1 ປີຜ່ານມາສື່ມວນຊົນລາວໄດ້ເຮັດສໍາເລັດໜ້າທີ່ຂອງຕົນຢ່າງມີກຽດ

- Media - 1 ປີຜ່ານມາສື່ມວນຊົນລາວໄດ້ເຮັດສໍາເລັດໜ້າທີ່ຂອງຕົນຢ່າງມີກຽດ
- Untitled design - 1 ປີຜ່ານມາສື່ມວນຊົນລາວໄດ້ເຮັດສໍາເລັດໜ້າທີ່ຂອງຕົນຢ່າງມີກຽດ

ປີ 2017 ນີ້, ໄດ້ມີເຫດການສໍາຄັນ ແລະ ການເຄື່ອນໄຫວຂອງສັງຄົມຫລາຍຢ່າງເກີດຂຶ້ນຢູ່ປະເທດເຮົາ ແລະ ຕ່າງປະເທດ ແລະ ທຸກໆເຫດການນັ້ນແມ່ນລ້ວນແຕ່ໄດ້ຮັບການໂຄສະນາເຜີຍແຜ່ ແລະ ສ່ອງແສງຢ່າງແທດເໝາະກັບສະພາບຕົວຈິງຢ່າງພາວະວິໃສຂອງສື່ມວນຊົນເຮົາ.

ຄືດັ່ງຮູ້ນໍາກັນວ່າ: ສື່ມວນຊົນ ແມ່ນເວທີຖະແຫລງຂ່າວທີ່ປະກອບມີສື່ສິ່ງພິມ, ສຶ່ເອເລັກໂຕຣນິກ ແລະ ຜະລິດຕະພັນສື່ມວນຊົນອຶ່ນໆ ທີ່ມີພາລະບົດບາດເປັນກະບອກສຽງຂອງພັກ-ລັດ ແລະ ສັງຄົມໃນການໂຄສະນາສຶກສາອົບຮົມແນວທາງຂອງພັກ, ລະບຽບກົດໝາຍຂອງລັດ, ປຸກລະດົມນໍ້າໃຈຮັກຊາດ, ເຜີຍແຜ່ຂໍ້ມູນຂ່າວສານດ້ານການເມືອງ, ເສດຖະກິດ-ສັງຄົມ, ວິທະຍາສາດ, ການບັນເທິງ ແລະ ສາລະໜ້າຮູ້ຕ່າງໆໃຫ້ແກ່ສັງຄົມ, ພ້ອມທັງເປັນເຄື່ອງມືສໍາຄັນຕ້ານປາກົດການຫຍໍ້ທໍ້ ແລະ ຖ້ອຍທໍານອງທີ່ບິດເບືອນຄວາມຈິງ, ຊຶ່ງຕະຫລອດ 1 ປີຜ່ານມາ, ສື່ມວນຊົນລາວໄດ້ພ້ອມກັນເຄື່ອນໄຫວເຮັດໜ້າທີ່ຂອງຕົນຢ່າງມີກຽດ ເພື່ອປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ບໍ່ວ່າຍາມໃດ, ເວລາໃດ, ສື່ມວນຊົນເຮົາກໍໄດ້ມີຄວາມພະຍາຍາມໃນການປັບປຸງພັດທະນາຕົນເອງທາງດ້ານຄຸນນະພາບ, ເນື້ອຫາສາລະ, ບົດ, ຂ່າວ ແລະ ຍົກລະດັບດ້ານເຕັກນິກໃຫ້ທັນສະໄໝ ເພື່ອຮັບປະກັນໃຫ້ແກ່ການສ່ອງແສງສະພາບການ, ເຫດການຕ່າງໆທີ່ເກີດຂຶ້ນຢູ່ພາຍໃນ ແລະ ຕ່າງປະເທດຢ່າງວ່ອງໄວ, ເຊິ່ງຜົນງານທີ່ພົ້ນເດັ່ນກໍແມ່ນການ ໂຄສະນາໃຫ້ແກ່ເຫດການ ແລະ ການເຄື່ອນໄຫວທີ່ສໍາຄັນຂອງພັກ-ລັດ ແລະ ສາກົນຕ່າງໆ ເປັນຕົ້ນ: ກອງປະຊຸມຄະນະບໍລິຫານງານສູນກາງພັກ, ບັ້ນດໍາເນີນຊີວິດການເມືອງ ແລະ ປົວແປງພັກ, ກອງປະຊຸມສະພາແຫ່ງຊາດ, ກອງປະຊຸມລັດຖະບານ, ການສະເຫລີມສະຫລອງປີສາມັກຄີມິດຕະພາບລາວ-ຫວຽດນາມ, ການເປີດປີທ່ອງທ່ຽວລາວ 2018, ການຢ້ຽມຢາມຕ່າງປະເທດຂອງຜູ້ນໍາລາວ, ການຢ້ຽມຢາມຂອງຜູ້ນໍາຕ່າງປະເທດ ແລະ ເຫດການສໍາຄັນອື່ນໆນັບແຕ່ສູນກາງຮອດທ້ອງຖິ່ນ, ໄປຄຽງຄູ່ການເປັນເວທີຊີ້ແຈງ, ຕອບຄໍາຖາມ ແລະ ແກ້ໄຂບັນຫາຕ່າງໆທີ່ສັງຄົມມີຄວາມຂ້ອງໃຈ, ເປັນແນວທາງຊີ້ນໍາໃຫ້ສັງຄົມຍົກສູງສະຕິເຄົາລົບລະບຽບກົດໝາຍ, ອານຸລັກຮັກສາ ແລະ ເສີມຂະຫຍາຍຮີດຄອງປະເພນີອັນດີງາມຂອງຊາດ, ພ້ອມທັງຕີຖອຍຖ້ອຍທໍານອງຂອງຄົນບໍ່ດີ ແລະ ອິດທິກໍາລັງປໍລະປັກ.

ມາຮອດປັດຈຸບັນ, ສາມາດຢັ້ງຢືນໄດ້ວ່າສື່ມວນຊົນເຮົາໄດ້ມີການພັດທະນາກ້າວຂຶ້ນສູ່ຄຸນນະພາບໃໝ່ຫລາຍດ້ານ, ມີຫລາຍຜະລິດຕະພັນ, ຫລາຍຄໍລໍາ, ຫລາຍລາຍການ, ຫລາຍບົດ-ຂ່າວທີ່ອຸດົມສົມບູນສາມາດດຶງດູດຜູ້ອ່ານ, ຜູ້ຟັງ ແລະ ຜູ້ຊົມນັບມື້ຫລາຍຂຶ້ນ. ປີ 2017 ໄດ້ມີສື່ສິ່ງພິມຈໍານວນ 148 ສະບັບ, ໃນນັ້ນ,​ ໜັງສືພີມ 29 ສະບັບ, ວາລະສານ 113 ສະບັບ, ວິທະຍຸກະຈາຍສຽງ 76 ສະຖານີ, ໂທລະພາບ 43 ສະຖານີ ແລະ ອັນພົ້ນເດັ່ນແມ່ນທຸກອົງການສື່ແມ່ນໄດ້ພັດທະນານໍາໃຊ້ເຟສບຸກ, ຢູທູບ,​ ເວບໄຊ ແລະ ສື່ສັງຄົມອອນລາຍຕ່າງໆ ເພື່ອສົ່ງຂໍ້ມູນຂ່າວສານຂອງຕົນໄປສູ່ຜູ້ອ່ານ, ຜູ້ຟັງ ແລະ ຜູ້ເບິ່ງໄດ້ຫລາກຫລາຍຊ່ອງທາງ ແລະ ວ່ອງໄວກວ່າເກົ່າ. ໄປຄຽງຄູ່ກັນນັ້ນ, ຖັນແຖວພະນັກງານສື່ມວນຊົນ ກໍໄດ້ເພີ່ມຂຶ້ນເປັນຈໍານວນຫລາຍ, ທັງໄດ້ຮັບການບໍາລຸງຍົກລະດັບດ້ານທິດສະດີການເມືອງ, ດ້ານວິຊາການ ເພື່ອສືບທອດເປັນພະນັກງານຫລັກແຫລ່ງ, ເພື່ອສືບຕໍ່ເຮັດສໍາເລັດທຸກໜ້າທີ່ທີ່ພັກ-ລັດຖະບານ ແລະ ປະຊາຊົນມອບໝາຍໃຫ້.

- Wave100S AD to Website 2020 0 - 1 ປີຜ່ານມາສື່ມວນຊົນລາວໄດ້ເຮັດສໍາເລັດໜ້າທີ່ຂອງຕົນຢ່າງມີກຽດ
- WhatsApp Image 2020 05 27 at 5 - 1 ປີຜ່ານມາສື່ມວນຊົນລາວໄດ້ເຮັດສໍາເລັດໜ້າທີ່ຂອງຕົນຢ່າງມີກຽດ
- WhatsApp Image 2020 05 27 at 5 - 1 ປີຜ່ານມາສື່ມວນຊົນລາວໄດ້ເຮັດສໍາເລັດໜ້າທີ່ຂອງຕົນຢ່າງມີກຽດ
error: Alert: ເນື້ອຫາຂ່າວມີລິຂະສິດ !!