ຖະແຫລງຂ່າວ ປິດປີສາມັກຄີມິດຕະພາບ ລາວ-ຫວຽດນາມ 2017

- vietnam laos 1 - ຖະແຫລງຂ່າວ ປິດປີສາມັກຄີມິດຕະພາບ ລາວ-ຫວຽດນາມ 2017
- Untitled design - ຖະແຫລງຂ່າວ ປິດປີສາມັກຄີມິດຕະພາບ ລາວ-ຫວຽດນາມ 2017

ວັນທີ 20 ທັນວາ 2017, ທີ່ທຳນຽບປະທານປະເທດ ສສ ຫວຽດນາມ ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ ປະຊາຊົນປະຕິວັດລາວ, ປະທານ ປະເທດ ແຫ່ງ ສປປ ລາວ ແລະ ສະຫານ ເຈິ່ນ ດ້າຍ ກວາງ ປະທານປະເທດ ແຫ່ງ ສສ ຫວຽດ ນາມ ໄດ້ຮ່ວມກັນຖະແຫລງຂ່າວປິດປີສາມັກຄີມິດຕະພາບ ລາວ-ຫວຽດນາມ 2017, ເຊິ່ງທັງສອງ ສະຫາຍ ໄດ້ຜັດປ່ຽນກັນກ່າວຄຳເຫັນ ໂດຍສະຫາຍ ບຸນຍັງ ວໍລະຈິດ ໄດ້ກ່າວວ່າ: ມື້ນີ້ ຂ້າພະເຈົ້າ ຮູ້ສຶກປິຕິຊົມຊື່ນເປັນຢ່າງຍິ່ງ ທີ່ໄດ້ນຳພາຄະນະຜູ້ແທນຂັ້ນສູງ ພັກ ແລະ ລັດ ແຫ່ງ ສປປ ລາວ ມາ ຢ້ຽມຢາມສັນຖະວະໄມຕີ ສາທາລະນະລັດສັງຄົມນິຍົມຫວຽດນາມ ແລະ ເຂົ້າຮ່ວມພິທີ ປິດປີສາມັກຄີ ມິດຕະພາບລາວ-ຫວຽດນາມ 2017, ຂ້າພະເຈົ້າຮູ້ສຶກຊາບຊຶ້ງເປັນຢ່າງຍິ່ງຕໍ່ການ ຕ້ອນຮັບອັນອົບອຸ່ນ, ສົມກຽດ ແລະ ເຕັມໄປດ້ວຍມິດຈິດມິດໃຈອັນດູດດື່ມຖານສະຫາຍອ້າຍນ້ອງ ຈາກບັນດາສະຫາຍ ການນຳຂັ້ນສູງ ພັກ-ລັດ ແລະ ປະຊາຊົນຊາວນະຄອນຫລວງຮ່າໂນ້ຍ.

ການມາຢ້ຽມຢາມຄັ້ງນີ້, ຂອງຄະນະຜູ້ແທນພວກຂ້າພະເຈົ້າ ຢູ່ໃນບັນຍາກາດແຫ່ງປີສາມັກຄີ ມິດຕະພາບ ທີ່ປະຊາຊົນສອງຊາດ ໄດ້ພ້ອມກັນສະເຫລີມສະຫລອງວັນສ້າງຕັ້ງສາຍພົວພັນການທູດ ສອງປະເທດ ຄົບຮອບ 55 ປີ ແລະ ວັນເຊັນສົນທິສັນຍາມິດຕະພາບ ຄົບຮອບ 40 ປີ ຢ່າງເປັນ ຂະບວນຟົດຟື້ນ. ຂ້າພະເຈົ້າເຫັນດີເປັນເອກະພາບ ກັບການຕີລາຄາຂອງສະຫາຍ ປະທານປະເທດ ເຈິ່ນ ດ້າຍ ກວາງ ທີ່ໄດ້ກ່າວໄປແລ້ວ. ສາຍພົວພັນພິເສດ ລາວ-ຫວຽດນາມ ໄດ້ຮັບການຖະນຸຖະ ໜອມ, ເພີ່ມພູນຄູນສ້າງໂດຍປະທານໂຮ່ຈິມິງ ຜູ້ນຳທີ່ຍິ່ງໃຫຍ່, ປະທານໄກສອນ ພົມວິຫານ ແລະ ປະທານ ສຸພານຸວົງ ທີ່ເຄົາລົບຮັກ ແລະ ໄດ້ຮັບການເອົາໃຈໃສ່ສືບຕໍ່ເພີ່ມພູນຄູນສ້າງ ໃຫ້ຈະເລີນ ງອກງາມ ຈາກຜູ້ນຳຫລາຍໆຮຸ່ນຕໍ່ມາ ຈົນກາຍເປັນມໍລະດົກລວມອັນລ້ຳຄ່າ, ເປັນກົດເກນແຫ່ງການ ຄົງຕົວ ແລະ ຂະຫຍາຍຕົວຂອງສອງປະເທດ, ເປັນປັດໄຈຕັດສິນໄຊຊະນະ ຂອງພາລະກິດປະຕິວັດ ຂອງແຕ່ລະປະເທດ. ຄວາມສາມັກຄີພິເສດດັ່ງກ່າວ ໄດ້ກາຍເປັນກຳລັງແຮງມະຫາສານ ທີ່ສາມາດຕີ ຖອຍສັດຕູຕ່າງດ້າວ ທີ່ມີກຳລັງອຳນາດມະຫາສານເໜືອກວ່າພວກເຮົາຫລາຍເທົ່າໄດ້.

ປະຊາຊົນສອງຊາດ ລາວ-ຫວຽດນາມ ມີສິດທີ່ຈະເອກອ້າງທະນົງໃຈທີ່ເຫັນວ່າ ເຖິງວ່າເວ ລາຈະຜ່ານໄປຍາວນາມເທົ່າໃດ ສະພາບການພາຍໃນປະເທດ, ສະພາຍການສາກົນ ແລະ ພາກພື້ນ ຈະມີຄວາມສັບສົນ, ຜັນແປສະຫລັບສັບຊ້ອນປານໃດກໍຕາມ ແຕ່ສາຍພົວພັນທີ່ບໍລິສຸດຜຸດຜ່ອງ ລະ ຫວ່າງສອງຊາດ ລາວ-ຫວຽດນາມ ບໍ່ມີວັນຈືດຈາງ, ກົງກັນຂ້າມຍິ່ງມີຄວາມແໜ້ນແຟ້ນ ແລະ ສວຍ ສົດງົດງາມກວ່າເກົ່າ.

ຕາງໜ້າພັກ, ລັດຖະບານ ແລະ ປະຊາຊົນລາວ ຂ້າພະເຈົ້າຂໍສະແດງຄວາມຮູ້ບຸນຄຸນຢ່າງ ເລິກເຊິ່ງ ຕໍ່ການຊ່ວຍເຫລືອອັນໃຫຍ່ຫລວງລ້ຳຄ່າຂອງພັກ, ລັດຖະບານ ແລະ ປະຊາຊົນຫວຽດນາມ ອ້າຍນ້ອງ ທີ່ມີຕໍ່ພາລະກິດຂອງລາວພວກຂ້າພະເຈົ້າຕະຫລອດມາ ບໍ່ວ່າຈະໃນພາລະກິດຕໍ່ສູ້ກູ້ຊາດໃນ ເມື່ອກ່ອນ ກໍຄື ແກ່ພາລະກິດປົກປັກຮັກສາລະບອບໃໝ່ ແລະ ສ້າງສາພັດທະນາປະເທດຊາດ ຂອງ ພວກຂ້າພະເຈົ້າໃນປັດຈຸບັນ.

ເພື່ອລະນຶກເຖິງ ແລະ ສະເຫລີມສະຫລອງສອງວັນປະຫວັດສາດ ຄື: ວັນສ້າງຕັ້ງສາຍພົວພັນ ການທູດສອງປະເທດ ຄົບຮອບ 55 ປີ ແລະ ວັນເຊັນສົນທິສັນຍາມິດຕະພາບ ຄົບຮອບ 40 ປີ, ໃນ ປີ 2017 ນີ້ ສອງປະເທດພວກເຮົາ ກໍໄດ້ຮ່ວມກັນຈັດກິດຈະກຳຢ່າງຫລວງຫລາຍ ເປັນຕົ້ນ ມີການ ແລກປ່ຽນການຢ້ຽມຢາມພົບປະເຊິ່ງກັນ ແລະ ກັນ ໃນທຸກລະດັບ, ຈັດຕັ້ງປາຖະກະຖາເລົ່າມູນເຊື້ອ, ແລກປ່ຽນສານອວຍພອນ, ການຈັດສຳມະນາ, ວາງສະແດງສິນຄ້າພີມຈຳໜ່າຍປຶ້ມ, ສຳພາດບັນ ດາການນຳ ແລະ ນັກຮົບປະຕິວັດຂອງສອງປະເທດ. ນອກຈາກການຈັດກິດຈະກຳຢູ່ພາຍໃນຂອງ ທັງ ສອງປະເທດແລ້ວ ບັນດາສຳນັກງານຜູ້ຕາງໜ້າການທູດຂອງສອງປະເທດ ຢູ່ຕ່າງປະເທດກໍໄດ້ ຮ່ວມ ກັນຈັດກິດຈະກຳ ພົບປະເພື່ອສະເຫລີມສະຫລອງວັນສຳຄັນດັ່ງກ່າວ ດ້ວຍບັນຍາກາດທີ່ຟົດຟື້ນທີ່ສຸດ.

ບັນດາ​ກິດຈະ​ກໍາ​ເຄື່ອນ​ໄຫວຕ່າງໆ​ເຫລົ່າ​ນັ້ນ ​ໄດ້​ເຊື່ອມ​ຊືມ​ເຂົ້າ​ໃນ​ອາລົມ​ຈິດ​ຂອງ​ປະຊາຊົນ​ທັງ​ສອງ​ປະ​ເທດ, ພິ​ເສດ ​ແມ່ນ​ໄດ້​ຊ່ວຍ​ເຮັດ​ໃຫ້​ຄົນ​ຮຸ້ນ​ໜຸ່ມ​ຂອງ​ສອງ​ປະ​ເທດ​ຮັບ​ຮູ້ ​ແລະ ​ເຂົ້າ​ໃຈ​ຢ່າງ​ເລີກ​ເຊິ່ງກວ່າ​ເກົ່າ ຕໍ່​ປະຫວັດສາດ​ຄວາມ​ເປັນ​ມາ ​ແລະ ຄວາມ​ໝາຍ​ອັນ​ເລີກ​ເຊີ່ງ​ແຫ່ງ​ສາຍ​ພົວພັນ​ມິດຕະ ພາບ​ທີ່​ຍິ່ງ​ໃຫຍ່ ຄວາມ​ສາມັກຄີ​ແບບ​ພິ​ເສດ ​ແລະ ການ​ຮ່ວມ​ມື​ຮອບດ້ານ​ດ້ານ​ ລະຫວ່າງ ສອງ​ພັກ, ສອງ​ລັດ ​ແລະ ປະຊາຊົນ​ສອງ​ຊາດ. ມາ​ຮອດ​ເວລາ​ນີ້, ​ເຖິງ​ວ່າ​ປີ​ສະມາ​ຄີ​ມິດຕະພາບ​ລາວ-​ຫວຽດ ນາມ, ຫວຽດນາມ-​ລາວ ປີ 2017 ຈະ​ສິ້ນ​ສຸດ​ລົງ ​ແຕ່​ພວກຂ້າ​ພະ​ເຈົ້າ​ເຊື່ອ​ໜັ້ນວ່າ ​ສາຍ​ພົວພັນ​ອັນ​ເປັນ​ມູນ​ເຊື້ອ, ມິດຕະພາບ​ອັນ​ຍິ່ງ​​ໃຫຍ່ ຄວາມ​ສາມັກຄີ​ແບບ​ພິ​ເສດ ​ແລະ ການ​ຮ່ວມ​ມື​ຮອບດ້ານ ລະຫວ່າງ ສອງ​ພັກ, ສອງ​ລັດ ​ແລະ ປະຊາຊົນ​ ສອງ​ຊາດ​ພວກ​ເຮົາ ຈະ​ບໍ​ມີ​ວັນ​ຈືດຈາງ ​ແລະ ຈະ​ສືບ​ຕໍ່​ຢືນ​ຍົງຄົງ​ໜັ້ນຢູ່​ໃນ​ດວງ​ໃຈ​ ຂອງ​ປວງ​ຊົນ​ທັງ​ສອງ​ຊາດ​ພວກ​ເຮົາ​ຕະຫລອດ​ໄປ. ​ໃນ​ສະພາບ​ການ​ພາກ​ພື້ນ ​ແລະ ສາກົນ ພວມ​ຜັນ​ແປ​ຢ່າງ​ສັບສົນວ່ອງ​ໄວຄື​ປັດຈຸບັນ​ນີ້, ຍິ່ງ​ກວ່າ​ເວລາ​ໃດ​ໝົດ​ທີ່​ປະ ຊາຊົນສອງ​ຊາດ ​ໂດຍ​ສະ​ເພາະ ຄົນ​ລຸ້ນໜຸ່ມ​ຂອງ​ສອງ​ປະ​ເທດ ຈະ​ຕ້ອງ​ໄດ້​ມີໜ້າ​ທີ່ ​ແລະ ຄວາມ​ຮັບ ຜິດຊອບ ອັນ​ສູງ​ສົ່ງ​ຂອງ​ຕົນ​ໃນ​ການ​ປົກ​ປັກ​ຮັກສາ ​ແລະ ​ເສີມ​ຂະຫຍາຍສາຍ​ພົວພັນມິດຕະພາບ​ອັນ​ຍິ່ງ​ໃຫຍ່ ຄວາມ​ສາມັກຄີ​ແບບ​ພິ​ເສດ ​ແລະ ການ​ຮ່ວມ​ມື​ຮອບດ້ານ ລາວ-​ຫວຽດນາມ, ຫວຽດນາມ-​ລາວ ​ເຊິ່ງ​ເປັນ​ມູນ​ເຊຶ້ອອັນ​ແສນ​ປະ​ເສີດ​ສວຍ​ງາມ​ນີ້ ​ໃຫ້​ຈະ​ເລີ​ນງອກ​ງາມ​ຕະຫລອດ​ໄປ ດັ່ງ​ຄໍາ​ກອນ​ອັນ​ລື​ຊື່ ຂອງ​ປະທານ ​ໄກສອນ ພົມວິຫານ ​ໄດ້​ຂຽນ​ໄວ້​ວ່າ:

“ຕາບ​ໃດ​ແມ່​ນໍ້າຂອງ​ບໍ່​ເຫືອດ​ແຫ້ງ                    ​ເຂີນ​ຂາດ​ແປນ​ຊາຍ

ສາຍພູ​ຫລວງ​ແສນ​ສູງ                      ບໍ່​ຕຳລົງ​ເປັນ​ຄັງ​ຫຍ້າ

ຮົງ​ຮາ​ວັງ​ເວີນ​ກວ້າງ ​                       ບໍ່​ແປນ​ດິນ​ກະທ້າງ​ໄຕ່

- Wave100S AD to Website 2020 0 - ຖະແຫລງຂ່າວ ປິດປີສາມັກຄີມິດຕະພາບ ລາວ-ຫວຽດນາມ 2017

ສອງ​ສາຍ​ໃຈ ລາວ-​ຫວຽດນາມ ພີ່ນ້ອງ               ບໍ່​ໄກ​ຂ້າງ​ຫ່າງ​ກັນ​ນັ້ນ​ແລ້ວ”

ພັກ, ລັດ ​ແລະ ປະຊາຊົນ​ລາວ ​ພວກ​ຂ້າພະ​ເຈົ້າ ຂໍ​ຢຶນຍັນ​ຢ່າງ​ໜັກ​ແໜ້ນວ່າ​ ຈະ​ຮ່ວມ​ກັບ​ບັນດາ ສະຫາຍ​ຫວຽດນາມ ​ໃນ​ການ​ປົກ​ປັກ​ຮັກສາ​ຄວາມ​ສາມັກຄີ​ພິ​ເສດ ນັ້ນ​ເໝືອນ​ດັ່ງ​ແກ້ວຕາ ຂອງ​ຕົນ ​ແລະ ຖື​ສິ່ງ​ນີ້​ເປັນ​ເຫງົ້າ​ພະລັງ ບໍ່​ເຫືອດ​ແຫ້ງ​ບົນ​ເສັ້ນທາງ​ກ້າວ​ຂຶ້ນສັງຄົມ​ນິຍົມ​ ຂອງ​ສອງ​ປະ​ເທດ​ຢ່າງ​ໜັກ​ແໜ້ນ.

ຂໍ​ອວຍພອນ​ໃຫ້​ປະຊາຊົນ​ອ້າ​ຍນ້ອງຫວຽດນາມ ພາຍ​ໃຕ້​ການ​ນໍາພາ​ອັນ​ຖືກຕ້ອງສະຫລາດ​ສ່ອງ​ໃສ່ຂອງ​ພັກກອມ​ມູນິດ​ຫວຽດນາມ ຜູ້​ມີ​ກຽດ​ສະຫງ່າ ຈົ່ງ​ສືບ​ຕໍ່​ຍາດ​ໄດ້ຜົນ​ສໍາ​ເລັດ​ໃໝ່ ​ໃຫຍ່​ຫລວງ​ກວ່າ​ເກົ່າ ​ໃນ​ພາລະກິດ​ປ່ຽນ​ແປງ​ໃໝ່ ຫັນ​ປະ​ເທດ​ເປັນ​ປະ​ເທດ​ອຸດ​ສະຫະ​ກໍາ ຕາມ​ທິດ​ທັນ​ສະ​ໄໝ ປະຕິບັດ​ບັນດາ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ 12 ຂອງ​ພັກ​ກອມ​ມູນິດ​ຫວຽດນາມ ​ໃຫ້​ປາກົດ​ຜົນ​ເປັນ​ຈິງ ບັນລຸ​ເປົ້າ​ໝາຍ​ປະຊາຊົນ​ຮັ່ງມີ ປະ​ເທດ​ຊາດ​ມັ່ງ​ຄັ່ງ​ເຂັ້ມ​ແຂງ ປະຊາທິປະ​ໄຕຍຸຕິ​ທໍາ ​ແລະ ສີ​ວີ​ໄລ.

ຂໍ​ອວຍພອນໃຫ້​ມິດຕະພາບ​ອັນ​ຍິ່ງ​ໃຫຍ່ ຄວາມ​ສາມັກຄີ​ພິ​ເສດ ​ແລະ ການ​ຮ່ວມ​ມື​ຮອບດ້ານ ລະຫວ່າງ ສອງ​ພັກ, ສອງ​ລັດ ​ແລະ ປະຊາຊົນ​ສອງ​ຊາດ ລາວ-​ຫວຽດນາມ ຈົ່ງ​ໝັ້ນຄົງ​ທະ​ນົງ​ແກ່ນ​ຕະຫລອດ​ການ​ລະ​ນານ

ຂ້າພະ​ເຈົ້າ ຂໍ​ປະກາດ​ປິດ​ປີ​ສາມັກ​ຄີມິດຕະພາບລາວ-​ຫວຽດນາມ, ຫວຽດນາມ-​ລາວ ປີ 2017 ຢ່າງ​ເປັນ​ທາງ​ການ ຮ່ວມ​ກັບ​ສະຫາຍ​ ປະທານ​ປະ​ເທດ ​ເຈີ​ນ ດ້າ​ຍ ກ່ວາງ.

+ສະຫາຍ ບຸນຍັງ ວໍລະຈິດ ແລະ ຄະນະຜູ້ແທນຂັ້ນສູງພັກ, ລັດ ສປປ ລາວ ສືບຕໍ່ເຄື່ອນໄຫວຢ້ຽມຢາມ ສສ ຫວຽດນາມ

- WhatsApp Image 2020 05 27 at 5 - ຖະແຫລງຂ່າວ ປິດປີສາມັກຄີມິດຕະພາບ ລາວ-ຫວຽດນາມ 2017
- WhatsApp Image 2020 05 27 at 5 - ຖະແຫລງຂ່າວ ປິດປີສາມັກຄີມິດຕະພາບ ລາວ-ຫວຽດນາມ 2017
error: Alert: ເນື້ອຫາຂ່າວມີລິຂະສິດ !!