ ຄົບຮອບ 100 ປີ ໃນເດືອນພຶດສະພາ 1990 ດ້ວຍຄຳເວົ້າທີ່ຊາບຊຶ້ງຈາກນ້ຳໃສໃຈຈິງທີ່ວ່າ: “ໃນປະຫວັດສາດຂອງການປະຕິວັດໂລກ ໄດ້ມີຫຼາຍແບບຢ່າງ ອັນໃສແຈ້ງກ່ຽວກັບນ້ຳໃຈສາກົນກຳມະຊີບ, ແຕ່ບໍ່ທັນມີເວລາໃດ ແລະ ສະຖານທີ່ໃດທີ່ມີຄວາມສາມັກຄີ ຮ່ວມສຳພັນສູ້ຮົບແບບພິເສດທີ່ຍາວນານ ແລະ ຮອບດ້ານ ຄືສາຍສຳພັນ ລາວ-ຫວຽດ. ໃນໄລຍະເວລາກວ່າເຄິ່ງສະຕະວັດທີ່ຜ່ານມາ, ໄດ້ມີລູກຫຼານຫຼາຍຮຸ່ນຄົນ ຂອງປະຊາຊົນຫວຽດນາມ ໄດ້ຊ່ວຍເຫຼືອປະຊາຊົນລາວ ສູ້ຮົບ ເພື່ອຍາດເອົາເອກະລາດ, ອິດສະຫຼະພາບ ແລະ ສ້າງສາຊີວິດໃໝ່ເພື່ອໃຫ້ມີຄວາມອີ່ມໜຳສຳລານ ແລະ ຄວາມຜາສຸກ; ມີສະຫາຍຫຼາຍຄົນທີ່ໄດ້ອຸທິດຕະຫຼອດຊີວິດຂອງຕົນ ເພື່ອຮັບໃຊ້ການປະຕິວັດລາວ, ຖືປະເທດລາວປຽບເໝືອນປະເທດຊາດທີ່ສອງຂອງຕົນ. ໃນທົ່ວທຸກແຫ່ງຫົນຂອງປະເທດລາວ, ໄດ້ມີເລືອດເນື້ອຂອງນັກຮົບຫວຽດນາມ ເຈືອຈານເຂົ້າກັບເລືອດເນື້ອຂອງພະນັກງານ, ສະມາຊິກພັກ, ນັກຮົບ ແລະ ປະຊາຊົນລາວ ເພື່ອຄວາມເປັນຕາຍຂອງຊາດລາວ. ປະຊາຊົນລາວກໍ່ໄດ້ເສຍສະຫຼະເລືອດເນື້ອບໍ່ຈັກວ່າເທົ່າໃດ ເພື່ອປະກອບສ່ວນເຂົ້າໃນ ການປັບປຸງ ແລະ ເພີ່ມທະວີສາຍພົວພັນແບບພິເສດ ທີ່ສັກກາລະບູຊາຍິ່ງ. ປະຊາຊົນລາວສຸດເອກອ້າງທະນົງໃຈ ທີມີເສັ້ນທາງລຽບຕາມທິດຕາເວັນຕົກຂອງສາຍພູຫຼວງ ທີ່ມີຊື່ຂອງ ປະທານ ໂຮ່ຈີມິນ. ເສັ້ນທາງດັ່ງກ່າວໄດ້ຄົງຢູ່ຢ່າງສະຫງ່າຜ່າເຜີຍຕໍ່ໜ້າລູກລະເບີດຂອງສັດຕູນັບເປັນລ້ານໂຕນ. ພ້ອມກັບເສັ້ນທາງໃນທິດຕາເວັນອອກຂອງສາຍພູຫຼວງ ໄດ້ປະກອບສ່ວນອັນໃຫຍ່ຫຼວງເຂົ້າໃນພາລະກິດປົດປ່ອຍປະເທດລາວ ແລະ ພາກໃຕ້ຫວຽດນາມ. ເພື່ອປະຕິບັດຕາມຄຳພິໄນກຳຄຳສັ່ງສອນຂອງລຸງໂຮ່ ແລະ ໃຫ້ສົມກັບເລືອດເນື້ອເຫື່ອໄຄຂອງນັກຮົບວິລະຊົນບໍ່ຈັກວ່າເທົ່າໃດຄົນທີ່ໄດ້ເສຍສະຫຼະຊີວິດເພື່ອຊາດ ແລະ ຢາດນ້ຳຕາແຫ່ງຄວາມເຈັບປວດທໍລະມານຂອງຜູ້ເປັນແມ່, ເປັນເອື້ອຍບໍ່ຈັກວ່າເທົ່າໃດຄົນ, ສົມ​ກັບກຳລັງເຫື່ອແຮງ ແລະ ຄວາມເດັດດ່ຽວຂອງພີ່ນ້ອງຮ່ວມຊາດ, ບັນ​ດາ ສະຫາຍຂອງທັງສອງຊາດພວກເຮົາ, ພວກຂ້າພະເຈົ້າ​ໃຫ້​ຄວາມ​ໝັ້ນ​ໝາຍ​ວ່າຈະຮ່ວມກັບປະຊາຊົນຫວຽດນາມໃນ​ການປົກປັກຮັກສາຄວາມສາມັກຄີແບບພິເສດນັ້ນຕະຫຼອດກາລະນານ, ຈາກລຸ່ນຄົນປະຈຸບັນຮອດລຸ່ນຄົນຕໍ່ໆໄປ; ຄວາມສາມັກຄີ ບໍລິສຸດຜຸດຜ່ອງນັ້ນ ເປັນມູນເຊື້ອອັນປະເສີດຕະຫຼອດກາລະນານ ຂອງປະຊາຊົນ ສອງປະເທດ ​ລາວ- ຫວຽດນາມ ເຊິ່ງບໍ່ມີສັດຕູໂຕໃດສາມາດທຳລາບມ້າງເພໄດ້….”

ປະຊາຊົນສອງຊາດລາວ-ຫວຽດນາມທຸກໄວ, ທຸກ​ເພດ ລ້ວນແຕ່ຈື່ຈຳ ແລະຊາບຊຶ້ງຕໍ່ເນື້ອໃນ ແລະ ຄວາມໝາຍຂອງກາບກອນອະມະຕະຂອງປະທານໂຮ່ ຈີມິນ ທີ່ເພິ່ນຂຽນອອກໃນໃນປີ 1963 ກ່ຽວກັບການພົວພັນພິເສດຫວຽດ​ນາມ-ລາວທີ່ວ່າ:

ຮັກຫອມກັນໝາຍໝັ້ນ            ຫຼາຍສັນພູກໍ່ປີນໄຕ່

ຫຼາຍນໍ້າໃຫຍ່ແລະໂຄກຄ້ອຍ      ຂວາງຂັ້ນກໍ່ເດີນດັ້ນດຸ່ງໄປ

ສອງຊາດລາວ-ຫວຽດໄດ້          ຝັງຄວາມຮັກຢູ່ໃນໃຈ

- Wave100S AD to Website 2020 0 - ສະຫາຍ ບຸນຍັງ ວໍລະຈິດ ແລະ ຄະນະຜູ້ແທນຂັ້ນສູງພັກ, ລັດ ສປປ ລາວ ສືບຕໍ່ເຄື່ອນໄຫວຢ້ຽມຢາມ ສສ ຫວຽດນາມ

ຮົ່ງຮ່າທັງແມ່ຂອງ                     ບໍ່ເລິກປຸນປານໄດ້.

 

ປະທານສຸພານຸວົງໄດ້ໃຫ້ການຕີລາຄາທີ່ສັ້ນໆ, ມີການປຽບທຽບທີ່ງ່າຍດາຍ ແຕ່ມີຄວາມໝາຍເລິກເຊິ່ງກ່ຽວກັບຄວາມສາມັກຄີພິເສດລາວ-ຫວຽດນາມ ທີ່ວ່າ: “ສາຍພົວພັນລາວ-ຫວຽດນາມແມ່ນສາຍພົວພັນພິເສດ,ສາຍພົວພັນນັ້ນສູງກ່ວາພູເຂົາ, ຍາວກ່ວາແມ່ນຳ້, ກ້ວາງ   ກ່ວາມະຫາສະມຸດ, ງາມກ່ວາເດືອນເພັງ,ຫອມຫວນກວ່າດອກໄມ້ນາໆຊະນິດທີ່ຫອມຫວນທີ່ສຸດໃນໂລກ…”

ບັນດາສະຫາຍ ທີ່ຮັກແພງ,

ການຫວນຄືນປະຫວັດສາດແຫ່ງການຕໍ່ສູ້ຮ່ວມຂຸມຄອງດຽວກັນໃນມື້ນີີ້, ດ້ານໜຶ່ງກໍ່ເພື່ອຫວນຄືນເຖິງມູນເຊື້ອແຫ່ງການຮ່ວມ​ສຳ​ພັນ​ສູ້​ຮົບ, ການຊ່ວຍເຫຼືອຊຶ່ງກັນແລະກັນຂອງກອງທັບແລະປະຊາຊົນສອງຊາດລາວ-ຫວຽດນາມ, ແຕ່ດ້ານໜຶ່ງແມ່ນເພື່ອເປັນການປະກອບຂໍ້ມູນຕົວຈິງໃຫ້ແກ່ຄົນລຸ້ນໜຸ່ມຂອງສອງປະເທດກ່ຽວກັບມູນເຊື້ອຄວາມສາມັກຄີພິເສດ, ການເສຍສະຫຼະອັນສູງສົ່ງຂອງບັນພະບູລຸດແລະນັກຮົບປະຕິວັດລຸ້ນຕ່າງໆຂອງລາວແລະຫວຽດນາມເພື່ອອະນາຄົດອັນສະຫວ່າງສະໄຫວຂອງສອງປະເທດພວກເຮົາ,ເພື່ອໃຫ້ຄົນລຸ້ນໜຸ່ມ,ໄວໜຸ່ມນັກສຶກສາຂອງສອງປະເທດທີ່ເປັນອະນາຄົດຂອງຊາດສາ​ມາດເຫັນໄດ້ຄຸນຄ່າຂອງສັນຕິພາບ, ຄຸນຄ່າຂອງເອກະລາດແຫ່ງຊາດທີ່ຍາດມາໄດ້ດ້ວຍເລືອດເນື້ອເຫື່ອໄຄຂອງຜູ້ເປັນພໍ່, ເປັນລຸງ, ເປັນອາວ, ເປັນປ້າ, ເປັນເອື້ອຍຂອງພວກເຮົາທີ່ໄດ້ຄຽງບ່າຄຽງໄຫຼ່ກັນ, ສາມັກຄີກັນຢ່າງແໜ້ນແຟ້ນຕໍ່ສູ້ຢ່າງທໍລະຫົດອົດທົນ ບົນແປວໄຟຂອງສົງຄາມທີ່ໂຫດຮ້າຍປ່າເຖື່ອນຂອງພວກຈັກກະພັດຕ່າງ​ດ້າວ​ຜູ້​ຮຸກ​ຮານ; ພວກ​ຂ້າ​ພະ​ເຈົ້າ​ເຊື່ອ​ໝັ້ນ​ວ່າຈາກ​ສັດ​ຈະ​ທຳ​ນີ້, ໄວ​ໜຸ່ມ​ຂອງ​ສອງ​ປະ​ເທດຈະ​ພ້ອມ​ກັນສືບຕໍ່ເສີມຂະຫຍາຍມູນເຊື້ອຄວາມສາມັກຄີພິເສດລາວ-ຫວຽດນາມໃຫ້ນັບມື້ນັບມີປະສິດທິຜົນ, ມີຄວາມຮັບຜິດຊອບໃນການປົກປັກຮັກສາມິດຕະພາບທີ່ຫາຍາກດັ່ງກ່າວ, ຊ່ວຍ​ເຫລືອ​ກັນພັດທະນາປະເທດຊາດຂອງຕົນໃຫ້ນັບມື້ນັບເຂັ້ມແຂງໃນ​ເງື່ອນ​ໄຂ​ເຊື່ອມ​ໂຍງ​ສາ​ກົນ, ເດີນຕາມແນວທາງຂອງພັກ, ລັດ​ຂອງ​ສອງ​ປະ​ເທດເພື່ອໃຫ້ສົມກັບການເສຍສະຫຼະອັນສູງສົ່ງ, ໃຫຍ່ຫຼວງຂອງບັນດາລຸ້ນການນຳ, ນັກຮົບປະຕິວັດຂອງສອງຊາດພວກເຮົາ.

ບັນດາສະຫາຍ,

ໃນໂອກາດສະເຫຼີມສະຫຼອງ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ55 ປີແລະວັນເຊັນສົນທິສັນຍາມິດຕະພາບແລະການຮ່ວມມືລະຫວ່າງສອງປະເທດຄົບຮອບ 40 ປີ ໃນປີສາມັກຄີ ມິດຕະພາບໃນປີ 2017ນີ້ ແລະໃນເງື່ອນໄຂທີ່ສະພາບການຂອງໂລກ, ພາກພື້ນພວມມີການຜັນແປຢ່າງສັບສົນວ່ອງໄວບວກກັບບັນດາອິດທິກຳລັງປໍລະປັກແລະພວກບໍ່ຫວັງດີພວມຫາທຸກວິທີການໃສ່ຮ້າຍປ້າຍສີແລະທຳລາຍຄວາມສາມັກຄີພິເສດລາວ-ຫວຽດນາມນີ້ຍິ່ງກວ່າຍາມໃດໝົດທີ່ປະຊາຊົນສອງຊາດ, ໂດຍສະເພາະຄົນລຸ້ນໜຸ່ມຂອງສອງປະເທດຕ້ອງໄດ້ມີຄວາມຮັບຜິດຊອບອັນສູງສົ່ງຂອງຕົນໃນການປົກປັກຮັກສາແລະເສີມຂະຫຍາຍສາຍພົວພັນທີ່ຫາຍາກ, ບໍລິສຸດຜຸດຜ່ອງລະຫວ່າງປະຊາຊົນສອງຊາດລາວ-ຫວຽດນາມໃຫ້ນັບມື້ນັບມີປະສິດທິຜົນ, ມີຄວາມສວຍສົດງົດງາມແລະໝັ້ນຄົງຍືນຍົງຕະຫຼອດໄປເພື່ອຜົນປະໂຫຍດຂອງປະຊາຊົນສອງຊາດ, ເພື່ອສັນຕິພາບ, ມິດຕະພາບແລະການຮ່ວມມືເພື່ອພັດທະນາໃນພາກພື້ນແລະໃນໂລກ.

ພວກຂ້າພະເຈົ້າຈະສືບຕໍ່ຮ່ວມກັບພັກ, ລັດແລະປະຊາຊົນຫວຽດນາມສືບຕໍ່ປົກປັກຮັກສາແລະຖະນຸຖະໜອມສາຍພົວພັນແບບພິເສດນີ້ເໝືອນແກ້ວຕາຂອງຕົນເພື່ອເປັນມໍລະດົກສືບທອດໃຫ້ແກ່ລູກຫຼານຄົນລຸ້ນໜຸ່ມຕໍ່ໄປ.

ໃນເວທີທີ່ຄຶກຂຶມນີ້, ຂ້າພະເຈົ້າຂໍຕາງໜ້າໃຫ້ພັກ, ລັດຖະບານແລະປະຊາຊົນລາວບັນດາເຜົ່າຂໍສະແດງຄວາມຂອບໃຈຢ່າງຈິງໃຈແລະຮູ້ບຸນຄຸນຢ່າງເລິກເຊິ່ງຕໍ່ພັກ, ລັດແລະປະຊາຊົນຫວຽດນາມອ້າຍນ້ອງທີ່ໄດ້ໃຫ້ການສະໜັບສະໜູນແລະຊ່ວຍເຫຼືອອັນລໍ້າຄ່າໃຫຍ່ຫຼວງມີປະສິດທິຜົນແລະທັນການໃຫ້ແກ່ພາລະກິດປະຕິວັດຂອງລາວໃນໄລຍະຕໍ່ສູ້ກູ້ຊາດເພື່ອເອກະລາດແຫ່ງຊາດໃນເມື່ອກ່ອນກໍ່ຄືໄລຍະປົກປັກຮັກສາແລະສ້າງສາປະເທດຊາດຂອງຕົນໃນປັດຈຸບັນ.

ຂໍຖືໂອກາດນີ້ອວຍພອນໃຫ້ປະຊາຊົນຫວຽດນາມອ້າຍນ້ອງ, ພາຍໃຕ້ການນຳພາອັນສະຫຼາດສ່ອງໃສຂອງພັກກອມມູນິດຫວຽດນາມຜູ້ມີກຽດສະຫງ່າ, ຈົ່ງຍາດໄດ້ຜົນສຳເລັດໃໝ່, ໃຫຍ່ຫຼວງກວ່າເກົ່າໃນພາລະກິດປ່ຽນແປງໃໝ່, ປະຕິບັດມະຕິກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມໃຫ້ປະກົດຜົນເປັນຈິງ, ຫັນປະເທດຫວຽດນາມ​ໃຫ້ເປັນປະເທດອຸດສາຫະກຳຕາມທິດທັນສະໄໝ​ໃນປີ 2020 ໜ້ານີ້, ບັນລຸເປົ້າໝາຍປະຊາຊົນຮັ່ງມີ, ປະເທດຊາດມັ່ງ​ຄັ່ງເຂັ້ມແຂງ, ປະຊາທິປະໄຕ, ຍຸຕິທຳແລະສີວິໄລ.

ເນື່ອງໃນໂອກາດປີໃໝ່ສາກົນ 2018 ແລະປີໃໝ່ປະເພນີຂອງປະຊາຊົນຫວຽດນາມທີ່ຈະມາເຖິງນີ້, ຂໍອວຍພອນໃຫ້ສະຫາຍເລຂາທິການໃຫຍ່ຫງວຽນຟູຈ້ອງຈົ່ງມີສຸຂະພາບເຂັ້ມແຂງ, ຄອບ​ຄົວ​ມີ​ຄວາມ​ຜາ​ສຸກ, ປະ​ສົບ​ຜົນ​ສຳ​ເລັດ​ໃຫ່​ຍ​ຫລວງ​ກ່​ວາ​ເກົ່າໃນ​ການສືບຕໍ່ນຳພາປະເທດຊາດຫວຽດນາມກ້າວຂຶ້ນຢ່າງໜັກແໜ້ນ.

ຂໍອວຍພອນໃຫ້ບັນດາສະຫາຍອະດີດທະຫານອາສາສະໝັກ, ຊ່ຽວຊານຫວຽດນາມ, ບັນດາຕາງໜ້າຄອບຄົວຜູ້ເສຍຊີວິດເພື່ອພາລະກິດປະຕິວັດຂອງປະຊາຊົນລາວຈົ່ງມີສຸຂະພາບເຂັ້ມແຂງ, ສືບຕໍ່ປະກອບສ່ວນເຂົ້າໃນການສຶກສາອົບຮົມຄົນລຸ້ນໜຸ່ມໃຫ້ສານຕໍ່ສາຍສຳພັນພິເສດທີ່ຫາຍາກລະຫວ່າງຫວຽດນາມແລະລາວ, ສ້າງຜົນງານເພື່ອຂໍ່ານັບຮັບຕ້ອນວັນຄົບຮອບ 70 ປີ ຂອງທະຫານອາສາສະໝັກຫວຽດນາມ ໃນປີ 2019 ທີ່ຈະມາເຖິງ.

ອວຍພອນບັນດາສະຫາຍການນຳຂັ້ນສູງຫວຽດນາມແລະລາວຈົ່ງມີສຸຂະພາບເຂັ້ມແຂງ, ມີຄວາມຜາສຸກແລະມີຜົນສຳເລັດໃນ​ໜ້າ​ທີ່​ການ​ງານ​ທີ່​ສູງ​ສົ່ງ​ຂອງ​ຕົນ.

ອວຍພອນໃຫ້ບັນດາລູກຫຼານຂອງທັງສອງປະເທດມີສຸຂະພາບເຂັ້ມແຂງ, ມີຜົນສຳເລັດໃນການສຶກສາ​ຮ່ຳ​ຮຽນ, ສືບຕໍ່ປົກປັກຮັກສາມິດຕະພາບທີ່ຍິ່ງໃຫຍ່ຂອງສອງຊາດໃຫ້ໝັ້ນຄົງຕະຫຼອດໄປ.ຂໍຂອບໃຈ

- WhatsApp Image 2020 05 27 at 5 - ສະຫາຍ ບຸນຍັງ ວໍລະຈິດ ແລະ ຄະນະຜູ້ແທນຂັ້ນສູງພັກ, ລັດ ສປປ ລາວ ສືບຕໍ່ເຄື່ອນໄຫວຢ້ຽມຢາມ ສສ ຫວຽດນາມ
- WhatsApp Image 2020 05 27 at 5 - ສະຫາຍ ບຸນຍັງ ວໍລະຈິດ ແລະ ຄະນະຜູ້ແທນຂັ້ນສູງພັກ, ລັດ ສປປ ລາວ ສືບຕໍ່ເຄື່ອນໄຫວຢ້ຽມຢາມ ສສ ຫວຽດນາມ
error: Alert: ເນື້ອຫາຂ່າວມີລິຂະສິດ !!