ໂຮງໝໍແຂວງຫລວງພະບາງນໍາໃຊ້ເຄື່ອງມືທັນສະໄໝໃນການກວດ ແລະ ບົ່ງມະຕິພະຍາດ

- Photo 2 - ໂຮງໝໍແຂວງຫລວງພະບາງນໍາໃຊ້ເຄື່ອງມືທັນສະໄໝໃນການກວດ ແລະ ບົ່ງມະຕິພະຍາດ
- Untitled design - ໂຮງໝໍແຂວງຫລວງພະບາງນໍາໃຊ້ເຄື່ອງມືທັນສະໄໝໃນການກວດ ແລະ ບົ່ງມະຕິພະຍາດ

 ນັບເປັນຄວາມກ້າວໜ້າອີກລະດັບໜຶ່ງໃນວຽກງານປິ່ນປົວຢູ່ໂຮງໝໍແຂວງຫລວງພະບາງ, ພາຍຫລັງໄດ້ນໍາໃຊ້ເຄື່ອງສະແກນເນີ (CT scanner) ທີ່ທັນສະໄໝເຂົ້າໃນການກວດ ແລະ ບົ່ງມະຕິພະຍາດ, ຊຶ່ງເປັນການຍົກສູງຄຸນນະພາບຂອງການຮັກສາສຸຂະພາບຂອງປະຊາຊົນດີຂຶ້ນກວ່າເກົ່າ.

  ທ່ານ ຄຳສອນ ພົງສະຫວັດດີ ອຳນວຍການໂຮງໝໍແຂວງຫລວງພະບາງ ໃຫ້ຮູ້ວ່າ: ຖືເປັນຄວາມພາກພູມໃຈຂອງຄະນະນໍາ ແລະ ພະນັກງານແພດໝໍພວກເຮົາທີ່ໄດ້ນໍາໃຊ້ເຄື່ອງກວດສຸຂະພາບທັນສະໄໝດັ່ງກ່າວ, ຊຶ່ງຈະເຮັດໃຫ້ການບົ່ງມະຕິພະຍາດຂອງຄົນເຈັບມີຄວາມແມ້ນຢໍາກວ່າເກົ່າ. ໂດຍສະເພາະຜູ້ທີ່ບາດເຈັບ ຫລື ກະທົບກະເທືອນທາງສະໝອງຈາກອຸປະຕິເຫດ, ອັນເປັນສາເຫດຕົ້ນຕໍຂອງການເສຍຊີວິດ ແລະ ພິການ ແລະ ເຄື່ອງດັ່ງກ່າວແມ່ນມີຄວາມຈໍາເປັນຫລາຍໃນການພັດທະນາລະບົບການປິ່ນປົວສຸຂະພາບທີ່ມີຄຸນະພາບ. ປັດຈຸບັນ, ໂຮງໝໍແຂວງຫລວງພະບາງມີ 150 ຕຽງ ແລະ ເປັນໂຮງໝໍໃຫຍ່ໃນເຂດພາກເໜືອຂອງປະເທດ ທີ່ໃຫ້ບໍລິການປິ່ນປົວຄົນເຈັບເປັນຈໍານວນຫລາຍ.

  ຜູ້ຕ່າງໜ້າຫ້ອງການ ຈີອີ (GE) ປະຈໍາລາວ,​ ເຊິ່ງເປັນຜູ້ຜະລິດ ແລະ ສະໜອງເຄື່ອງມືດັ່ງກ່າວ ໃຫ້ຮູ້ວ່າ: ເຕັກໂນໂລຊີທັນສະໄໝສາມາດຊ່ວຍຮັກສາສຸຂະພາບທີ່ດີ ແລະ ພວກເຮົາມີຄວາມດີໃຈທີ່ໂຮງໝໍແຂວງຫລວງພະບາງໄດ້ນຳໃຊ້ເຕັກໂນໂລຊີການແພດທັນສະໄໝນີ້ເພື່ອບົງມະຕິພະຍາດທີ່ວ່ອງໄວ ແລະ ດີກວ່າເກົ່າ, ຊຶ່ງຈະສ້າງຄວາມເຊື່ອໝັ້ນຕໍ່ປະຊາຊົນທີ່ເຂົ້າມາໃຊ້ບໍລິການໄດ້ເປັນຢ່າງດີ,​ ທັງປະກອບສ່ວນເຮັດໃຫ້ມາດຕະຖານການຮັກສາສຸຂະພາບຢູ່ ສປປ ລາວນັບມື້ດີຂຶ້ນ.

  ທ່ານ ຊິນທັນ ເດໄຊ ຜູ້ອຳນວຍການໃຫຍ່ບໍລິສັດ ຈີອີ ເຮລທ໌ແຄຣ໌ ອາຊຽນ ກ່າວວ່າ: ທຸກໆປີ ຈີອີ ເຮລທ໌ແຄຣ໌ ໄດ້ລົງທຶນຫລາຍຕື້ໂດລາສະຫະລັດເຂົ້າໃສ່ການຄົ້ນຄວ້າ ແລະ ພັດທະນາດ້ານເຕັກໂນໂລຊີຕ່າງໆ ເພື່ອຕອບສະໜອງຄວາມຕ້ອງການໃນການຮັກສາສຸຂະພາບທີ່ເພີ່ມຂຶ້ນ ແລະ ໃຫ້ຍືນຍົງ, ໂດຍປັບປຸງການເຂົ້າເຖິງການປິ່ນປົວ ແລະ ບໍລິການທີ່ສົມເຫດສົມຜົນ ແລະ ເຄື່ອງສະແກນເນີທີ່ທັນສະໄໝນີ້ຈະຊ່ວຍ ໃຫ້ໂຮງໝໍແຂວງຫລວງພະບາງສາມາດບົງມະຕິໄດ້ຢ່າງວ່ອງໄວ, ຖືກຕ້ອງ, ສາມາດປິ່ນປົວຄົນເຈັບໄດ້ດີກວ່າເກົ່າ.

- Wave100S AD to Website 2020 0 - ໂຮງໝໍແຂວງຫລວງພະບາງນໍາໃຊ້ເຄື່ອງມືທັນສະໄໝໃນການກວດ ແລະ ບົ່ງມະຕິພະຍາດ

  ພິທີສົ່ງມອບເຄື່ອງສະແກນເນີດັ່ງກ່າວ, ໄດ້ຈັດຂຶ້ນເມື່ອທ້າຍອາທິດຜ່ານມາ, ທີ່ໂຮງໝໍແຂວງ,​ໂດຍມີທ່ານຮອງເຈົ້າແຂວງຫລວງພະບາງ, ທ່ານເອກອັກຄະລັດຖະທູດສະຫະລັດອາເມລິກາປະຈໍາລາວເຂົ້າຮ່ວມນໍາດ້ວຍ.

- WhatsApp Image 2020 05 27 at 5 - ໂຮງໝໍແຂວງຫລວງພະບາງນໍາໃຊ້ເຄື່ອງມືທັນສະໄໝໃນການກວດ ແລະ ບົ່ງມະຕິພະຍາດ
- WhatsApp Image 2020 05 27 at 5 - ໂຮງໝໍແຂວງຫລວງພະບາງນໍາໃຊ້ເຄື່ອງມືທັນສະໄໝໃນການກວດ ແລະ ບົ່ງມະຕິພະຍາດ
error: Alert: ເນື້ອຫາຂ່າວມີລິຂະສິດ !!